Read Achang 2 KORINTHU 9 Bible Online

2 KORINTHU 9 - Achang bible

2 KORINTHU 9

¹Yuda mau Mangso dah dius jens jyank mas huon kat dah pangh thuk cho yah sen lha ngos namoq jyank mas lhaih kat chank ma bos.

²Namoq pangh mes jyetdap ehnyet bos yvlyis ngos seq. Housoeh las namoq dah cho Makedoni mung dius jens lyis khwank xoeuq goeus. Akhaia mau mas vmang vnoeuh moq gas vnhaiqyos yah yangh pangh das zis cicont kuot toh goeus, oen Makedonia bang lyis ngos taiq goeus. Namoq kuot mes cho gvng mas nyamoq nyothyang dah ehnyet lyis nhauh toq dyei goeus.

³Haih cho yah sen lha namoq mas ngamoq khwank dang gas vkom ma bweh bas jungh, haih vmang vnoeuh moq lyis namoq jyank mas nhang kat. Ngos taiq goeus zis yah dvyhangteh namoq gas namoq vlu yah cicont kuot toh das.

⁴Housoeh ma nghuot lyis gas, Makedoni dius dvyhamh ngos yah dvgeh chank los las, namoq cicont ma nghuot yvlyis nyvng lyis namoq kyingh xoqphuh das zis ma nghuot, ngamoq eq namoq lyis nghamhnywe toh goeus zis yah dvyhangteh kha iq xoqphuh das lah!

⁵Housoeh yvmvyah, namoq jyehjuh jyungshuk dangthoengh toh zis yah dvyhangteh, hauh yvlyis sont toh das nyhenshang ngos haih boekyis lyis ngah xikpheh namoq jyank mas nhang kat chah, oen nghamh. Ngos jweh los lyis vlu sont toh goeus zis nghuot las namoq dyei zis gas dyei chah las dyei khyvlyis ma nghuot, dyei mes dah jyetdap ehnyet yah dyei cho yoh chixoeuq das.

⁶Jyo dvtsiq khyoq soeu ka dvtsiq xauh yhomh das; jyo nyoshoq khyoq soeu ka nyoshoq xauh yhomh das yvlyis soh las zaih nyeis geh.

⁷Yu dah ehnyet yah eq ma nghuot, dyei chah dah yvwons s gvng mas kyingh eq ma nghuot, yuk khanghmuh nyah ehnyet mas nghamh toeuq toh zis yah dvyhangteh dyei bas jungh: khasoeh ge lyis Mangso ka gausyis ehnyet yah dyei soeu lhyi jyetdap.

⁸Mangso ka namoq chah thoq lyis zes shoq yoh dyei. Housoeh namoq vsainnyang xiklyis chah nyeis cho dvnganh yoh das thoq lyis gis dah muhzoh khanghmuh xiklyis chah thoq lyis zes shoq xauh yoeus das.

⁹Lhaihtoh dang mas, Nyang gas chah nyeis dah nyungs bang lyis magons magoh gvm dyei las, Nyah nhaiqnyen cho ka vcaiq vto goeng joq, ge.

¹⁰Nyau khyoq soeu lhyi nyau dyei las zo das zonoms kuot dyei soeu Mangso ka, namoq mas chah dah jyo nyau luk shoq dyei thoq lyis magoh, hauh nyau lyis yuk kuh los nhang zis yah jyo nyoshoq xauh yhomh nhang. Houka namoq magons magoh dyei dah jyetdap ehnyet mas dah vshih lyis taiq zis nghuot.

¹¹Namoq masyah nyamoq xauh lhom yoeus dah vlu jyungshuk gvng mas dius nyoshoq Mangso dah jyehjuh lyis chungh das. Namoq shishenh khanghmuh vlu magons magoh yoh dyei shoq Yhensain ka namoq lyis vjangh dis nhang das.

¹²Khasoeh ge lyis haih namoq phuqsoe dah muh gas Mangso dah dius jens chah nyeis yvlyis yoh tyink dyei thoq lyis magoh, Mangso dah jyehjuh lyis chungh dah thwe yah dyingh los nyeis.

¹³Hai namoq phuqsoe muh yikhyoh gis gvng mas, dius nyoshoq gas, Khristu dah gausyis dang lyis namoq wontang lhom yoeus lomsjingh gvng mas eq, namoq dah jyetdap ehnyet yah nyamoq lyis eq gohyhamh bang lyis eq magons magoh vlu dyei gvng mas eq, Mangso lhyi nhaiqshoqlang chungh dah ehnyet dyingh muis los nhang nyeis.

¹⁴Namoq gas svsoh zes dah Mangso jyehjuh lyis xauh kham goeus yvmvyah, nyamoq gas namoq lyis svsoh jyet ehnyet yah namoq xiklyis shvmanh dung dyei das.

¹⁵Phauh ma yoh thoq suon dah Mangso jyehjuh jyungshuk gvng mas Mangso lhyi nhaiqshoqlang sang nyeis goh.