Read Achang GALATI 6 Bible Online

GALATI 6 - Achang bible

GALATI 6

¹Boekyis eh, dius dvyuk yuk masoh mathamh yaunos zangh kuot lyis, Dyos yah shwih yvmas kang dwis bang namoq gas housoeh teh soeu lhyi noeuh nhamp ehnyet yah soq dyei geh. Namoq eq shiwu zis ma xauh bas jungh vsainnyang zaih nyeis geh.

²Namoq nyang changh dah yvwons lyis bos wons wuq zis yah Khristu dah lyi lyis tyink nyeis geh.

³Dius dvyuk yuk gas yhaugyen dah dius gis ma bweh shih lyis yhaugyen soeu nghuot goeus ge khwank soeu ka nyang nyah gungs lyis mhuih jyomh goeus.

⁴Dius yuk khanghmuh nyah muhzoh lyis kyink bas jungh. Nyah muh gis joq nghuot lyis hauh yvlyis gohtoeu dvyuk yuk dah muh yah byi chank ma bos, nyang kuot muh mas nhaiqtap khwank chank bos das.

⁵Khasoeh ge lyis, yuk khanghmuh vsainnyang yvwons s wons wuq chah das zis nghuot.

⁶Hauh Khristu dah dang lyis xuq soeu ka, jyauh soeu lhyi vsainnyang yoh dah gis vyhang dvnganh gvm dyei nyeis bas jungh.

⁷Namoq gas vsainnyang gungs lyis mhuih las chowhang vwhang goh, Mangso lhyi ma phauh yoh kuot das zis ma nghuot. Dius gas nyang xoh zis yah dvyhangteh nyang xauh yhomh das.

⁸Dius dah gungsshoh ge dah tsoh mas xoh soeu ka shei ge dah dyoqbis jyo xauh yhomh das; Dyos ge dah tsoh mas xoh soeu ka vcaiq vto kang ge dah jyo xauh yhomh das.

⁹Housoeh las yang gis dah muh zwi das zis ma nyung ma daus nyeis goh: khasoeh ge lyis yang ma toh tyamp lyis gas shishenh jweh lyis yang xauh yhomh yoeus das.

¹⁰Housoeh yvmvyah yang shishenh yahge toeuh yoh zis yah dvyhangteh dius dvnganh lyis gis dah muh kuot nyeis goh, nghuot laus eq lomsjingh dah yhenbang lyis zes las kuot dyei goh.

¹¹Ngos namoq lyis ngah loq yah kha iq kuh dah sauhchvp lhaih toh zis lyis yoeuh geh.

¹²Namoq lyis vthyoh tsoengh tyomh nhang bang gas, nghe pheh dah vlho lhyi khwank xoeuq bang nghuot. Nghuot laus eq nyamoq housoeh kuot cho ka Khristu dah tapzains gvng mas shoeuhshih zis ma xauh das nyhenshang dvnghuot.

¹³Khasoeh ge lyis vthyoh tyomh bang nyang, hauh Lyi lyis chank tyink zis ma nghuot; nghuot laus eq nyamoq gas namoq vthyoh tyomh gvng mas khwank mes las namoq lyis vthyoh tyomh nhang zis nghuot.

¹⁴Ngos gas yah Yhensain Yesu Khristu dah tapzains mas lai las gohtoeu cha cho mha eq ma khwank: khasoeh ge lyis nyang tapzains mas taplhangh sat zis xauh yvmvyah mungkvn gas ngah xiklyis vshei nghuot las ngos eq mungkvn xiklyis vshei bweh goeus.

¹⁵Dvyuk yuk vthyoh tyomh laus, ma tyomh laus yhaugyen vpom ma nghuot. Gvnkhanh toh dah dius vsaiq bweh das zis dvyhaugyen.

¹⁶Haih wotwu vzwvng lyi yah kang dwis cho mha chank nyeis bang dvnganh thoq mas nyenstap zis yahge nhaiqnyen zis joq bas jungh. Houyah dvyhangteh Mangso dah dius nyau Israel jens thoq mas eq nghuot joq bas jungh.

¹⁷Gvshih masyah ngos lyis hank eq ma lhoeu yau lo bas jungh: khasoeh ge lyis Khristu gvng mas ngos kham dah dvm-yos kanghjyoeng ka ngah gungs mas dap joq.

¹⁸Boekyis eh, yah Yhensain Yesu Khristu dah jyehjuh gas namoq dyos yah dvgeh nyeis nyeis bas jungh. Amen.