Read Achang PHILIPI 1 Bible Online

PHILIPI 1 - Achang bible

PHILIPI 1

¹Khristu Yesu dah jyeidwis Paulo yahge Timothi gas Philipi wus mas nyeis dah phung uhshe bang phung thuk jens yah dvgeh Khristu Yesu mas dvkoeuq nghuot dah Mangso gyingshang bang dvnganhmoq jyank mas maussauh lhaih kat.

²Yah Uwus Mangso yahge Yhensain Yesu Khristu jyank masyah jyehjuh yahge nyenstap zis gas namoq mas joq bas jungh.

³Ngos namoq dah cho nghamh yoeuh soh khanghmuh ngah Mangso lhyi nhaiqshoqlang sang.

⁴Ngos namoq nyhenshang shvmanh dung khanghmuh gausyis zis yah dung.

⁵Khasoeh ge lyis Yhensain dah muh wons wuq xi buisnyeis masyah gvshih jweh shoq gausyis dang taiq kyoh cho mha ngos lyis pangh thuk lai loh goeus.

⁶Housoeh las namoq mas hai gis dah muh kuot xi toh dyei soeu Mangso ka, Khristu Yesu dah buisnyeis lyis hauh muh lyis yoh dye shoq tsoq wons wuq loh das zis nghuot yvlyis ngos soh soh nghuot.

⁷Ngos namoq lyis nghamh twih toh ehnyet bos das zis gas doeus: khasoeh ge lyis namoq gas vjangh ngah nhaiq mas bos bang nghuot. Gvshih ngos thung lungh nyeis shishenh lyis eq hau gausyis dang lyis kyoq toh cho ma bos khomp khyoq, taiq kyoh zis yah jyauh las yoh goeng toenk nhang shishenh lyis eq, namoq dvnganhmoq gas ngos yah dvgeh Mangso dyei dah jyehjuh toeuh lyis chomp kham yoeus goeus bang nghuot.

⁸Ngos gas Khristu Yesu nyang dah ehnyet mas bos dah jyetdap sainhnos ehnyet yah namoq lyis soh nyeis, oen ngos taiq dang jyoeng zis gas Mangso ngah kanghjyoeng nghuot.

⁹Hauh thoq lyis namoq gas gis yvlyis seq khyen yoeus, jyoeng dah seq cho yahge dyinghjet dah joeui yah dvgeh namoq dah jyetdap ehnyet mas zes kuhxing los bas jungh ngos shvmanh dung dyei.

¹⁰Hauh uhlyis namoq gas gis thank yvlyis seq khyen yoeus las Khristu doms jweh dah buisnyeis lyis ma lhoq ma shang vwot v-oeu cho dvnganh masyah luiq zis yah yobos ma bos bang bweh das.

¹¹Hauh thoq lyis Mangso dah phunk bvng los das zis yahge nyah nyoqnho ngelang lyis dius jens chungh bas jungh, Yesu Khristu kyingh vshih yoh shih nhang, gis thank dan dah vshih gas namoq kang dwis cho mha dyinghjet los das.

¹²Boekyis eh, ngos mas bweh cho ka, gausyis dang jebais los das cho mha jyoengh pangh thuk das nyhenshang bweh los cho ngos namoq lyis seq nhang mes.

¹³Hau hwankti yhen lhyi zungh bang dvnganh yahge gohtoeu heimha nyeis bang dvnganh gas ngos thung lungh cho ka Khristu dah jyeidwis duot yvmvyah nghuot cho tsain seq goeus.

¹⁴Hauh thoq lyis ngos thung lungh gvng mas boekyis nyothyang ka Yhensain mha lomsjingh ehnyet zes yombos los las Mangso dah Dang lyis ma gyuk ma woms taiq kyoh das zis zes womh los.

¹⁵Jyoengh nyamoq mas dvyhamh gas noh las zan goh mes ehnyet yah Khristu cho taiq kyoh. Nghuot laus eq dvyhamh gas omes ehnyet gis bos zis yah taiq kyoh.

¹⁶Ngos gas Gausyis dang lyis khomp dah muh mas toeuq toh soeu nghuot yvlyis nyamoq seq nyeis yvmvyah jyetdap ehnyet yah taiq kyoh.

