Read Achang 1 THESALONI 4 Bible Online

1 THESALONI 4 - Achang bible

1 THESALONI 4

¹Thang thank lyis boekyis eh, Mangso nhaiqdoeus das nyhenshang namoq kang khasoeh dwis chah cho namoq ngamoq masyah xuq goeus, Namoq hauh cho chank yah kang dwis nyeis goeus. Hauh thoq lyis zes yoh kuot das nyhenshang Yhensain Yesu dah nyings mas ngamoq namoq lyis shangphu zis yah yomdyei kat.

²Khasoeh ge lyis namoq kang khasoeh dwis gis ge tyingtoh cho lhyi Yhensain Yesu dah vmingh yah ngamoq namoq lyis dyei toh goeus zis gas namoq seq.

³Mangso ka namoq lyis gyingshang nhang mes zis yahge nyetnau muh kuot mhayah kyoq kyoq luiq das nyhenshang o.

⁴Namoq yukgis jens vsainnyang dah yhensain nyhiq yah gyingshang zis yah nyoqnho ngelang bos khyvlyis khasoeh yoh chomp nyeis das cho seq chah.

⁵Mangso lhyi ma seq dah gohnyau bang teh nyetnau ehnyet yah ma gis zomh.

⁶Heisoeh teh muh mas namoq hank eq vsainnyang dah Khristan vmang vnoeuh lyis shuot cho nghuot ya, vmang vnoeuh thoq mas toeuh yoeus cho ma gis kuot. Haih cho xikpheh ngamoq namoq lyis taiq kyoh ku goeus las Mangso ka shuot loh soeu lyis joeng das cho khoek khoek zaih nhang goeus.

⁷Mangso ka yang lyis ma lhoq ma shang kang dwis cho mha dwis nyeis das xiklyis khi yoeus toh zis ma nghuot. Gyingshang dah kang dwis cho mha nyeis das nyhenshang dvkhi yoeus toh.

⁸Housoeh las haih jyauh cho lhyi peq soeu hank laus eq dius lyis ma nghuot gyingshang Dyos dyei dah Mangso lhyi peq tyamp soeu dvnghuot.

⁹Namoq dah lomsjingh vmang vnoeuh lyis jyetdap das cho yah sen lha ngos namoq jyank mas lhaih kat das chank ma bos lo. Nyang changh nyang jyetdap goh nyeis das cho Mangso jyauh yvlyis namoq kham goeus.

¹⁰Jyoengh oen lhyi namoq gas Makedoni mau gonh mas dah Khristan vmang vnoeuh dvnganh lyis housoeh jyetdap cho chank kuot nyeis goeus. Housoeh las boekyis eh, namoq dah jyetdap ehnyet zes je los das xiklyis ngamoq namoq lyis khyoeuq. Housoeh zes las tsoq kuot loh goh.

¹¹Ngamoq namoq lyis taiq ku zis yah dvyhangteh, namoq gas nyenstap khyvlyis kang dwis nyeis das nyhenshang eq, gohyuk dah cho mha ma bos lhoeuh, vsainnyang dah womdau khoeu muh lyis nghamh toeuq nyeis bas jungh.

¹²Haih cho khyvlyis yah namoq gas lomsjingh dah phung dius ma nghuot bang dah phauh nyang cho lhyi xauh kham yoeus das. Hauh thoq lyis namoq dah chah shih cho yah sen lha hank lyis eq ma nges lo noh das.

¹³Boekyis eh, namoq gas nghamhloms cho ma bos bang teh nhaiqkuk zis ma xauh bas jungh, ngamoq gas shei goeus bang yah sen lha hau jyoeng cho namoq lyis seq nhang mes.

¹⁴Yhensain Yesu gas shei lha dwis toq los yvlyis yang lomsjingh nyeis lyis gas, Yesu lyis lomsjingh zis yah shei loh bang lyis eq Mangso ka Yesu yah dvgeh nyah jyank mas shwih loh das oen ngamoq lomsjingh.

¹⁵Gvshih ngamoq namoq lyis jyauh nyeis zis gas Yhensain dah jyauh cho nghuot. Yhensain jweh los lyis yang dwis nyeis shih bang gas shei goeus bang dah xik pheh loh das zis ma nghuot.

¹⁶Yhensain dah kaiq hoeu thwe, vmingh dang, loeuswons vgyis dah thwe yahge Mangso dah lvbuh thwe yah dvgeh Yhensain nyang maukhung mhayah gyoh los das. Hauh uhlyis Khristu lyis lomsjingh las shei loh bang cangxeih dwis toq los das.

¹⁷Hauh shishenh lyis dwis nyeis shih dah yang gas nyamoq yah dvgeh jyommauh yah nyhang mha toqh yoeus loh zis xauh das. Housoeh las yang Yhensain yah vjangh dvgeh nyeis das.

¹⁸Housoeh las haih dang yah namoq nyang changh yomdyei goh nyeis geh.