Read Achang KOLOSE 1 Bible Online

KOLOSE 1 - Achang bible

KOLOSE 1

¹Mangso dah ehnyet yah Khristu Yesu dah lvgyo ngos Paulo yahge vmang vnoeuh Timothi gas,

²Kolose wus mas dah Mangso dah dius jens yahge Khristu mas lomluk dah boekyis jyank mas dang tying kat. Yah Uwus Mangso ka jyehjuh yahge nyenstap zis dyei bas jungh.

³Ngamoq namoq xiklyis shvmanh dung khanghmuh, yah Yhensain Yesu Khristu dah Uwus, Mangso lhyi vjangh nhaiqshoqlang oen sang.

⁴Khasoeh ge lyis, namoq Khristu Yesu lyis kha iq lomsjingh nyeis cho, Mangso dah dius jens lyis kha iq jyetdap nyeis cho ngamoq xauhgyo goeus.

⁵Hau jyoeng dah dang ge Gausyis Dang namoq jyank mas cangxeih jweh los uhlyis, namoq gas hauh dang yah dyei dah nghamhloms cho lhyi xauhgyo goeus. Housoeh las namoq dah lomsjingh cho yahge jyetdap cho ka namoq xiklyis maukhung mha shung toh dyei dah nghamhloms cho mha vpom tsuk toh.

⁶Namoq gas Mangso dah jyehjuh cho cangxeih xauhgyo las hauh jyehjuh lyis jyoengh seqgyo dah buisnyeis masyah hauh Gausyis Dang gas namoq jyank mas jweh los las shvmanh jyehjuh vja ja lyis dyei nyeis zis yah dvyhangteh, hau Gausyis Dang gas mungkvn gonh dyos jweh loh las shih nyoshoq shih los.

⁷Namoq gas Mangso dah jyehjuh cho lhyi ngamoq dah jyetdap dah pangh soeu Epaphra jyank masyah xuq goeus. Nyang gas ngamoq dah gungsthaiq Khristu dah lomluk muh wons soeu nghuot.

⁸Dyos yah dyei toh, namoq dah jyetdap ehnyet dah cho nyang ngamoq lyis taiq kyoh goeus.

⁹Namoq gas Mangso dah ehnyet o cho lhyi yoh seq dah joeui, Dyos yah dyei dah seq gyo cho dvnganh yahge seq cho yah tyink dyei zis xauh bas jungh, ngamoq Mangso jyank mas shvmanh dung dyei.

¹⁰Housoeh namoq gas Mangso o khyvlyis kang yoh dwis las, nyang nhaiqdoeus cho lhyi vjangh yoh chank kuot das. Housoeh namoq dah kang dwis cho mha gis dah muhzoh vja ja kuot thuqh zis yah Mangso lhyi seq cho mha zes kuhxing los das.

¹¹Housoeh las namoq thungh phuh los dah cho khanghmuh lyis kuh xing ehnyet yah yoh jhen das xiklyis nyah phunk bos yom zainsmuh yah namoq lyis yombos nhang bas jungh.

¹²Hauh thoq lyis bvng dah munghdan mas nyeis, nyah gyingshang bang xiklyis Mangso toeuq toh dah vso vlho lhyi kham yoeus mon bang namoq yoh bweh los shoq sont dyei dah Mangso jyehjuh lyis gausyis chungh nyeis geh.

¹³Nyang gas yang lyis ma shop dah mauchuotdwang yomsoq khau mhayah khyuot yoeus las, nyah jyetdap Lo dah munghdan mas shwih kat.

¹⁴Hau Lo gas yang lyis lhuiq kat goeus. Houka yah yaunos lyis khyuot tyamp dyei cho nghuot.

¹⁵Khristu gas nyoq yah ma yoh nyvng dah Mangso lhyi Chixoeuq. Nyang gas loxeih nghuot las gvnkhanh toh vyhang dvnganh mas zes thank dah soeu nghuot.

¹⁶Khasoeh ge lyis, maukhung yahge nyeisjvng mas yomsoq bos dyos, sidyos jens, yhensain jens, guon bang, toeuh yoh bang yah dvgeh, nyoq yah yoh nyvng zis yahge nyoq yah ma yoh nyvng zis dvnganh lyis eq hauh Lo masyah gvnkhanh toh. Mangso ka vyhang dvnganh yvlyis nyang masyah nyah xiklyis eq gvnkhanh toh.

