Read Achang 1 THESALONI 1 Bible Online

1 THESALONI 1 - Achang bible

1 THESALONI 1

¹Paulo, Sila yahge Timothi moq gas, Uwus Mangso yahge Yhensain Yesu Khristu mas nghuot dah Thesaloni wus mas dah phung lhyi maussauh lhaih kat. Jyehjuh yahge nyenstap zis gas namoq mas joq bas jungh.

²Ngamoq gas namoq dvnganhmoq xiklyis vjangh jyehjuh chungh nyeis zis yahge ngamoq dah shvmanh dung dang mas namoq lyis nyings yoeus nyeis.

³Khasoeh ge lyis namoq dah lomsjingh cho mha muhzoh khasoeh khanh nyeis zis eq, namoq dah jyetdap ehnyet gvng mas muh kha iq khank nyeis zis eq, Yhensain Yesu mas namoq dah nghamhloms cho kha iq goeng yvlyis eq yah Uwus Mangso dah xikkhonh mas ngamoq soh nyeis.

⁴Boekyis eh, Mangso ka namoq lyis jyetdap las nyah dius duot das xiklyis khyen yoeus cho ngamoq seq.

⁵Khasoeh ge lyis, ngamoq dah gausyis dang gas, dang yah kyingh jweh zis ma nghuot, yomsoq yah eq Gyingshang Dyos yah eq, gausyis dang dah jyoeng cho lhyi dyingh dyingh lomsjingh ehnyet yah eq namoq jyank mas los taiq kyoh. Namoq yah dvgeh nyeis lyis namoq dah gis cho xiklyis ngamoq kang khasoeh dwis cho namoq nyang seq.

⁶Namoq gas ngamoq yahge Yhensain dah yikhyoh yoeus las cho tsain chank kuot nyeis. Shanghsenh zis nyoshoq xauh laus eq, hauh gausyis dang lyis Gyingshang Dyos masyah los dah gauslaus ehnyet yah tsain lhom yoeus.

⁷Housoeh las namoq gas Makedoni mau yahge Akhaia mau mas dah lomsjingh bang dvnganhmoq dah yikhyoh bweh los.

⁸Khasoeh ge lyis namoq mas dah hau Yhensain dah loeus gas Makedoni mau yahge Akhaia mau gonh hoeuh loh thoq lyis magoh namoq Mangso lhyi lomsjingh cho loeus eq dvkhauyah hoeuh loh goeus. Housoeh las namoq lyis cha taiq dais ma bos lo.

⁹Namoq jyank mas ngamoq jweh los uhlyis namoq ngamoq lyis khasoeh lhom yoeus zis eq, namoq gas dwis nyeis las jyoeng dah Mangso lhyi yoh phuqsoe das xiklyis phvra lyis tsain tyamp las Mangso jyank pheh khasoeh lhain los zis eq,

¹⁰maukhung mhayah jweh los das Mangso dah Lo lyis langh nyeis zis lyis eq, dius jens dvnganh taiq hoeuh nyeis. Hau Lo Yesu gas shei goeus bang masyah Mangso dwis toq los nhang lha jweh los das Mangso dah nhaiqlom dyis masyah yang lyis lhuiq kat soeu nghuot.