Read Achang EPHESU 4 Bible Online

EPHESU 4 - Achang bible

EPHESU 4

¹Housoeh yvmvyah Yhensain lhyi phuqsoe gvng mas thung lungh soeu ngos Paulo gas namoq lyis khi yoeus masyah Mangso toeuq goeus kang dwis cho vpom yah dvyhangteh kang dwis das xiklyis ngos namoq lyis taiq kyingh kat.

²Vjangh ehnyet nyhen mha khyoq las noeuh nhamp zis yah jhen nyeis geh. Namoq nyang changh jhen zis yah jyetdap ehnyet Chixoeuq goh nyeis geh.

³Namoq lyis dvgeh twih xom dah nyenstap shvnanh khying gvng mas Dyos yah dyei toh dvdain dvlom xamxonh cho lhyi yomkat las tsomh toh geh.

⁴Namoq lyis Mangso khi yoeus cho mha nghamhloms zis dvkoeuq mas khi yoeus goeus zis yah dvyhangteh, dvgungs dvdyos,

⁵Yhensain dvyuk, lomsjingh cho dvkhvt, jeisnyhop kham cho dvkoeuq kyingh dvnghuot.

⁶Dius nyau dvnganh dah Uwus ge dah Mangso eq dvso kyingh dvnghuot. Nyang gas dvnganh dah Yhensain nghuot las dvnganh dah ungkhau mha muh khanh nyeis.

⁷Yang yuk khanghmuh gas Khristu dyei dah lhyenwhei jyehjuh jyungshuk lyis xauh kham yoeus.

⁸Lhaihtoh dang mas taiq zis yah dvyhangteh, Nyang gas svsoh nyhang yvmas doq loh lyis lhunk toh bang nyoshoq lyis nyang yah dvgeh shwih loh. Nyang gas dius nyau jens lyis jyungshuk dyei, ge.

⁹Doq loh ge zis cha lhyi ge, yhensain ka nyhen thank nyeisjvng dah nyhen tsank mas cangxeih gyoh loh goeus ge mes zis nghuot.

¹⁰Gyoh los soeu ka, dvnganh yvlyis nyah phunk nyoqnho yah tyink das nyhenshang nyhang thank maukhung mha doq loh soeu nyang nghuot.

¹¹Cangsoeu dius jens lyis jyehjuh jyungshuk dyei dah Yhensain eq nyang nghuot. Nyang gas dvyhamh lyis lvgyo jens, dvyhamh lyis lvpe jens, dvyhamh lyis gausyis dang taiq kyoh yenh bang, dvyhamh lyis phung yoeuh bang yahge jyauh bang tsain kuot nhang toh.

¹²Nyang housoeh kuot zis gas Khristu dah gungs lyis jebais los nhang das nyhenshang Mangso dius jens dvnganh lyis Khristan phuqsoe sasvna muh dyinghjet shoq sont dyei cho nghuot.

¹³Housoeh las yah lomsjingh cho gvng mas eq, Mangso dah Lo lyis seq cho gvng mas eq thang thank lyis yang nyeis ya nyeis bang gas dvkoeuq kyingh duot las Khristu dah nyhang thank dyinghjet dah gungs khyank vkant yah dvyhangteh nhaiqbos ung gying bang bweh los das.

¹⁴Hauh uhlyis yang gas seq mhuih khwangh dah dius jens yah vphanh vphuk taiq tangh dah jyauh cho khanghmuh mas vtauh vxoeu bos dang loh dah loshang jens teh ma nghuot lo das.

¹⁵Housoeh bweh das gungsthaiq jyetdap ehnyet yah jyoeng dang taiq las, yang gas cho khvt khanghmuh mas uhloms nghuot dah Khristu mas kuh bes los chah nyeis.

