Read Achang PHILIPI 4 Bible Online

PHILIPI 4 - Achang bible

PHILIPI 4

¹Housoeh las boekyis eh, ngos namoq lyis jyetdap las soh nyeis. Namoq gas ngah gaus joqyos yahge ngah buismuk nghuot. Jyetdap bang eh, Yhensain yah dvdain dvlom duot las kang dwis cho mha goeng goeng thoenk yap geh.

²Eodia yahge Sintike eh, Yhensain mha vbi vnoeuh nghuot zis yah dvyhangteh xamxonh das xiklyis jyehjuh yah ngos nah aiq yuk lyis khyoeuq kat.

³Ngah muh wons changh eh, hau vmesbih aiq yuk lyis pangh das xiklyis ngos o. Khasoeh ge lyis hau gausyis dang taiq kyoh cho mha nyah aiq yuk gas ngos yah dvgeh ma nyung ma daus yom bos kat goeus. Nyah aiq yuk yah dvgeh kuot lai loh bang mas Klemen yahge kang maussauh buk mas nyings bos, ngos lyis pangh thuk bang gohtoeu eq tsain bos.

⁴Yhensain mha namoq vjangh gausyis nyeis bas jungh! Gausyis nyeis geh oen ngos doms taiq.

⁵Namoq dah noeuh nhamp ehnyet lyis dius dvnganhmoq xikkhonh mas Chixoeuq geh. Yhensain jweh los nyeis.

⁶Chah cho mha laus eq vchiq nyeis goh: namoq shvmanh dung khanghmuh khanhamp eq nhaiqshoqlang ehnyet yah namoq chah ya chah yvlyis Mangso lhyi taiq kyoh nyeis geh.

⁷Housoeh lyis dius dah seq cho yah ma duons, Mangso dah nyenstap zis gas Khristu Yesu mas namoq dah ung khau yahge ehnyet nhaiqlom lyis gomh dyei das.

⁸Boekyis eh dang thang sau lhyi, namoq gas jyoeng cho, phauh nyang gis cho, dan cho, lhoqshang cho, nhaiqdoeus cho, chungh cho, nyoqnho ngelang dvja ja, chungh cho dvja ja nghuot lyis gas hauh cho lhyi tsain nghamh yoeuh nyeis geh.

⁹Ngah dang yahge kuot loh cho jens lyis nyvng yoeuh, xauhgyo yoeuh las xuq zis yah lhom yoeus chank kuot geh. Housoeh lyis nyenstap vpom Mangso ka, namoq yah dvgeh nyeis das.

¹⁰Shishenh nyangh thang lhyi namoq dah jyetdap ehnyet ngos lyis dvlhain doms Chixoeuq yvmvyah ngos Yhensain Yesu mha svsoh gauslaus nyeis. Housoeh oen lhyi xikpheh namoq ngos lyis phuqsoe cho toh tyamp oen taiq mes zis ma nghuot. Jyetdap ehnyet lyis Chixoeuq das toeuh ma yoh oen zis dvnghuot.

¹¹Ngos heisoeh taiq zis gas, namoq ngos lyis ma yoeuh ma dyangh lo oen taiq zis ma nghuot. Khasoeh ge lyis ngos gas vsainnyang yoh nyhoq yah nhaiqtap zis yah daq nyeis das xiklyis xuq toh goeus.

¹²Ngos gas jo buk laus eq, yuot shet zis xauh laus eq, magons magoh yoh uhlyis eq, ma nyo ma tham dvyoh dah shishenh lyis laus eq, khamha laus eq, khanhamp laus eq ehnyet tap khyvlyis seq nyeis das nyhenshang nghop shung toh dah joeui xuq toh goeus.

¹³Ngos lyis yombos nhang dah Khristu gvng mas cho khvt khanghmuh lyis yoh kuot.

¹⁴Nghuot laus eq ngos shanghsenh xauh uhlyis, ngos lyis pangh zis gas svsoh gis goeus.

¹⁵Philipi phung dius jens eh, ngos Makedoni mau masyah thuq las gausyis dang taiq kyoh xi shishenh lyis namoq Philipi phung dvkoeuq kyingh ngos lyis pangh kat goeus cho lhyi eq, muh wons wuq cho mha namoq kyingh ngos yah zomh las somh cho yahge myat cho lhyi dvgeh xauh kham zo cho lhyi namoq nyang vlhomuh seq.

¹⁶Ngos Thesaloni wus mas nyeis shih lyis yangh namoq ngos mas chah los uhlyis hau nyhenshang dvlhain magah pangh dah vlu huon kat dyei.

¹⁷Ngos heisoeh taiq zis gas, jyungshuk ngwis lyis o lha ma nghuot, namoq phuqsoe muh dah vshih, vmyat je los nyo los das yvlyis kyingh ngos dv o mes.

¹⁸Namoq Epaphrodi loq masyah huon kat dah vyhang vlu jyungshuk dvnganh xauh yoeus las suon xoeuq. Houka chah thoq lyis guszes shoq nghuot. Ngos mas magons magoh dyingh joq. Hauh vyhang ka Mangso xiklyis ngheq dyei dah xangh shom teh eq, Mangso nhaiq doeus las lhom yoeus mon dah lomhxangh teh eq nghuot.

¹⁹Housoeh las ngah Mangso ka nyah dah magons magoh zisyos masyah Khristu Yesu gvng mas namoq chah ya chah zis dvnganh yvlyis shvmanh dyei das.

²⁰Gvshih yah Uwus Mangso mha vcaiq vto phunk bos joq bas jungh. Amen.

²¹Khristu Yesu yah sen bang Mangso dah lo jens dvnganh lyis jeshuh kat. Heimha ngos yah dvgeh nyeis dah boekyis gas namoq lyis jeshuh kat.

²²Heimha nyeis, Mangso dah dius jens dvnganh, zes las Kesar hwankti yhen mha nyeis bang namoq lyis jeshuh kat.

²³Yhensain Yesu Khristu dah jyehjuh gas namoq yah dvgeh nghuot bas jungh. Amen.