¹⁷Nyang gas dvnganh dah xik mas nyeis las joq ya joq zis dvnganh gas nyah gvng mas nyah joqyos yah nyang goeng joq.

¹⁸Nyang gas nyah gungs ge dah phung uhloms nghuot. Nyang nyang gungsdom dah kang vpom nghuot. Nyang kyingh cho khvt khanghmuh mas cangxeih joqyos yoh soeu bweh bas jungh, shei bang mas cangxeih dwis toq nhang zis xauh dah loxeih nghuot.

¹⁹Khasoeh ge lyis Mangso nyang nghamh thyet zis yah dvyhangteh, nyang gas Mangso dah gungs khyank dyingh shoq kham yoeus goeus.

²⁰Housoeh las Mangso ka maukhung nyeisjvng mas nyeis ya nyeis, bos ya bos yvlyis nyang yah mehoq tamp das zis nghamh thyet toh goeus. Mangso ka tapzains mas nyah gungs dyei las shei kham soeu Lo dah phudyei suih yah nyenstap cho kuot las maukhung nyeisjvng mas nyeis ya nyeis yvlyis nyah jyank mas doms lang yoeus.

²¹Namoq eq xikpheh gas namoq kuot dah ma gis dah nghamh cho yahge muh gvng mas Mangso yah we loh las nyah jeswus tsain duot loh.

²²Nghuot laus eq gvshih Mangso ka cangsoeu gungs tsungh toh dah nyah Lo lyis shei kham nhang khyvlyis yah namoq lyis nyah buisnoms kuot goeus. Housoeh kuot cho ka namoq gas gyingshang lha vchoqh vlhauq ma dap, yobos ma bos nyah xikkhonh mas namoq lyis yoh hwank kat das nyhenshang nghuot.

²³Jyoengh namoq gas namoq dah goeng dah lomsjingh vpom mha tsoq las yoh thoenk yap joq das. Lho lha hau gausyis dang lyis xauhgyo dah shishenh lyis namoq xauh yoeus toh dah nghamhloms cho lhyi vchi lhaiq kat goh. Ngos Paulo gas gausyis dang dah jyeidwis bweh goeus.

²⁴Gvshih gas namoq xiklyis ngos xauh dah shanghsenh yvmas ngos gaus nyeis. Khristu gas nyah gungs ge dah hau phung xiklyis shanghsenh xauh zis yah dvyhangteh ngos gas ngah gungs mas shanghsenh kham khyvlyis Khristu gas nyah gungs ge hau phung xiklyis kham das zis bos shih dah shanghsenh lyis ngos bos tyeh kham nyeis.

²⁵Namoq xiklyis gis cho kuot bas jungh ge Mangso ka phung muh wons soeu dvyuk khyvlyis ngos lyis toeuq toh zis xauh. Ngos lyis dyei toh yvwons s gas hau gausyis dang lyis dyinghjet shoq taiq kyoh das cho nghuot.

²⁶Nyang gas hau noq thank nghop toh dang lyis mungkvn mas nyeis dius jens ma seq shoq gohnhamp dvcaiq thang lhyi dvcaiq jweh shoq nghop shung toh laus eq gvshih gas nyah dius nyau lyis Chixoeuq kat goeus.

²⁷Mangso dah nghamh toeuq cho ka dius nyau khanghmuh xiklyis nyang shung toh dyei, phunk bos las mauhphoh cho yahge noq thank Dang lyis nyah dius nyau lyis Chixoeuq das cho nghuot. Hau Dang gas Khristu nyang namoq vkhau mha nyeis cho nghuot. Hauh vjyuk gas, namoq gas Mangso yah dvgeh nyah phunk lyis gvm yoeus das cho nghuot.

²⁸Housoeh yvmvyah ngamoq gas dius nyau khanghmuh lyis Khristu cho taiq kyoh. Dius yuk khanghmuh lyis Khristu mas nhaiqbos ung gying dah Khristan dvyuk dvyuk Mangso dah xikkhonh mas yoh shwih kat bas jungh, ngamoq gas joeui bos ya bos zis yah nyamoq lyis zaih nhang, jyauh nyeis.

²⁹Housoeh hauh cho yoh bweh shoq ngos gas Khristu dyei dah kuhxing yomsoq yah nyung daus zis yah yomkat zwi nyeis. Hauh yomsoq gas ngos mas muh kuot nyeis.