Read Achang 1 THESALONI 5 Bible Online

1 THESALONI 5 - Achang bible

1 THESALONI 5

¹Boekyis eh, haih cho bweh los das shishenh yahge yoq khanhamp nghuot das cho namoq lyis ma lhaih kat noh.

²Khasoeh ge lyis Yhensain doms jweh lyih das buisnyeis gas nyenh lyis khauh soeu wvng teh, jweh los das yvlyis namoq nyang jyuk jyuk seq toh.

³Dius jens gas, Sam joq, gau joq goeus, ge taiq das. Housoeh taiq uhlyis nyang loshang gungs lyis chi dah vmesbih gas lokhoeu nos nos yhangteh hau dyoqbis zis gas nyamoq thoq mas nyetlos nyettant jweh los das las dius jens hank eq yoh luiq das zis ma nghuot.

⁴Nghuot laus eq boekyis eh, namoq gas chuot yvmas nyeis bang ma nghuot yvmvyah hauh Yhensain doms jweh los das buisnyeis gas khauh soeu teh, nyetlos nyettant namoq thoq mas jweh das zis ma nghuot.

⁵Khasoeh ge lyis namoq dvnganh gas bvng dah lo jens yahge nyeih dah lo jens nghuot. Yang gas nyenh yahge chuot zis yah eq ma sen.

⁶Housoeh yvmvyah yang gas gohyhamh teh ma yhet joq joq, phuk soh lhaiq zungh yoeuh nyeis chah.

⁷Dius jens gas nyenh lyis yhet joq: nyenh lyis yhei yet nyeis.

⁸Nghuot laus eq yang gas nyeih yah sen yvmvyah phuk soh lhaiq mus chah. Yang gas lomsjingh cho yahge jyetdap ge dah sainhkhonh nghop nghop las, yang nghamhloms dah khyuot yoeus cho ge dah uhkyop tsain kyop toh goh.

⁹Mangso yang lyis nyah dah nhaiqlom dyis yvlyis kham nhang das xiklyis yang lyis khyen yoeus toh zis ma nghuot, Yhensain Yesu Khristu gvng mas khyuot yoeus cho xauh sain das xiklyis dvkhyen yoeus toh.

¹⁰Nyang doms jweh los uhlyis yang gas dwis nyeis laus eq, shei goeus laus eq nyang yah dvgeh kang yoh dwis nyeis das nyhenshang nyang gas yah xiklyis shei kham dyei goeus.

¹¹Haih cho gvng mas namoq gvshih kuot nyeis zis yah dvyhangteh, nyang changh nyang yomdyei goh cho, pangh thuk goh cho kuot nyeis geh.

¹²Boekyis eh, namoq mas khyoeuq kat zis gas, muh wons las namoq lyis Khristan kang dwis cho mha cho shet, jyauh nyeis bang lyis jus jyoeng khyvlyis phauh nyang nyeis das nyhenshang khyoeuq kat.

¹³Nyamoq dah muh gvng mas svsoh jyetdap zis yah nyamoq lyis phauh nyang nyeis geh. Namoq nyang changh eq nyenstap goh nyeis geh.

¹⁴Boekyis eh, namoq lyis taiq kyingh zis gas, Lan bang lyis zaih nhang lha, nhaiqngis bang lyis thukxank nyeis geh. Yomnhuk bang lyis pangh geh, yuk khanghmuh dah thoq mas jhen ehnyet bos geh.

¹⁵Hank lyis eq ma gis gvng mas ma gis khyvlyis ma tauh tauh, namoq nyang changh yahge dius dvnganhmoq xiklyis gis dah muh kuot das zis namoq nghamh toeuq toh geh.

¹⁶Vjangh gausyis nyeis geh.

¹⁷Malyen lo shvmanh dung nyeis geh.

¹⁸Cho khvt khanghmuh mas jyehjuh chungh nyeis geh. Houka Khristu mas namoq dah kang dwis cho yah sen lha Mangso o khyvlyis nghuot.

¹⁹Namoq ehnyet lyis yomdyei nyeis dah Gyingshang Dyos lyis vkyamp toh goh. Gyingshang dyos lyis nhaiq vkuk nhang goh.

²⁰Mangso dah dyos kat dyei zis xauh las taiq kyoh dang lyis pvlhyahlyoeus vkuot.

²¹Cho dvnganh lyis kyink las gis yvlyis lhom yoeus las zwi zains toh geh.

²²Ma gis dah cho dvnganh lyis jhank geh.

²³Yang lyis nyenstap cho dyei dah Mangso nyang nyamoq lyis cho khvt khanghmuh mas gyingshang nhang lha yah Yhensain Yesu Khristu jweh los uhlyis, namoq dah gungs, ehnyet, dyos dvnganh gas yobos huon chank ma bos shoq gomh nyeis bas jungh.

²⁴Namoq lyis khi yoeus soeu ka wontang soeu nghuot las haih cho lhyi kuot das.

²⁵Boekyis eh, ngamoq xiklyis eq shvmanh dung dyei geh.

²⁶Lomsjingh bang dvnganh lyis gyingshang dah wotwu yah jeshuh dyei geh.

²⁷Hai huon maussauh lyis lomsjingh bang dvnganh lyis nghap kyoh das nyhenshang hau Yhensain kyauh toh dah toeuh yah ngos namoq lyis vmingh dyei.

²⁸Yah Yhensain Yesu Khristu dah jyehjuh gas namoq yah dvgeh joq bas jungh.