Read Achang 2 KORINTHU 8 Bible Online

2 KORINTHU 8 - Achang bible

2 KORINTHU 8

¹Jyetdap boekyis eh, Makedoni mau mas dah phung jens lhyi Mangso chah jyehjuh dyei goeus cho, ngamoq namoq lyis seq nhang mes.

²Nyamoq xauh kham goeus dah shanghsenh cho mha vthank lang mas shiwu zis xauh goeus. Nghuot laus eq nyamoq dah gaus cho svsoh kuh yvmvyah nyamoq gas svsoh nyungs bang nghuot laus eq nyamoq dah dyei gvm cho mha magons magoh dyei mes jyetdap ehnyet bos.

³Hauh phung jens gas nyamoq duot nyhoq dyei cho ngos namoq lyis top nyang kanghjyoeng kat.

⁴Nyamoq gas Yuda mau mas dah Mangso dah dius jens lyis pangh thuk das cho mha bos mes las, yoh bos das toeuh dyei das nyhenshang nyamoq ehnyet yah tungh khyoeuq nyeis.

⁵Nyamoq gas ngamoq nghamhloms thoq lyis jes shoq dyei. Nyamoq gas cangxeih lyis vsainnyang gungs shih Yhensain lhyi kyauh toh. Hauh thang lhyi Yhensain o zis yah dvyhangteh pangh thuk cho mha kyauh.

⁶Housoeh las xik lyis yah yvwons s yoeus kuot nyeis goeus dah Titu lyis hai vlu yah sen lha namoq dah lhyenwhei jyetdap ehnyet yah phuqsoe muh dye shoq namoq lyis pangh bas jungh ngamoq nyang lyis yomdyei.

⁷Namoq gas lomsjingh cho, taiq cho, seq cho mha, namoq pangh thuk mes dah ehnyet mas, ngamoq lyis jyetdap cho mha namoq dyinghjet joq goeus. Housoeh las jyetdap ehnyet yah phuqsoe muh mas eq namoq magons magoh vlu dyei das yvlyis ngamoq omes.

⁸Ngos heisoeh taiq zis gas, tyingtoh dang khyoq toh nyeis zis ma nghuot. Gohyhamh bang dah pangh thuk cho mha jyetdap ehnyet kha iq kuhxing nyeis yvlyis taiq kyoh zis yah namoq dah jyetdap ehnyet gyingh ge yvlyis yoh seq das nyhenshang taiq zis nghuot.

⁹Namoq gas yah Yhensain Yesu Khristu dah jyehjuh lyis tsain seq. Yhensain Yesu gas nyang dis nyeis laus eq namoq xiklyis nyah gungs lyis shohjyen soeu kuot goeus. Nyang shohjyen xauh gvng mas namoq dis los goeus.

¹⁰Hai vlu dyei cho yah sen lha ngos nghamh khyvlyis oen lhyi ka, vnhaiqyos namoq kuot xi toh dah muh lyis gvshih tyeh kuot lyis namoq xiklyis gis das. Namoq gas jyetdap ehnyet yah dyei mes ehnyet cangxeih bos bang kyingh ma nghuot, vlu cangxeih dyei bang tsain nghuot.

¹¹Housoeh yvmvyah hauh muh lyis tsoq las tyeh kuot geh. Namoq hauh muh lyis kuot loh yvmas bauh ehnyet bos joq zis yah dvyhangteh duot nyhoq tyeh kuot geh.

¹²Namoq mas dyei mes dah jyetdap ehnyet bos lyis Mangso ka namoq duot nyhoq dyei dah jyungshuk lyis lhom yoeus das. Namoq ma duot yvlyis Mangso sang das zis ma nghuot.

¹³Khasoeh ge lhyi gohyhamh lyis sunghhuq nhang das xiklyis ngos namoq lyis yvwons s huon zis ma nghuot.

¹⁴Nghuot laus eq gvshih namoq mas magons magoh yoh joq yvmvyah chah nyeis bang lyis pangh thuk das nyhenshang phi; dvnyeih buis lyis nyamoq nyoshoq yoh joq las namoq chah nyeis lyis nyamoq eq namoq lyis doms thuk das. Heisoeh kuot las nyang changh nyang yih yih yoh pangh goh.

¹⁵Lhaihtoh dang mas: Nyoshoq yung toh soeu eq guszes loh zis ma bos, dvmhauh dvxauh yung toh soeu eq chah shih zis ma bos, ge lhaih toh zis yah dvyhangteh nghuot.

¹⁶Namoq lyis pangh thuk das xiklyis ngamoq mas mes dah ehnyet bos teh, Titu dah ehnyet mas eq heisoeh bos nhang dah Mangso jyehjuh lyis kha iq chungh gis lah!

¹⁷Titu gas ngamoq dung dang lyis lhom yoeus thoq lyis magoh, svsoh kuot dyei mes ehnyet bos las, nyang namoq jyank pheh los das nyhenshang nyah ehnyet nyang nghamh thyet toh.

¹⁸Hauh gausyis dang taiq muh wons wuq cho mha, phung dvnganh yah nghamh kuh toh soeu vmang vnoeuh dvyuk lyis eq ngamoq nyang yah dvgeh nhang kat.

¹⁹Hauh thoq lyis hai jyetdap ehnyet yah phuqsoe dah vlu tsainh muh mas ngamoq yah dvgeh suh e das xiklyis phung jens yah khyen toeuq toh zis xauh soeu eq nyang nghuot. Hauh cho ka Yhensain dah phunk nyoqnho ngelang Chixoeuq das zis yahge ngamoq dah pangh mes ehnyet lyis Chixoeuq das xiklyis nghuot.

²⁰Hai dyei mes ehnyet yah dyei dah jyungshuk lyis yhung cho mha ngamoq lyis hank eq yobos huon chank ma bos bas jungh zaih nyeis.

²¹Yhensain dah xikkhonh mas kyingh ma nghuot, dius dah xikkhonh mas eq jyoeng lha phi dah muh khanh das zis gas ngamoq dah nghamh toeuq cho nyang nghuot.

²²Housoeh yvmvyah ngamoq gas hau vmang vnoeuh tang yah dvgeh gohtoeu Khristan vmang vnoeuh dvyuk lyis eq nhang kat. Hauh soeu lhyi ngamoq nyoshoq lhain shi yoeuh lyis nyang gas khanhamp eq mes zis yahge seq pangh soeu nghuot yvlyis yoh seq. Gvshih nyang gas namoq thoq mas nghamhnywe ehnyet bos las svsoh pangh mes nyeis.

²³Titu cho yah sen lha taiq lyis, nyang gas ngah loeuzomh yahge namoq lyis pangh thuk das xiklyis ngos yah muh zomh zwi soeu nghuot. Nyang yah dvgeh chank los dah vmang vnoeuh aiq yuk gas phung jens dah lvgyo nghuot las Khristu dah phunk nyoqnho Chixoeuq das vzomh nghuot.

²⁴Housoeh yvmvyah, namoq yah sen lha ngamoq nyoqnho ngelang yoeus las khwank zis gas jus cho phung jens dvnganh top yoh seq bas jungh, nyamoq lyis namoq dah jyetdap ehnyet Chixoeuq geh.