Read Achang 1 THESALONI 3 Bible Online

1 THESALONI 3 - Achang bible

1 THESALONI 3

¹Housoeh las ngamoq ma yoh zain lo yvmvyah, Athen wus mas ngamoq nyang kyingh gyoh nyeis das zis nghamh thyet las,

²Khristu dah gausyis dang taiq kyoh yvmas ngamoq yah dvgeh muh wons nyeis, ngamoq dah boek Timothi lyis nhang kat.

³Namoq mas hank eq hai gvshih xauh nyeis dah shoeuhshih cho gvng mas lomsjingh cho ma lop ma loeh bas jungh, namoq lyis thukxank yomdyei das xiklyis nyang lyis namoq jyank mas nhang kat. Hai yang xauh nyeis dah shoeuhshih cho ka yah xiklyis Mangso dah nghamh toeuq cho dvkhamh nghuot oen yvlyis namoq nyang seq nyeis.

⁴Khasoeh ge lyis, ngamoq namoq yah dvgeh nyeis shih uhlyis, yang gas shoeuhshih zis xauh das cho, taiq kyoh zaih nhang toh goeus. Houyah dvyhangteh top bweh los goeus yvlyis namoq vlhomuh seq.

⁵Ngos tsoq las ma yoh zain lo yvmvyah, namoq dah lomsjingh cho khasoeh nghuot joq zis yoh seq das xiklyis ngos Timothi lyis nhang kat. Jyoengh nyang namoq gas yius yah shiwu yvpheh chank loh las ngamoq yomkat ohhont toh dah muhzoh vnyet vkom ma mes bweh nhang.

⁶Gvshih Timothi gas namoq jyank masyah ngamoq jyank mas doms jweh los las, namoq mas lomsjingh cho yahge jyetdap zis je los cho gausyis lhom yoeus phoh dah loeus wons los. Namoq ngamoq lyis vjangh vlhomuh soh nyeis thoq lyis ma goh, ngamoq namoq yah xauhgoh mes teh, namoq eq ngamoq yah xauhgoh mes cho ngamoq lyis los taiq kyoh.

⁷Housoeh las boekyis eh, ngamoq dah yaukyenh cho yahge shohjyen xauh nyeis uhlyis namoq cho xauhgyo las yom gyo bos. Houka namoq dah lomsjingh cho gvng mas yom yoh cho nghuot.

⁸Khasoeh ge lyis, namoq gvshih Yhensain Yesu mas dvdain dvlom kang dwis cho mha ma lop ma loeh yap joq las yang nhaiqtap khyvlyis yoh tsain dwis nyeis.

⁹Gvshih gas namoq gvng mas ngamoq Mangso lhyi nhaiqshoqlang yoh sang goeus. Namoq gvng mas Yhensain xikkhonh mas ngamoq xauh yoeus dah gausyis ehnyet dah gvng mas ngamoq nyang lyis nhaiqshoqlang tsain chungh.

¹⁰Ngamoq gas namoq dah nyoqnho xauh nyvng das zis yahge namoq dah lomsjingh cho mha chah nyeis shih yvlyis yoh tyink das xiklyis ngamoq ehnyet dvnganh yah nyeih nyenh dung nyeis.

¹¹Namoq nyeis yvmas ngamoq los das cho lhyi, yah Uwus Mangso nyang yahge Yhensain Yesu cho sont dyei bas jungh.

¹²Namoq nyang changh nyang thoq mas eq, dius dvnganh dah thoq mas eq namoq toh dah jyetdap ehnyet gas ngamoq namoq thoq mas toh dah jyetdap ehnyet teh zes las jelvm los nhang das xiklyis Mangso namoq lyis pangh bas jungh.

¹³Haih cho yah nyang namoq lyis thukxank das. Yah Yhensain Yesu gas nyah gyingshang bang[1] dvnganh yah dvgeh doms jweh uhlyis, namoq gas yah Uwus Mangso xikkhonh mas, dyinghjet las gyingshang bang bweh los das.