Read Achang EPHESU 2 Bible Online

EPHESU 2 - Achang bible

EPHESU 2

¹Lai loh goeus yoq lyis namoq gas domsyos ma gyo cho yahge yaunos gvng mas dyos gas shei joq.

²Hauh shishenh lyis namoq gas hai mungkvn dah ma gis ma shop cho mha tsain suh e lha, maulat mas dah vmingh yoh soeu, sidyos dah domsyos tsain gyo. Hauh sidyos gas gvshih eq Mangso domsyos ma gyo dah lo jens mas muh kuot nyeis.

³Jyoengh yang dvnganh eq xikpheh nyamoq teh nghuot las, yah dah gungsshoh nyetnau cho chank zis yah, gungsshoh yahge ungkhau mha nghamh khyvlyis kuot tyink goeus. Yang eq gungsshoh khyvlyis yah gohyuk yah dvyhangteh Mangso dah nhaiqlom dyis zis xauh kham vvng bang nghuot.

⁴Nghuot laus eq Mangso ka nhaiqnyen ehnyet nyo las nyang yang lyis jyetdap ehnyet kuh joq las,

⁵yang domsyos ma gyo dah lyi lhyweq cho yaunos gvng mas dyos mas shei joq bang lyis Khristu mas kang doms dwis nhang goeus. Houka Mangso dah jyehjuh yah namoq khyuot yoeus zis xauh goeus.

⁶Yang gas Khristu yah dvdain dvlom bweh gvng mas Mangso ka yang lyis maukhung nyhang mha Yhensain yah dvgeh guon nyeis das xiklyis nyang yah dvgeh dwis toq nhang.

⁷Nyang heisoeh kuot cho ka Khristu Yesu mas yang lyis jyetdap ehnyet Chixoeuq yvmas Yhensain dah jyehjuh gas gohtseq kuhxing joq cho thang pheh vcaiq caiq dius jens yoh nyvng das xiklyis nghuot.

⁸Khasoeh ge lyis namoq gas lomsjingh gvng mas Mangso dah jyehjuh yah kyingh namoq khyuot yoeus zis xauh. Houka namoq yomkat las ma nghuot, Mangso dah jyehjuh jyungshuk dvnghuot.

⁹Namoq zwi khank dah muhzoh gvng mas ma nghuot, Mangso dah jyungshuk dvnghuot. Housoeh las hank eq khwank chank ma bos.

¹⁰Khasoeh ge lyis yang gas Mangso khasoeh gvnkhanh toh lyis housoeh nghuot joq. Khristu Yesu mas dvdain dvlom nghuot joq gvng mas, Mangso ka uhlhomh las cicont sont toh goeus, gis dah muh lyis kuot uhjyangh kang dwis das xiklyis yang lyis gvnkhanh toh goeus.

¹¹Khoeu los lyis yah gohnyau bang tsain nghuot las dius dah loq yah vsainnyang gungs mas kuot yoeus dah muh, vthyoh tyomh bang ge nyhink yoeus dah Yuda dius jens yah, Vthyoh ma tyomh bang, ge lui dah gohnyau bang eh, xikpheh namoq hank tsain nghuot yvlyis soh geh.

¹²Hauh shishenh lyis namoq gas Khristu yah gang joq bang, Mangso khyen yoeus dius nyau Israel jens mas ma bos dah lvbaus, nyah dius nyau lyis dyei toh thanghchvp yah sen dangthoengh mas ma bos bang nghuot las, mungkvn mas nghamhloms chank ma bos, Mangso eq ma yoh, nyeis dyos los dah dius jens nghuot lai los goeus.

¹³Nghuot laus eq gvshih gas Khristu Yesu mas dvdain dvlom nghuot goeus las xikpheh Mangso yah we joq laus eq Khristu shei kham gvng mas Mangso yah yoh ni los goeus.

¹⁴Khasoeh ge lyis Khristu gas Yuda vnyau yahge gohnyau bang lyis dvkoeuq kyingh bweh nhang zis yah namoq lyis nyenstap cho dyei goeus. Nyang gas nyah gungs lyis kyauh tyamp yvmas yang lyis vnyau khyvlyis khwih khyamh las jes khyvlyis nyeis nhang dah vkyo lhyi thyoq tyamp goeus.

¹⁵Nyang gas aiq nyau lyis nyang yah dvdain dvlom kuot las dius nyau saiq dvkoeuq bweh nhang das xiklyis Yuda lyi yah dvgeh tyingtoh lyi yahge chank chah lyi lyis thyuk tyamp goeus. Heisoeh khyvlyis nyenstap cho dyei goeus.

¹⁶Khristu gas tapzains mas shei kham zis yah nyamoq dah hoeng cho lhyi thyoq tyamp las hau aiq nyau lyis dvnyau kyingh kuot las Mangso jyank mas doms shwih loh dyei.

¹⁷Housoeh Mangso yah we joq dah namoq gohnyau bang lyis eq, Mangso yah ni nyeis dah Yuda dius jens lyis eq Khristu jweh los las hau nyenstap gausyis loeus taiq kyoh goeus.

¹⁸Gohnyau bang yahge Yuda dius jens nghuot dah yang dvnganh gas Khristu gvng mas hau Dyos dvkoeuq kyingh yah Uwus xikkhonh mas yoh wvng loh goeus.

¹⁹Housoeh yvmvyah gvshih gas namoq gohnyau bang, nghuot ya lvbaus yahge boenghwus ma nghuot lo. Namoq gas Mangso dah dius jens mas bos, mung dius jens nghuot las Mangso dah yhenbang nghuot.

²⁰Namoq eq lvgyo jens yahge lvpe jens xi toh yhen-yos mas yhen tsoq tsuk zis xauh goeus. Khristu gas hauh yhen thunk lukzains nyang nghuot.

²¹Nyang gas yhen dvkoeuq gonh lyis goeng goeng zwi toh las gyingshang zis yah Yhensain mha kyauh toh yhenmuh bweh los nhang goeus.

²²Namoq eq Khristu yah dvdain dvlom duot las gohyhamh bang dvnganh yah chomp tsuk zis kham yoeus las nyah Dyos gvng mas Mangso nyeis dah joqyos bweh los goeus.