Read Achang KOLOSE 4 Bible Online

KOLOSE 4 - Achang bible

KOLOSE 4

¹Yhensain jens eh, namoq eq maukhung mha Yhensain dvyuk bos yvlyis soh las namoq dah jons jens lyis jyei nhang zo cho mha lyi dan khyvlyis kuot geh.

²Shvmanh dung cho mha malyen lo yomkat nyeis geh. Namoq shvmanh dung cho mha ehnyet mas jen jen mus las Mangso lhyi nhaiqshoqlang sang nyeis geh.

³Khristu dah noq thank dang cho yoh taiq kyoh das toeuh gis Mangso ngamoq lyis dyei bas jungh ngamoq xiklyis shvmanh bos dung geh. Khasoeh ge lyis Khristu dah noq thank dang lyis taiq kyoh gvng mas gvshih ngos thung gyoh nyeis.

⁴Hau noq thank dang lyis ngos taiq kyoh das yvwons s yoh zis yah dvyhangteh bvng bvng yoh taiq kyoh bas jungh shvmanh dung dyei geh.

⁵Namoq yoh dah toeuh khanghmuh lyis ma kat khyoq vlhomuh yhung zis yah ma lomsjingh shih bang dah xikkhonh mas joeui yah suh e nyeis geh.

⁶Namoq taiq dang gas khanhamp eq coh soeh ngvm las jyehjuh cho khyvlyis nhaiq wvng nhang dah dang nghuot las nyei soeu khanghmuh dah dang lyis jus dah phuk dang khasoeh yoh dyei das cho cvvq toh geh.

⁷Ngamoq dah jyetdap boek, lomluk muh wons soeu, Yhensain muh mas pangh dah jyeidwis Tichiku gas ngos yah sen dah cho dvnganh namoq lyis taiq kyoh das.

⁸Ngamoq dvnganh khasoeh bweh nyeis dah cho jeis namoq lyis taiq kyoh zis yah namoq ehnyet tap zis xauh bas jungh ngos nyang lyis namoq jyank mas nhang kat.

⁹Nyang yah dvgeh namoq jyank mas dah soeu nghuot las, lomluk soeu, jyetdap dah boek Onesimu lyis eq nhang kat goeus. Nyah aiq yuk gas heimha bweh cho dvnganh namoq lyis taiq kyoh das.

¹⁰Ngah thung lungh changh Aristaku ka namoq lyis jeshuh kat. Barnaba dah boek Makho eq namoq lyis jeshuh kat. Namoq jyank mas Makho jweh los lyis nyang lyis lhom yoeus geh oen shet kat cho lhyi namoq xauh yoeus toh goeus.

¹¹Yustu ge dah Yesu eq namoq lyis jeshuh kat. Hai somh yuk kyingh lomsjingh dah Yuda dius nghuot las Mangso munghdan xiklyis ngos yah dvgeh muh zwi bang, ngos lyis svsoh pangh dah ngah zainsthuk tsain nghuot.

¹²Namoq jyank masyah nghuot las Khristu Yesu dah jons Epaphra eq namoq lyis jeshuh kat. Nyang gas nhaiq wvng zis yah namoq xiklyis shvmanh dung nyeis. Namoq gas Mangso o dah cho mha domsyos gyo chank suh las nhaiqbos ung gying zis yah lomsjingh cho mha vlhomuh seqgyo dah Khristan duot las vjangh yoh thoenk yap joq bas jungh ge, nyang Mangso jyank mas khyoeuq nyeis.

¹³Nyang gas namoq xiklyis eq, Ladoki yahge Herapoli wus bang xiklyis eq muh yomkat zwi khank nyeis zis gas ngos nyah cho kanghjyoeng kat.

¹⁴Ngamoq dah jyetdap mvcheih svra Luka yahge Dema gas namoq lyis jeshuh kat.

¹⁵Ladoki mas nyeis boekyis, Nimpha yahge nyah yhen mha huom dah phung lhyi eq jeshuh dyei geh.

¹⁶Hai huon kat maussauh namoq dye nghap goeus ya, Ladoki phung lhyi nghap nhang lha, nyamoq lyis yah huon das maussauh eq namoq nghap yoeuh geh.

¹⁷Yhensain dah muh mas wons wuq das xiklyis kyauh toh yvlyis dye shoq zwi tyink aq oen Arkhipu lyis taiq kyoh geh.

¹⁸Ngos Paulo nyang, hai ngah jeshuh dang lyis ngah loq yah lhaih kat. Ngos thung mha lungh joq yvlyis vtohnyhik goh. Mangso dah jyehjuh gas namoq yah dvgeh nghuot bas jungh.