¹⁷Gohtoeu dvyhamh gas lhoqshang ehnyet yah ma nghuot, vsainnyang vkyuh dvxo ehnyet yah taiq kyoh. Nyamoq gas ngos thung lungh nyeis yoq lyis ngah thoq mas yaukyenh cho je los shoq kuot das ge tsain nghamh.

¹⁸Taiq kyoh dah vkhyoh gas ma yhaugyen. Vguons kuot laus eq, jyoeng ehnyet yah laus eq, gis bweh cho khanghmuh mas Khristu cho yoh taiq kyoh goeus yvmvyah hauh cho mha ngos gauslaus nyeis, jyoengh tsoq gauslaus nyeis shih das.

¹⁹Khasoeh ge lyis namoq dah shvmanh dung dang gvng mas eq, Yesu Khristu dah Dyos ngos lyis pangh gvng mas eq ngos hai thung lungh masyah luiq los das.

²⁰Ngos gas khanhamp eq ngah yvwons lyis ma katkhyoq, shishenh khanghmuh mas laus eq, zes las gvshih laus eq lyes dah kank bos cho dyingh zis yah ngos shei lhyi yangh lyis ngah kang dwis cho gonh mas Khristu dah phunk bvng nhang das zis gas ngos nhaiqdoeus thank cho yahge nghamhloms cho nghuot.

²¹Khasoeh ge lyis ngos kang dwis zis gas Khristu nyang nghuot, shei loh lyis eq vmyat nghuot.

²²Nghuot laus eq ngah gungsshoh mas kang dwis nyeis lyis vkyuh bos dah muh zes yoh zwi lyis gas, kang dwis cho yahge shei cho khah zis khyen yoeus chah zis ngos ma seq.

²³Ngos gas aiq shot yah lang zis xauh nyeis. Ngos gas gvshih dwis nyeis dah kang dwis cho lhyi toh las Khristu yah dvgeh kang dwis mes nyeis. Houka ngah xiklyis zes gis joq.

²⁴Nghuot laus eq namoq xiklyis ngos kang dwis nyeis das zis gas namoq xiklyis zes yhaugyen.

²⁵Ngos haih cho lhyi vlhomuh seqgyo yvmvyah ngos namoq yah dvgeh nyeis das. Namoq lyis zes jebais los nhang das zis yahge lomsjingh cho mha yoh gausyis das nyhenshang ngos namoq dvgeh tsoq las nyeis das yvlyis ngos seq.

²⁶Housoeh las ngos namoq jyank mas doms jweh uhlyis ngah gvng mas namoq gas Khristu Yesu mas zes yoh khwank das.

²⁷Gvshih namoq xiklyis yhaugyen thank zis gas, Khristu Yesu dah gausyis dang yah chank kuot nhang zis yah dvyhangteh kang dwis nyeis das cho nghuot. Housoeh lyis ngos namoq jyank mas jweh los laus eq, ma jweh laus eq, namoq gas Dyos dah nghamh toeuq cho dvkoeuq kyingh yah thoenk yap joq las, ehnyet o zis dvja kyingh yah gausyis loeus dah lomsjingh cho dah xiklyis dvgeh chomp zan nyeis yvlyis ngos xauhgyo.

²⁸Hauh thoq lyis namoq gas jes jens lyis vgyuk nyeis goh, vjangh womh ehnyet bos geh. Hauh zis gas nyamoq shoeuh las namoq ung das kanghjyoeng vlho duot das. Khasoeh ge lyis namoq lyis ung cho dyei zis gas Mangso nyang nghuot.

²⁹Khasoeh ge lyis namoq gas Khristu lyis lomsjingh khyvlyis yah kyingh ma nghuot, nyah xiklyis shanghsenh kham khyvlyis eq Yhensain dah muh lyis wons wuq das toeuh jyehjuh xauh yoeus goeus.

³⁰Gvshih namoq gas ngos yah dvgeh jeszan yvmas xauh wvng goeus. Houka xikpheh ngos zan cho lhyi namoq nyvng goeus. Gvshih eq ngos zan nyeis shih yvlyis namoq xauhgyo dah zan cho nyang nghuot.