Read Achang EPHESU 3 Bible Online

EPHESU 3 - Achang bible

EPHESU 3

¹Haih cho gvng mas Khristu Yesu dah thung lungh soeu ngos Paulo gas, namoq gohnyau bang xiklyis, Mangso jyank mas shvmanh dung dyei.

²Mangso ka nyah jyehjuh yah namoq xiklyis gis das cho nyhenshang haih muh kuot das zis ngos lyis dyei toh goeus yvlyis namoq jyoengh xauhgyo ku goeus.

³Mangso ka nyah dah noq thank nghamh toeuq cho ngos lyis chixoeuq goeus. Haih cho yah sen lha lyung khyvlyis lhaih kat ku goeus.

⁴Hauh zis namoq nghap ku lhyi Khristu yah sen lha ngos seqgyo hau noq thank cho lhyi namoq yoh xuq das.

⁵Lai loh goeus yoq lyis hai noq thank cho cangsoeu dius lyis ma taiq kyoh ku. Nghuot laus eq Mangso ka gvshih nyah gyingshang lvgyo jens yahge lvpe jens lyis Dyos masyah Chixoeuq.

⁶Hau noq thank cho ka gausyis dang gvng mas gohnyau bang gas Yuda dius jens yah dvgeh Mangso dah shvmanh jyehjuh xauh kham cho nghuot. Nyamoq gas dvgungs mas dah gungsdoeus tsain nghuot las Khristu gvng mas Mangso dyei dah dangthoengh dah vso vlho kham yoeus das toeuh tsain yoh.

⁷Mangso dyei dah lhyenwhei jyehjuh jyungshuk gvng mas hauh Gausyis dang dah jyeidwis ngos lyis duot nhang goeus. Hauh jyehjuh jyungshuk lyis Mangso dah yomsoq yah khanh dah muhzoh khyvlyis ngos lyis dyei toh goeus.

⁸Ngos gas Mangso dah dius jens mas ngis thank soeu thoq lyis yangh nyhen soeu nghuot laus eq Mangso ka Khristu dah mathank magons nyeisgis yaplhoq cho yah sen dah hau gausyis loeus lyis gohnyau bang jyank mas yoeus loh dyei das xiklyis eq,

⁹Mangso dah nghop toh dah nghamh toeuq cho khasoeh kuot thuq kat das cho dius dvnganh lyis nyvng, seq nhang das xiklyis eq Mangso ngos lyis hauh toeuh dyei toh. Dwis ya dwis yvlyis gvnkhanh toh dah Mangso ka nyah dah noq thank cho lhyi gohlhain caiq masyah nghop shung toh.

¹⁰Housoeh kuot zis gas guon dah loeuswons bang yahge maukhung mha yomsoq bos bang gas Mangso dah joeui vja ja lyis gvshih uhlyis phung dah kang dwis cho khyvlyis yah xuq las seq los nhang das xiklyis nghuot.

¹¹Mangso ka nyah dah vcaiq vto nghamh toeuq toh cho yah dvyhangteh haih yvlyis kuot goeus. Hau nghamh toeuq cho lhyi yah Yhensain Khristu Yesu gvng mas nyang yoh dye kuot goeus.

¹²Khristu yah dvdain dvlom yoh bweh gvng mas eq, nyang lyis lomsjingh gvng mas eq yang gas womh ehnyet yah Mangso xikkhonh mas nghamhnywe zis yah yoh wvng.

¹³Housoeh las ngos namoq xiklyis kham dah shanghsenh gvng mas namoq ehnyet ma dyet bas jungh oen shangphu. Houka namoq vkyuh xiklyis ngos kham cho nghuot.

¹⁴Haih cho gvng mas maukhung yahge nyeisjvng mas nyeis dah yhenbang khanghmuh lyis jyoeng dah nyings dyei dah,

¹⁵Uwus Mangso xikkhonh mas ngos dupaiq las shvmanh dung.

¹⁶Namoq dah ungkhau ehnyet yombos los bas jungh Mangso ka nyah phunk yah magons magoh zisyos masyah nyah Dyos khyvlyis yah namoq lyis yomsoq dyei bas jungh oen eq,

¹⁷lomsjingh gvng mas Khristu gas namoq dah nhaiqlom khau mha nyang nyeis joqyos kuot bas jungh oen zis yahge jyetdap ehnyet mas vnyet chent zis yah,

¹⁸namoq gas Khristu dah jyet cho kha iq dvm lha xing, kha iq nyhang lha noq joq yvlyis Mangso dah dius jens dvgeh yoh seqgyo das xiklyis dung.

¹⁹Nyah jyetdap cho lhyi ka khanhamp eq dvnganh yoh seq das zis ma nghuot. Namoq gas nyah jyetdap ehnyet seq los las Mangso nyang namoq mas nyeis bas jungh oen dung.

²⁰Yah ehnyet mas nyah yomsoq yah muh kuot nyeis. Yang seq dung, nghuot ya nghamh toeuq thoq lyis yangh zes shoq kuot dyei nyeis.

²¹Mangso ka hau phung gvng mas eq, Khristu Yesu gvng mas eq vcaiq vto vjangh phunk bos nyeis bas jungh. Amen.