¹⁶Uhloms ge dah Yhensain shwih uhshe dah vkhau mha gungsdom dah gungsdoeus bos ya bos zis gas dvkoeuq yah dvkoeuq coq tsuk nyeis zis yahge yaunyoq changnyoq khanghmuh tsoq tsuk yomdyei nyeis gvng mas gungs gonh lyis dvdain dvlom yoh zwi toh. Housoeh las gungsdoeus khanghmuh vsainnyang yah sen dah muh khanh lyis gungs gonh lyis jyetdap zis yah kuhxing jebais los nhang.

¹⁷Nghamh cho vkyuh ma bos dah gohnyau bang teh tsoq las kang ma dwis das xiklyis Yhensain nyings mas ngos namoq lyis zaih nhang.

¹⁸Nyamoq dah seq cho soeng soeng noq zis yah koh las ehnyet than yvmvyah Mangso dyei dah kang vso mha ma bos bang nghuot.

¹⁹Nyamoq gas xoq gyuk ehnyet dvnganh chithyuk tyamp goeus yvmvyah nyetnau cho chank las, ma lhoq ma shang vchoqh vjyot muh vja ja lyis tomp toh cho ma bos shoq kuot das nyhenshang vsainnyang gungs lyis duon jens tyamp.

²⁰Namoq gas Khristu dah cho mha housoeh teh yvlyis xuq goeus zis ma nghuot.

²¹Namoq nyah cho lhyi jyoengh xauhgyo ku goeus zis yahge nyah thang chank bang nghuot las Yesu mas bos hau jyoeng cho lhyi namoq xuq goeus.

²²Housoeh las namoq gas xikpheh namoq chank ku dah kang dwis cho mha dah gungskhyank cauh lyis eq, pyo cho lhyi nyetnau las mhuih jyomh mes ehnyet gvng mas dyoqbis goeus dah gungskhyank cauh lyis eq tyamp geh.

²³Namoq dah ehnyet gungsdyos lyis vsaiq bweh nhang geh.

²⁴Vsaiq lyis wuot toh las hauh yvlyis dan zis yahge gyingshang ge, jyoeng dah kang dwis cho mha yoh chixoeuq das.

²⁵Housoeh las hwah dang vtaiq goh; yuk khanghmuh lomsjingh dah vsainnyang vmang vnoeuh lyis dang jyoeng taiq goh geh: khasoeh ge lyis, yang dvnganh gas Khristu ge dah gungs mas dah gungsdoeus tsain nghuot.

²⁶Namoq nhaiqyo lyis hau nhaiqyo dah ehnyet lyis yaunos vkuot nhang goh, buis wvng shoq eq nhaiq vyo goh.

²⁷Yius lyis joqyos vxwiq goh.

²⁸Khauh ku soeu ma doms khauh lo bas jungh: chah nyeis bang lyis yoh pangh shoq, gvm dyei shoq, vsainnyang xiklyis jyoeng dah womdau khoeu kang dwis cho yoh shoq muh zwi nyeis bas jungh.

²⁹Namoq dah nhuot masyah ma shop dah dang cha eq ma taiq bas jungh. Xauhgyo bang xiklyis vkyuh bweh shoq, chah nyeis zis yah dvyhangteh jebais los nhang dang kyingh taiq nyeis geh.

³⁰Hauh thoq lyis Gyingshang Dyos lyis nhaiq vkuk nhang goh: khasoeh ge lyis hau Gyingshang Dyos gas namoq lyis Mangso sain toh cho lhyi kanghjyoeng kyihau nghuot las thang thank buisnyeis lyis Mangso namoq lyis lhuiq kat zis xauh das cho lhyi kham toh cho dvkoeuq eq nghuot.

³¹Nhaiq gyeih, nhaiqlom dyis, nhaiq yo, dyoqgoh kaiq goh, ma phauh ma danh kuot, hoeng ehnyet vja ja yahge gohtoeu houyah doeusgoh cho dvnganh lyis shang tyamp geh.

³²Namoq nyang changh nhaiqnyen goh, gis dah ehnyet chixoeuq goh las, Mangso ka Khristu mas namoq dah yobos khyuot dyei goeus zis yah dvyhangteh, namoq eq dvyuk yah dvyuk yobos khyuot dyei goh nyeis geh.