Read Achang KOLOSE 2 Bible Online

KOLOSE 2 - Achang bible

KOLOSE 2

¹Ngos gas namoq xiklyis eq, Ladoki dius jens xiklyis eq, ngah nyoqnho ma nyvng ku bang dvnganh xiklyis eq ngos kha iq yomkat nyeis cho namoq lyis taiq kyoh.

²Housoeh ngos wons wuq yomkat cho ka, nyamoq dvnganh mas womh ehnyet dyingh zis yah dvyuk yah dvyuk dah jyetdap ehnyet mas twih goh los las nyamoq gas hau jyoeng cho lhyi seq las yoh loms toh goeus ge dah zisyos lyis dyingh dyingh xauh kham yoeus das. Heicho yah Mangso dah nghop toh dah noq thank cho ge Khristu lyis seq los das.

³Nyang gas Mangso dah nghop toh joeui dvnganh yahge seq cho dvnganh phank xoeuq dah suhshih nghuot.

⁴Housoeh las hank laus eq shuot cho lhyi jus das teh, gis das teh ge shoq taiq phyen-goh cho yahge mhuih cho ma bweh bas jungh, ngos heisoeh taiq kyingh.

⁵Khasoeh ge lyis ngah gungsdom namoq yah ma nyeis laus eq, dyos mas ngos namoq yah dvgeh nyeis las, namoq yomkat goengtoenk ehnyet yah Khristu lyis lomsjingh cho mha dvgeh yap joq yvlyis ngos nyvng las gauslaus.

⁶Namoq gas Khristu Yesu lyis Yhensain oen lhom yoeus goeus zis yah dvyhangteh, nyang yah dvgeh kang dwis las suh e nyeis geh.

⁷Nyang mas nyet chent las kuot nyuk toh goeus zis yah lomsjingh cho mha doengs joq nhang cho lhyi, Jyauh cho lhyi kham yoeus goeus zis yah dvyhangteh, nyang mas nauh nauh nyet chent las nyang mas vsainnyang dah kang dwis cho lhyi cuk zis yah namoq dah lomsjingh cho lhyi zes goeng nhang geh. Lho lha namoq gas jyehjuh soh zis yah kang dwis nyeis geh.

⁸Khristu dah tyingtoh dang masyah ma nghuot, dius dah tying dang chank las vkyuh ma bos suon yoeuh joeui khyvlyis mhuih jyomh cho eq, maulvt mas dah yius masyah thuq dah jyauh cho eq, hank eq namoq lyis jons ma kuot bas jungh zaih geh.

⁹Khasoeh ge lyis dius gungs tsungh las haih mungkvn mas kang dwis nyeis yoq lyis Mangso dah gungs khyank gas nyang mas dyingh joq.

¹⁰Namoq gas nyang mas kang dwis gvng mas dyinghjet dah kang dwis cho yoh goeus. Hauh Yhensain ka maukhung nyeisjvng mas yomsoq bos bang, toeuh yoh dah dyos jens dvnganh lyis guon dah zes thank soeu nghuot.

¹¹Namoq gas Yhensain yah dvdain dvlom duot las kang dwis uhlyis vthyoh tyomh goeus. Houka dius loq yah vthyoh ma tyomh, hai yaunos dap gungs shoh dah yomsoq masyah lhuiq kat ge, Khristu kuot dyei dah vthyoh tyomh cho nghuot.

¹²Namoq gas jeis nyhop kham uhlyis nyang yah dvgeh nyhop zis xauh las Khristu lyis shei masyah dwis toq los nhang dah Mangso mha dwis toq los nhang das yomsoq bos yvlyis lomsjingh gvng mas nyang yah dvgeh dwis toq los nhang zis eq tsain xauh goeus.

¹³Namoq gas xikpheh yaunos kuot bang nghuot las eq, Yuda dius jens ma nghuot las lyi ma chi vthyoh ma tyomh dah gohnyau bang nghuot khoq las eq, dyos cho mha shei joq. Nghuot laus eq gvshih gas Mangso namoq lyis Khristu yah dvgeh kang doms dwis nhang goeus. Mangso ka yah yaunos dvnganh lyis khyuot tyamp dyei goeus.

¹⁴Nyang gas yah dah ma doeus magoq yaunos jyen lhyi eq, houyah sen dah lyi lyis eq tapzains mas bat tap zis yah shang tyamp dyei goeus.

¹⁵Hau tapzains thoq mas Khristu gas maukhung nyeisjvng mas dah yomsoq bos bang yahge toeuh yoh bang dvnganh lyis khyoq tyamp las nyamoq lyis thung dius kuot zis yah ung hoeu thang mha chank nhang lha, dius phung yah chomp yoeuh soeu bweh nhang tyamp.

¹⁶Housoeh yvmvyah, zonoms shukphoh yah pwe vja ja dah thungh lyi lyis chank dah lhamhmuh canh nyeih yahge no nyeih dah cho yah sen lha, hank eq namoq lyis dang thang ma thyet bas jungh.

¹⁷Houteh zis dvnganh gas jweh los das shishenh lyis bweh los das vyhang dah siyet kyingh dvtsain nghuot. Gungs gas Khristu nyang nghuot.

¹⁸Lhyenwhei nyoqnyvng lyis nyvng yvmvyah dius dvnganh thoq lyis zes ge nghamh zis yahge gungs lyis ma jus khyvlyis nyhen mha gyoh nhang lha, loeuswons bang lyis tsoengh paiq nhang soeu hank lyis laus eq namoq lyis dang thang vthyet nhang goh. Housoeh teh bang gas nyamoq dah soengh choenk ehnyet khyvlyis vkom mha moengs bang nghuot.

¹⁹nyamoq gas gungs dah uhloms ge, Khristu lyis zwi zains toh cho ma bos lo. Yaunyoq changnyoq gyi coq twih toh dah gungs gonh gas Khristu ge dah uhloms masyah zonoms kham yoeus las Mangso dah ehnyet o khyvlyis kuh los.

²⁰Namoq gas Khristu yah dvgeh shei goeus las haih mungkvn lyis guon yomsoq bos, dyos dah loq masyah lhuiq kat zis xauh goeus. Housoeh lyis namoq gas chamus haih mungkvn yah sen bang teh tsain suh e nyeis goh lah?

²¹Chamus namoq gas, Haih zis vzwi goh, vchaq yoeuh, vtanh goh, ge tung toh dah lyi lyis domsyos gyo chank kuot nyeis lah?

²²Hau lyi dvnganh gas dvlhain yhung thang lhyi vkyuh ma bos lo vyhang yah tsain sen. Hauh cho dvnganh gas dius yah kuot thuq dah lyi yahge jyauh cho dvnghuot.

²³Heisoeh teh lyi gas loeuswons bang lyis tsoengh paiq nhang, ma jus khyvlyis ehnyet nyhen mha khyoq nhang, vsainnyang gungs lyis svsoh nyom cho lhyi toeu toq dah joeui dvja teh nghuot.Nghuot laus eq gungs shoh dah nyetnau ehnyet lyis joeu yvmas chah vkyuh ma bos.