Read Achang PHILIPI 3 Bible Online

PHILIPI 3 - Achang bible

PHILIPI 3

¹Boekyis eh, dang thang sau lhyi ka Yhensain mha dvdain dvlom yoh bweh cho lhyi gaus nyeis geh. Xikpheh ngos namoq lyis lhaih kat ku cho lhyi doms lhaih kat kat kuot das zis ngos yvwons ma lyei thoq lyis magoh, namoq lyis sam cho yoh nhang.

²Ma gis ma shop dah muh kuot bang lyis zungh yoeuh nyeis geh, lvkhuih jens lyis zaih geh. Vsainnyang gungs lyis lhyamh thyet bang lyis zungh yoeuh nyeis geh.

³Vthyoh tyomh cho gyingh lyis kham yoeus bang gas nyamoq ma nghuot, yang dvnghuot. Khasoeh ge lyis yang gas Mangso lhyi nyah Dyos yah paiq las Khristu Yesu mas dvdain dvlom yoh bweh dah kang dwis cho mha khwank bang nghuot. Yang gas nghe pheh vlho kuot xoeuq dah pwe mas ma nges.

⁴Jyoengh oen lhyi nghe pheh vlho lhyi nges das cho ngos yoh ku. Nghe pheh vlho lhyi nges das cho yoh ge dvyuk yuk nghamh lyis gas ngos zes yoh.

⁵Ngos gas xet nyeih lyis vthyoh tyomh kham goeus. Israel vnyau mas dah Benyamin vkoq yahge, Hebre jens mas Hebre suih gyingh nghuot. Yuda jens dah lyi chank khyv pheh yoeuh lyis eq ngos Pharishe nghuot.

⁶Nhaiq wvng yomkat cho yah sen lha taiq lyis ngos gas phung lhyi shoeuhshih soeu nghuot. Dan cho yoh das nyhenshang lyi chank tyink yvmas ngos chah yobos ma bos.

⁷Nghuot laus eq ngah xiklyis vmyat nghuot ge las yoh taiq dah vyhang dvnganh gas gvshih Khristu gvng mas somh tyamp vyhang tsain nghuot oen ngos nghamh.

⁸Hauh thoq lyis ngah Yhensain Khristu Yesu lyis yoh seq yoeus dah seq cho ka cho khvt khanghmuh mas zes las, vcaiq vto phauhdap joq yvmvyah hauh nyhenshang vyhang dvnganh yvlyis somh loh goeus khyvlyis ngos suon yoeus. Ngos gas nyah xiklyis vyhang dvnganh tyamp goeus. Khristu ge dah vmyat lyis xauh yoeus das nyhenshang yahge Khristu yah dvdain dvlom yoh bweh das xiklyis joq ya joq yvlyis jenh boms teh nghamh goeus.

⁹Ngos gas lyi chank tyink zis yah ngah dan cho lhyi ma yoh. Gvshih gas Khristu lyis lomsjingh gvng mas dyei dah dan cho lhyi ngos yoh. Houka lomsjingh gvng mas Mangso nhaiqnyen las dyei dah jyehjuh jyungshuk nghuot.

¹⁰Ngos gas Khristu lyis seq das cho, nyah dah dwis toq dah yomsoq lyis xauh nyvng xauh kham das cho, nyang yah dvgeh shanghsenh zis kham lha nyang shei kham teh shei kham das yvlyis kyingh ngos o nyeis.

¹¹Housoeh ngos gas shei bang dwis toq das cho mha xauh bos das oen nghamhloms nyeis.

¹²Ngos gas gvshih yangh hauh jyungshuk xauh yoeus goeus oen eq, gvshih dyinghjet joq goeus oen eq taiq mes zis ma nghuot. Nghuot laus eq Khristu Yesu gas ung zis yah ngos lyis nyah dius bweh nhang goeus zis yah dvyhangteh ngos gas hauh jyungshuk lyis xauh yoeus shoq tsoq las yomkat nyeis.

¹³Boekyis eh, ngos gas hauh jyungshuk lyis xauh yoeus goeus oen jyoengh ma nghamh. Nghuot laus eq ngos kuot cho dvkoeuq gas ngah nungsthank pheh vyhang dvnganh lyis tohnyhik las xikkhonh mas joq vyhang lhyi yoh nyhi bas jungh yomsoq dvnganh yah yomkat nyeis.

¹⁴Housoeh yvmvyah ngos gas hauh jyungshuk lyis xauh yoeus das xiklyis toeuqkhom jweh shoq wuih. Hauh jyungshuk gas nyhang mha kang yoh dwis bas jungh Khristu gvng mas Mangso dah lhung kat cho nghuot.

¹⁵Dyos cho mha nhaiqbos ung gying los goeus bang yang dvnganh gas, heisoeh teh ehnyet yah nghamh chah. Nghuot laus eq namoq dvyhamh mas shaih dah nghamh cho bos nghuot lyis, Mangso ka hauh zis namoq lyis chixoeuq das.

¹⁶Khasoeh nghuot laus eq yang gas khvnyhik jweh shoq chank nyeis dah nghamh cho yah dvyhangteh xik pheh tsoq las suh loh goh.

¹⁷Boekyis eh, namoq dvnganh gas ngah jyank masyah yikhyoh yoeuh yoeus nyeis geh. Ngamoq Chixoeuq goeus dah yikhyoh gis chank nyeis bang lyis yoeuh comh toh geh.

¹⁸Haih cho xikpheh ngos namoq lyis nyoshoq lhain taiq kyoh ku goeus. Gvshih eq ngos namoq lyis nyoqdyeis yah puk taiq kyoh nyeis. Khristu tapzains mas shei kham cho lhyi jes kuot las kang dwis bang nyoshoq nyeis.

¹⁹Hauh bang gas munyi thomh mas nyamoq dah cho thank das zis nghuot. Khasoeh ge lyis hauh bang dah Mangso ka gungsshoh dah nyoqnoq obos cho nghuot. Nyamoq gas vxoq vcaiq cho lhyi khwank cho kuot las hai nyeisjvng thoq mas dah vyhang lhyi kyingh nghamh twih toh.

²⁰Yang gas maukhung dius jens tsain nghuot las maukhung mhayah, yah khyuot yoeus Soeu Yhensain Yesu Khristu jweh los das yvlyis yang tsain langh nyeis.

²¹Nyang gas vyhang dvnganh zis lyis nyah o mha yoh toh dah phunk nyoqnho, zau guon yomsoq lyis yhung zis yah yang seq shei dah gungs lyis nyah phunk bos gungs yah doeus shoq thaiq tsuk dyei das zis nghuot.