Read Achang PHILIPI 2 Bible Online

PHILIPI 2 - Achang bible

PHILIPI 2

¹Namoq gas Khristu yah dvgeh kang dwis gvng mas yombos los goeus zis yahge nyah jyetdap ehnyet gas namoq lyis nhaiqtaink dyei goeus. Hauh thoq lyis Dyos dah zomh cho yoh las nyang changh nyang jyetdap sainhnos cho xauh kham yoeus nyeis.

²Housoeh las namoq gas xamxonh cho dvkoeuq, jyetdap ehnyet dvlom, ehnyet dvkoeuq kyingh nghuot khyvlyis ngos lyis nhaiq dainh shoq gausyis nhang geh oen ngos namoq lyis yomdyei.

³Khwank mes ehnyet, vsainnyang vkyuh dvxo ehnyet yah cha eq vkuot goh. Dius gohyuk gas vsainnyang thoq lyis zes gis oen vjangh nghamh yoeus las, nyang changh nyang nhaiqlom nyhen mha gyoh nyeis geh.

⁴Dius yuk khanghmuh vsainnyang yah sen yvlyis kyingh ma nghuot, nyang changh nyang sen yvlyis eq nghamh yoeuh bas jungh.

⁵Khristu Yesu mas bos dah ehnyet nyang, namoq mas eq bos joq bas jungh.

⁶Nyang gas, khanhamp eq soengh choenk Mangso nyang nghuot joq laus eq, Mangso yah dvyih nghuot joq das xiklyis lhuot yoeus das ge ma nghamh.

⁷Hauh gungsthaiq nyah ehnyet bauh zis yah dvyhangteh nyang yoh zis dvnganh lyis toh las, jons gungs tsungh zis yah cangsoeu dius dah vwot yah thuq los goeus.

⁸Heisoeh nyah gungs o mha gyoh las shei shoq domsyos gyo. Nyang jyoengh nyang tapzains mas shei shoq domsyos gyo goeus.

⁹Housoeh yvmvyah Mangso ka Nyang lyis nyhang thank khyvlyis chunghtoq las nyings dvnganh thoq mas dah nyings dyei.

¹⁰Housoeh las nyhang thank maukhung, nyeisjvng thoq yahge nyeisjvng khau mha bang dvnganhmoq Yesu nyings lyis phauh nyang chungh paiq das.

¹¹Yesu Khristu gas Yhensain nghuot ge dvnganh gas Uwus Mangso dah phunk xiklyis taiq hoeuh das.

¹²Housoeh las ngos jyet kang bang eh, namoq ngos yah dvgeh nyeis yoq lyis namoq vjangh ngah domsyos gyo teh, gvshih namoq yah we nyeis yoq lyis ngah domsyos gyo das zis gas, zes yhaugyen joq. Housoeh las namoq dah khyuot yoeus cho lhyi dyinghjet shoq xauh yoeus bas jungh Mangso ka namoq mas khanh dyei nyeis.

¹³Khasoeh ge lyis Mangso ka nyah ehnyet o dah cho lhyi kuot mes ehnyet yah yoh kuot das nyhenshang Mangso ka namoq mas muh kuot nyeis.

¹⁴Namoq kuot chah dah cho khvt khanghmuh mas lop las phyen-goh cho ma bos bos kuot geh.

¹⁵Housoeh lyis namoq gas wotwu dyoq las yobos yoh bang nyeis dah haih mungkvn mas tswi ma bos ehnyet lhoqshang dah Mangso lo jens teh bweh los das. Housoeh namoq gas kang dwis nhang dah dang lyis taiq kyoh nyeis zis yah maukhung gonh lyis pank dyei dah bvng zis teh nyamoq mas yoh bvng joq das.

¹⁶Namoq housoeh kuot lyis gas ngos yomkat las wons wuq cho khanghmuh gas vkom ma nghuot yvmvyah Yhensain Yesu jweh buisnyeis lyis ngos khwank chank bos das.

¹⁷Ngos sat xauh lyis, houka namoq dah Mangso lhyi phudyei namoq dah lomsjingh lomhxangh phon thoq mas ngah kang lhyi shukphoh jyungshuk khyvlyis huot khyoq laus eq ngos gauslaus nyeis. Ngos yah dvgeh namoq lyis eq gaus nhang mes.

¹⁸Houyah dvyhangteh namoq eq gaus nyeis geh, ngos lyis eq namoq yah dvgeh bos gauslaus nhang geh.

¹⁹Ngos namoq jyank masyah loeus xauhgyo las yom yoh bas jungh, Mangso o cho nghuot lyis gas Timothi lyis namoq jyank mas ma nyangh lyis yoh nhang kat das oen ngos nghamhloms nyeis.

²⁰Timothi kyingh ngos yah ehnyet doeusgoh las namoq dah cho nyang teh bos nghamh chiqh dyei soeu gohtoeu hank ma nyeis lo.

²¹Gohyhamh bang dvnganh gas nyamoq yah sen zis kyingh dvtsain chiqh: Khristu Yesu yah sen cho mha nhaiq ma tsain wvng.

²²Nyang gas, lo gas uwus lyis thuk teh, gausyis dang tyo cho mha ngos yah dvgeh muh yomkat wons wuq nyeis yvmvyah, nyang kha iq phauhdap dius nghuot yvlyis namoq nyang seq.

²³Housoeh las ngah cho khasoeh bweh los das zis ngos seq yah dvyih, ngos nyang lyis namoq jyank mas nang kat das oen nghamhloms nyeis.

²⁴Hauh thoq lyis kha nyhank madot lyis ngos nyang namoq jyank mas los jweh das oen Yhensain mha loms toh.

²⁵Tsai, namoq dah vmang vnoeuh, zainsthuk thuk soeu, jeszan loeuzomh, ngos lyis pangh das xiklyis namoq nhang kat las, chah oen zis ma bos lo shoq ngos lyis phuqsoe soeu Epaphrodi lyis namoq jyank mas doms nhang kat chah oen nghamh.

²⁶Nyang gas namoq dvnganhmoq yah xauhgoh mes zis hwangh nyeis. Khasoeh ge lyis nyang nos yvlyis namoq xauhgyo goeus las nyang ehnyet svsoh ma nyens mus nyeis.

²⁷Nyang jyoengh vluk shei shoq nos goeus. Nghuot laus eq Mangso nyang lyis nhaiqnyen nyeis; nyang lyis kyingh ma nghuot, ngos gas kuk cho dvtsank thang lhyi dvtsank ma xauh bas jungh ge ngos lyis eq nhaiqnyen.

²⁸Housoeh las namoq nyang yah doms xauhgoh las namoq yoh gauslaus bas jungh zis yahge ngah dah kuk cho eq dyuk loh bas jungh oen, ngos nyang lyis namoq jyank mas nhang kat das zis zes omes nyeis.

²⁹Housoeh las namoq nyang lyis Khristan vmang vnoeuh dvyuk lyis teh lhom yoeus las, housoeh teh bang lyis phauh nyang geh.

³⁰Khasoeh ge lyis nyang gas namoq nyang ma yoh dyei dah pangh cho ngos lyis yoh dyei das xiklyis kang dyei las Khristu dah muh lyis vluk shei shoq wons wuq goeus.