Read Achang EPHESU 5 Bible Online

EPHESU 5 - Achang bible

EPHESU 5

¹Namoq gas Mangso dah jyetdap lo jens nghuot goeus yvmvyah nyang yah doeus los shoq yomkat chah das.

²Khristu gas yang lyis jyetdap las yah xiklyis nyah gungs lyis Mangso nhaiqdoeus dah xangh shom phudyei vyhang kuot las lomhxangh lainh zis yah dvyhangteh, namoq eq jyetdap ehnyet yah shwih dah vkhau mha suh e nyeis geh.

³Namoq Mangso dah dius nyau jens nghuot joq yvmvyah yauxi cho, ma lhoq ma shang zis dvnganh, nyoqnoq obos zis yah sen dah cho lhyi namoq mas dang yah yangh ma nyhink bas jungh.

⁴Ma lhoq khonhchoqh, vwot v-oeu dang, ma yungh dang, zeh dang eq ma taiq taiq, nhaiqshoqlang Chungh Dang sang nyeis bas jungh.

⁵Yau kuot soeu, ma daq xoq gungs ma shung soeu, nyoqnoq obos soeu hank eq Khristu yahge Mangso munghdan dah vso vlho lhyi ma xauh zom zis gas namoq nyang top seq toh. Khasoeh ge lyis nyoqnoq obos cho ka silho paiq cho dvja nghuot.

⁶Hank laus eq yhung pvjus dang yah namoq lyis vmhuih jyomh nhang goh: khasoeh ge lyis hauh cho gvng mas Mangso dah nhaiqlom dyis zis gas domsyos ma gyo bang thoq mas jweh los das.

⁷Housoeh yvmvyah namoq housoeh teh bang yah dvtsiq eq vbos zomh goh.

⁸Xikpheh namoq eq soeng soeng noq yvmas nyeis lai loh goeus. Nghuot laus eq, gvshih gas Yhensain dius jens duot los goeus las bvng yvmas jweh joq goeus. Housoeh yvmvyah namoq gas bvng dah lo jens teh suh e nyeis geh.

⁹Khasoeh ge lyis hau bvng zis gas gis cho vja ja, dan cho yahge jyoeng cho lhyi bweh los nhang.

¹⁰Yhensain nhaiqdoeus zis cha nghuot yvlyis tungh xuq geh.

¹¹Chuot yvmas suh e bang kuot, vkyuh ma bos chuot cho yah sen dah muhzoh cha eq ma chank kuot, hauh muh jens lyis bvng yvmas chixoeuq nyeis geh.

¹²Khasoeh ge lyis nyamoq gauh kuot muh gas taiq das zis yangh vxoq vcaiq nghuot.

¹³Hauh cho bos ya bos zis lyis bvng yvmas chixoeuq kat lyis nyamoq dah soengh choenk wotwu gas dede thuq los.

¹⁴Khasoeh ge lyis joq ya joq yvlyis dede thuq los nhang nyeis. Housoeh las nyang taiq zis gas, Yhet pyo soeu eh, toq aq, shei masyah dwis toq los aq. Khristu nvng lyis bvng zis pank dyei das, ge.

¹⁵Housoeh las namoq khasoeh kang dwis nyeis zis gas vlhomuh zaih nyeis geh. Koh bang teh ma nghuot, joeui bos bang teh kang dwis geh.

¹⁶Gvshih dah buisnyeis shishenh gas ma shop joq yvmvyah namoq yoh dah toeuh dvnganh yvlyis vkyuh bos das khyvlyis yhung geh.

¹⁷Housoeh las koh bang vbweh goh; Yhensain o dah cho cha nghuot zis gas seqgyo geh.

¹⁸Yhei vyet goh, houka nvng lyis dyoqbis nhang das. Dyos yah dyingh joq geh.

¹⁹Namoq nyang changh chungh dah lvkhyank dang, Dyos dah lomsjingh cho yah sen dah Chungh Dang yah jis goh las namoq dah ungkhau ehnyet mas Mangso lhyi chunghthwe kat las chungh nyeis geh.

²⁰Yah Yhensain Yesu Khristu dah nyings yoeus las cho khvt khanghmuh xiklyis, Uwus Mangso dah jyehjuh lyis vjangh nhaiqshoqlang sang geh.

²¹Khristu lyis gyukwoms dah ehnyet yah namoq nyang changh nyang o mha gyoh nyeis geh.

²²Yhensain nyhiq jens eh, namoq gas Yhensain dah guon cho lhyi kham yoeus zis yah dvyhangteh yhensain phoq jens dah guon cho lhyi kham yoeus geh.

²³Khristu gas phung dah uhloms duot das toeuh yoh teh, yhensain phoq eq yhensain nyhiq dah thoq mas uhloms duot das toeuh yoh. Khristu nyang nyah gungs nghuot dah hauh phung lhyi khyuot yoeus soeu eq nghuot.

²⁴Phung ka Khristu dah guon cho lhyi kham zis yah dvyhangteh yhensain nyhiq jens eq cho khat khanghmuh mas yhensain phoq dah guon yvlyis kham yoeus das.

²⁵Yhensain phoq jens eh, Khristu gas hau phung lhyi jyetdap las, hauh xiklyis nyah gungs kyauh tyamp zis yah dvyhangteh, namoq dah yhensain nyhiq jens lyis jyetdap nyeis geh.

²⁶Yhensain nyah kang lhyi kyauh tyamp cho ka, hauh phung lhyi jeis yah cheihshang lha nyah Dang yah Mangso lhyi phudyei zis yah,

²⁷Hauh phung lhyi nyah gungs xiklyis kyauh uhlyis nyang mas mesyos, vnyhung teh zis cha eq ma bos bos, gyingshang zis yahge tswi ma bos, phunk bos, yungh thank das xiklyis nghuot.

²⁸Housoeh las yhensain phoq jens gas vsainnyang gungs lyis jyetdap nyeis teh, vsainnyang dah yhensain nyhiq jens lyis jyetdap chah. Vsainnyang yhensain nyhiq lyis jyetdap soeu ka nyah gungs lyis nyang jyetdap.

²⁹Khasoeh ge lyis yang hank laus eq vsainnyang gungs lyis hoeng zis ma bos. Hauh gungsthaiq Khristu gas hauh phung lhyi khoeu tsoh yoeuh gomh teh yang gas hau gungs lyis khoeu tsoh yoeuh gomh nyeis goh.

³⁰Khasoeh ge lyis yang gas nyah gungsdom dah gungsdoeus jens tsain nghuot.

³¹Lhaihtoh dang mas, Haih gvng mas vbusbih gas, nyah ungwes uwus lyis toh khoq las, nyah yhensain nyhiq yah xonh zis yah nyah zomh gas dvsuih dvshoh bweh das, ge bos.

³²Haih cho ka lhaihtoh dang mas Chixoeuq, noq thank jyoeng cho dvkoeuq nghuot las. Khristu yahge phung lhyi toeuq las taiq zis nghuot oen ngos seqgyo.

³³Nghuot laus eq houka namoq yah eq sen joq. Yhensain phoq khanghmuh gas nyah yhensain nyhiq lyis yoh jyetdap das las yhensain nyhiq khanghmuh eq nyah yhensain phoq lyis yoh phauh nyang das.