Read Achang GALATI 4 Bible Online

GALATI 4 - Achang bible

GALATI 4

¹Tsoq taiq das zis bos shih. Uwus jyank masyah yhenzis vso vlho dvnganh kham yoeus das yvmvyah jyoengh kham yoeus das zis jus joq laus eq loshang nghuot shih uhlyis gas jons dvyuk teh toh zis xauh.

²Uwus toeuq toh shishenh jweh shoq nyang ngis shih gyo lyis gomh bang jyauh bang yahge nyang chah ya chah yvlyis kuot dyei dah yhen zom bang dah o mha nyang nyeis shih.

³Houyah dvyhangteh yang eq Dyos dah cho mha seq dah nhaiqbos jens ma duot shih gyo lyis mungkvn lyis guon nyeis dah yius sidyos jens dah jons duot ku.

⁴Nghuot laus eq shishenh jweh goeus ya, Mangso ka nyah Lo lyis nhang kat. Yang gas Mangso dah lo jens ge rhen dah jyehjuh xauh kham yoeus.

⁵Hauh Lo gas Lyi khau mha nyeis bang lyis khyuot yoeus das nyhenshang cangsoeu ungwes masyah khoeu los las, Yuda jens dah Lyi khau mha nyeis lyih.

⁶Gvshih namoq gas Mangso dah lo jens tsain nghuot yvlyis kanghjyoeng chixoeuq das xiklyis, Uwus eh, ngah uwus eh ge seq taiq, nyah Lo dah Dyos lyis yah ehnyet khau mha nhang kat dyei goeus.

⁷Housoeh las nvng gas jons ma nghuot lo, lo dvyuk nghuot goeus: nyah lo nghuot goeus ya, Mangso jyank masyah nyah lo jens dah nyhenshang sont toh dah vso vlho dvnganh eq nvng lyis dyei das.

⁸Lai loh goeus yoq lyis namoq Mangso lhyi ma seq shih yvmvyah ma jyoeng dah phvra jens dah jons tsain duot khoq.

⁹Gvshih gas namoq Mangso lhyi seq goeus thoq lyis, Mangso eq namoq lyis seq goeus lyis, yomnhuk shohjyen dah yius sidyos jens jyank pheh namoq chamus doms tauh loh mes goh lah?

¹⁰Namoq gas buisnyeis, lhamhmuh, shishenh yahge zvn dvkhamh lyis svsoh yhaugyen khyvlyis toh.

¹¹Ngos namoq jyank mas vkom mha dvyomkat tyamp mvbeh oen ngos namoq cho chiqh.

¹²Boekyis eh, ngos namoq teh nghuot yvmvyah namoq eq ngos teh tsain kuot geh: oen ngos namoq lyis shangphu. Ngos namoq lyis cha ma cu.

¹³Ngos namoq lyis Gausyis Dang cangxeih vlhain yoh taiq kyoh cho ka, gungsdom nos xauh las no nyeis gvng mas yoh taiq kyoh yvlyis namoq seq nyeis.

¹⁴Ngah gungs yanghzan cho gvng mas namoq xiklyis thauqkhyi cho bweh nhang das laus eq namoq ngos lyis dius ngis ma khyoq, ma choqh thoq lyis magoh, maukhung mas dah loeuswons soeu dvyuk lyis teh, jyoengh Khristu lyis teh tsain lhom yoeus.

¹⁵Hauh uhlyis namoq svsoh yoh pyo goeus. Gvshih namoq chamus lah? Hauh shishenh lyis namoq gas gis bweh lyis vsainnyang nyoqlom lap las ngos lyis dyei das zis yangh tsain womh yvlyis ngos namoq dah cho kanghjyoeng kat.

¹⁶Gvshih gas ngos namoq lyis hau jyoeng cho taiq kyoh yvmvyah namoq dah jes bweh los goeus lah?

