Read Achang KOLOSE 3 Bible Online

KOLOSE 3 - Achang bible

KOLOSE 3

¹Namoq gas Khristu yah dvgeh dwis toq kat zis xauh goeus las Mangso dah loqyos shot pheh tsung toh, Khristu ge dah maukhung vyhang lhyi omes nyeis geh.

²Nyeisjvng mas vyhang lhyi vnghamh twih toh goh; nyhang mha dah vyhang lhyi nghamh twih toh geh.

³Khasoeh ge lyis namoq gas shei goeus bang nghuot las namoq dah kang ka Khristu yah dvgeh Mangso mha shung toh goeus.

⁴Namoq dah kang gyingh gas Khristu nghuot las nyang doms thuq los uhlyis yang eq nyang yah dvgeh phunk mas tsain thuq los das.

⁵Housoeh yvmvyah yah vkhau mha muh khanh nyeis mungkvn dah obos ehnyet, yauxi, ma lhoq ma shang vwot v-oeu muh, nyetnau, ma gis ma shop, nyoqnoq cho yahge silho paiq cho dvja nghuot. Housoeh teh ehnyet lyis thyuk tyamp chah.

⁶Housoeh teh gvng mas Nyang lyis domsyos ma gyo bang dah thoq mas Mangso dah nhaiqlom dyis zis jweh los das.

⁷Gohnhamp namoq dah kang dwis cho gonh mas hauh cho yah nghop toh uhlyis namoq nyang eq housoeh teh yaunos kuot zis yah kang dwis khoq.

⁸Gvshih gas nhaiqyo, nhaiqlom dyis, hoeng ehnyet, yobos comh, loeusmus soqzo, khonhchoqh dvnganh shung tyamp geh.

⁹Namoq nyang changh vhwah goh: khasoeh ge lyis hau gungs khyank cauh yah dvgeh wotwu lyis khyuot tyamp las gungs khyank saiq lyis wuot toh goeus.

¹⁰Gvnkhanh soeu Mangso ka nyah dah dius saiq lyis Mangso nyah gungs doeus lho yah zes zes doeus los shoq tsoq kuot nyeis. Housoeh kuot zis gas namoq hau Yhensain lhyi dyinghjet shoq seq los das nyhenshang nghuot.

¹¹Housoeh las Heleni, Yuda dius, vthyoh tyomh soeu, ma tyomh soeu, dius soengh, Sithia dius, jons yahge luiq soeu ge, nyamoq jo mas gvn nyeis das cho ma bos. Khristu gas namoq dvnganh dah vkhau mha nyeis las nyang gas dvnganh mas yhaugyen thank soeu eq nghuot.

¹²Namoq gas Mangso dah dius jens nghuot las nyang gas namoq lyis jyetdap las nyah xiklyis khyen yoeus zis xauh bang nghuot. Housoeh las namoq gas jyetdap, nhaiqnyen shohgyo, ehnyet nyhen mha gyoh las noeuh nhamp, kuhxing ehnyet lyis wuot toh geh.

¹³Namoq dvyuk yuk thoq mas yobos huon chank bos lyis dvyuk yah dvyuk jhen zis yah nyang changh nyang yobos khyuot goh geh. Yhensain ka namoq lyis yobos khyuot dyei goeus zis yah dvyhangteh, namoq nyang changh yobos yoh khyuot dyei goh chah.

¹⁴Kank bos cho dvnganh thoq mas dyinghjet dvdain dvlom yoh bweh shoq dvnganh yvlyis twih dah jyetdap ehnyet lyis tsank wuot chi geh.

¹⁵Khristu dyei dah nyenstap cho ka namoq dah nhaiqlom mas guon nyeis las houka namoq nghamh thyet cho mha cho tuonh shet bas jungh: khasoeh ge lyis hau nyenstap cho lhyi xauh kham zo das nyhenshang Mangso ka namoq lyis dvgungs khyvlyis khi yoeus goeus: housoeh las nhaiqshoqlang oen geh.

¹⁶Khristu dah dang gas namoq mas dyingh dyinghjet jet bos joq bas jungh: joeui bos zis dvnganh yah namoq nyang changh jyauh, cho tuonh shet goh nyeis geh. Chungh Dang, chunghthwe dang, dyos yah sen dah Chungh Dang yah namoq nhaiqlom khau mha Mangso lhyi jyehjuh chungh nyeis geh.

¹⁷Housoeh las namoq cha taiq taiq, cha kuot kuot, Yhensain Yesu dah nyings yoeus las nyeis geh. Dvnganh yvlyis kuot nyeis geh. Nyah gvng mas Uwus Mangso lhyi chungh nyeis geh.

¹⁸Yhensain nyhiq jens eh, vsainnyang dah yhensain phoq dah o mha gyoh nyeis geh. Houka Khristan dvyuk khyvlyis Yhensain mha doeus cho nghuot.

¹⁹Yhensain phoq jens eh, namoq dah yhensain nyhiq jens lyis jyetdap nyeis geh. Nyamoq lyis vnyho goh.

²⁰Loshang jens eh, nyhiphoq jens dah domsyos vjangh gyo nyeis geh. Houka Mangso nhaiqdoeus dah Khristan jens kuot vvng muh nghuot.

²¹Nyhiphoq jens eh, namoq dah lo jens lyis nhaiq vyo nhang goh. Housoeh kuot lyis nyamoq nhaiqngis yomgyau das.

²²Jons jens eh, namoq dah cangsoeu yhensain jens lyis cho khvt khanghmuh mas domsyos gyo nyeis geh. Nyoqnho yoh mes las nyamoq xikkhonh mas kyingh domsyos gyo khyvlyis ma nghuot. Mangso lhyi gyukwoms zis yah lhoqshang ehnyet yah domsyos gyo nyeis geh.

²³Namoq cha kuot kuot dius lyis kuot dyei teh ma nghuot, Yhensain lhyi kuot dyei teh ehnyet nhaiqlom dvnganh yah yomkat kuot nyeis geh.

²⁴Mangso ka nyah dius nyau lyis thoengh toh dah jyehjuh vso vlho lhyi namoq kham yoeus das yvlyis vjangh soh nyeis geh: Khasoeh ge lyis Khristu gas namoq phuqsoe nyeis dah Yhensain gyingh nghuot.

²⁵Ma jyoeng khyvlyis kuot soeu khanghmuh lyis nyang kuot dah ma jyoeng muh xiklyis phauh shangh zis xauh das. Khasoeh ge lyis Mangso ka soetuon cho mha nyoqnho ma khyen.