Read Achang EPHESU 6 Bible Online

EPHESU 6 - Achang bible

EPHESU 6

¹Loshang jens eh, namoq nyhiphoq dah domsyos gyo nyeis geh. Housoeh kuot zis gas Khristan jens kuot chah dah jus cho nghuot.

²Lhaihtoh dang mas, Nah ungwes uwus lyis phauh nyang geh, housoeh lyis nvng nyeisgis yaplhoq las nyeisjvng thoq mas kang xing zis yah xauh nyeis das, ge. Housoeh taiq toh dang gas dangthoengh mas bos cangxeih dah tyingtoh dang nghuot.

⁴Namoq nyhiphoq jens eh, namoq dah lo jens lyis nhaiqyo das khyvlyis vkuot goh. Housoeh kuot das gungsthaiq nyamoq lyis Yhensain dah nyho jyauh cho yahge cho shet yvmas nyhoeu tsoh nyeis geh.

⁵Jons jens eh, namoq Khristu lyis phuqsoe nyeis teh namoq dah cangsoeu yhensain jens lyis gyukwoms zis yah ehnyet dan khyvlyis domsyos gyo nyeis geh.

⁶Yhensain jens yoeuh nyeis lyis nyoqnho yoh mes las kuot zis kyingh ma nghuot, Khristu dah jons jens teh Mangso ehnyet o cho lhyi nhaiqlom dvnganh yah kuot nyeis geh.

⁷Dius lyis phuqsoe teh kyingh ma nghuot, hauh Yhensain lhyi phuqsoe teh mes dah ehnyet yah namoq dah jons muh lyis zwi nyeis geh.

⁸Jons lyis laus eq, luiq soeu lhyi laus eq, Mangso ka nyang yuk nyang toeu lhyi nyang kuot dah gis muhzoh xiklyis tauh dyei das zis seq nyeis geh.

⁹Yhensain jens eh, namoq eq houyah dvyhangteh namoq dah jons jens thoq mas chank kuot nyeis geh. Nyamoq lyis kyuk tant cho no toh geh. Namoq yahge namoq dah jons jens gas maukhung mha Yhensain dvyuk yah kyingh sen bang nghuot las hauh Yhensain ka dvyuk yah dvyuk lyis nyoqnho ma khyen soetuon soeu nghuot yvlyis soh nyeis geh.

¹⁰Thang thank lyis, Yhensain yah dvkoeuq kyingh nghuot khyvlyis eq, nyah yomzains yomsoq yah eq, namoq yomhuont nyeis geh.

¹¹Yius dah khaujeini zis lyis namoq yoh toeu nghank tyamp bas jungh, Mangso namoq lyis dyei toh dah jesgungs dvnganh zis lyis wuot toh geh.

¹²Khasoeh ge lyis yang gas dius yah zan goh zis ma nghuot, maukhung nyhang mha nyeis ma shop dah yius jens yah eq, haih mauchuotdwang dah mungkvn lyis guon dah zau jens, vmingh bos bang yah dvtsain zan goh nyeis.

¹³Housoeh yvmvyah, Mangso dah jesgungs dvnganh yvlyis gvshih nyang wuot toh geh. Housoeh lyis ma shop zis yahge yaukyenh buisnyeis jweh lyis namoq gas jeswus dah zan cho lhyi yoh thoenk zan shuq tyamp das. Thang thank jweh shoq dye zan lyis eq, namoq goeng goeng yoh yap das.

¹⁴Housoeh las namoq thyikdom lyis jyoeng cho ge dah dyichih chih las dan zis lyis sainhkhonh nghop teh gos lho lha,

¹⁵nyenstap gausyis dang taiq kyoh das zis cicont nghuot joq bas jungh, khyei mha thyvkoq koq las thoenk yap joq geh.

¹⁶Hauh thoq lyis lomsjingh ge dah gos lyis vjangh chi toh geh. Khasoeh ge lyis namoq gas hauh gos yah ma shop soeu baiq kat dah nyi shamshih dvnganh lyis yoh sat das.

¹⁷Tsai, Khyuot yoeus cho ge dah uhkyop lyis kyop las, hau Dyos yah dyei dah Mangso dang ge moengsa lhyi wons toh geh.

¹⁸Mangso jyank masyah pangh cho yoh bas jungh khyoeuq zis yah shvmanh dung yvmas haih cho dvnganh kuot nyeis geh. Haih cho gvng mas phuksohlhaiq mus nyeis geh. Khanhamp eq yom vshwe, Mangso dah dius jens xiklyis vjangh vkyuh dung nyeis geh.

¹⁹Ngos dang taiq das xiklyis cicont nghuot shishenh lyis Mangso ngos lyis dang dyei bas jungh, hau gausyis dang dah noq thank vjyuk lyis ma gyuk ma woms, womh womh yoh taiq shoq, ngah xiklyis eq vkyuh bos dung nyeis geh.

²⁰Gvshih ngos thung lungh soeu nghuot joq laus eq hau gausyis dang gvng mas lvgyo dvyuk nghuot joq. Hau gausyis dang taiq kyoh das xiklyis ngos yvwons yoh zis yah dvyhangteh womh womh yoh taiq bas jungh shvmanh bos dung geh.

²¹Namoq ngos khasoeh nghuot nyeis dah loeus jyuk yang yoh seq shoq, Yhensain dah muh mas lomluk kank kat nyeis, yah jyetdap boekyis Tichiku taiq kyoh das.

²²Housoeh las yang dvnganh khasoeh bweh nyeis cho loeus dvnganh namoq lyis taiq kyoh bas jungh zis yahge, namoq lyis pangh, yomdyei das nyhenshang ngos nyang lyis namoq jyank mas nhang kat.

²³Uwus Mangso yahge Yhensain Yesu Khristu gas Khristan boekyis dvnganhmoq lyis nyenstap, jyetdap zis yahge, lomsjingh cho dyei bas jungh.

²⁴Mathank magons jyetdap ehnyet yah, yah Yhensain Yesu Khristu lyis jyetdap nyeis bang dvnganhmoq mas jyehjuh joq bas jungh.