¹⁷Ngos lyis tomp bang gas namoq mas nhaiq wvng. Nghuot laus eq jyoeng dah nghamh toeuq zis ma nghuot. Nyamoq dah o cho ka nyamoq thoq mas namoq dah nhaiq wvng cho xauh kham yoeus shoq namoq lyis ngos yah kangh tyamp nhang mes las dvnghuot.

¹⁸Jyoeng dah nghamh toeuq cho yahge nhaiq wvng chiqh cho nghuot lyis gas gis. Ngos namoq yah nyeis lyis kyingh gis cho lhyi chiqh gis zis ma nghuot. Khanhamp laus eq gis cho lhyi chiqh nyeis das zis gas gis.

¹⁹Jyetdap loshang jens eh, Khristu dah gungs khyank namoq mas dyinghjet los shishenh jweh shoq ngos gas namoq dah xiklyis lokhoeu dah ungwes teh lokhoeu nos doms nos nyeis.

²⁰Ngos namoq lyis thwe shaih khyvlyis yoh taiq das xiklyis ngos namoq yah kha iq nyeis mes lah! Ngos gas namoq dah cho svsoh chiqh nyeis.

²¹Lyi khau mha nyeis mes bang lyis ngos nyei bah. Namoq gas hauh Lyi taiq toh cho lhyi ma xauhgyo ku goh lhyeh?

²²Khasoeh ge lyis lhaihtoh dang mas taiq zis yah dvyhangteh, Abraham gas loloeu aiq yuk yoh. Dvyuk gas jyeidwis nyih dah lo nghuot. Gohtoeu dvyuk gas nyicuk dah lo nghuot.

²³Jons nyhiq yah yoh dah lo gas diuslaiq khyvlyis khoeu los dah lo nghuot. Nghuot laus eq jons ma nghuot soeu yah yoh dah lo gas Mangso dangthoengh yah dvyhangteh khoeu los.

²⁴Hauh cho jens lyis dangtoeuq dvkoeuq khyvlyis seqgyo gis. Vmesbih aiq yuk gas hau thanghchvp aiq koeuq yah doeusgoh. Vmesbih dvyuk gas Hagar nghuot las nyang khoeu kat lo jens gas jons duot. Hagar gas Sina boms mas dyei dah thanghchvp vlho nghuot.

²⁵Hagar gas Arabia mau mas joq, Sina boms yah byi toh. Nyang gas gvshih jons duot nyeis Yerusalem yahge wus mas dius jens xiklyis vlho duot dyei nyeis.

²⁶Nghuot laus eq gohtoeu vmesbih gas maukhung Yerusalem yah byi toh. Nyang gas luiq dah vmesbih nghuot las, yah ungwes eq nghuot.

²⁷Khasoeh ge lyis lhaih toh zis gas, Lo ma khoeu dah dyeithonh eh, gauslaus nyeis aq; Lo khoeu nos ma xauh dah vmesbih eh, gaus zis yah kaiq nyeis aq; Khasoeh ge lyis doeuh tyamp toh dah vmesbih gas, yhensain phoq bos dah vmesbih thoq lyis loshang jens zes yoh, ge.

²⁸Boekyis eh, gvshih namoq gas Isak yhangteh nyah dangthoengh yah dvyhangteh yoh los dah Mangso dah lo jens nghuot.

²⁹Hauh shishenh lyis diuslaiq khyvlyis khoeu los lo gas Mangso dah Dyos gvng mas khoeu los dah lo lyis shoeuhshih. Gvshih uhlyis eq housoeh bweh nyeis.

³⁰Nghuot laus eq lhaihtoh dang gas cha taiq? Haih jyeidwis nyih yahge nyah lo lyis khat thuq aq: khasoeh ge lyis jyeidwis nyih dah lo gas nyicuk dah lo yah dvgeh uwus dah yhenzis vso vlho xauh sain das zis ma nghuot, ge.

³¹Housoeh las boekyis eh, yang gas jyeidwis nyih dah lo jens ma nghuot, nyicuk dah lo jens dvnghuot.