Read Achang YOSHUA 1 Bible Online

YOSHUA 1 - Achang bible

YOSHUA 1

¹YHENSAIN dah jyeidwis Moshe shei thang lhyi Moshe dah zainsthuk, Nun lo Yoshua lyis YHENSAIN taiq zis gas,

²Ngah jyeidwis Moshe shei goeus. Gvshih nvng yahge Israel dius jens dvnganh cicont kuot toq las Yodan lvng goeu las, Israel jens lyis ngos dyei das mau mas loh geh.

³Ngos Moshe lhyi taiq zis yah dvyhangteh, namoq nang los dah mau dvnganh ngos namoq lyis dyei goeus.

⁴Nah maukyo ka mautyi pheh Mhanhdyvp masyah mautsung pheh Lebanon boms, buisthuq pheh Uphrat jeismuh lvng masyah Hiti mau chank yah buiswvng pheh Mediteranean thomh jweh shoq nghuot.

⁵Yoshua eh, nvng kang bos dvchank, hank eq nvng lyis ma yoh ung das. Ngos Moshe yah dvgeh nghuot teh, nvng yah eq dvgeh nghuot das. Ngos vjangh nvng yah dvgeh nghuot das, khanhamp eq ma doeuh tyamp toh das.

⁶Yom huont aq, womh ehnyet bos aq. Ngos haih dius jens dah phauh thyeih moq lyis dyei das oen dangthoengh toh dah mau mas nvng nyamoq lyis shwih loh dah uhshe soeu kuot chah.

⁷Yom huont las womh ehnyet bos aq: ngah jyeidwis Moshe nvng lyis dyei toh dah lyi dvnganh yoh chank shoq kuot chah. Hauh lyi dvkoeuq lyis eq vtyamp toh, housoeh lyis nvng khalhye loh khalhye ung cho yoh das.

⁸Nvng paiq yvmas vjangh haih lyi maussauh buk nghap das zis soh aq. Hauh yvlyis nyeih nyenh xuq las houmha lhaih toh zis dvnganh chank aq. Housoeh kuot lyis nvng joeui yoh las ung cho bos das.

⁹Ngos nvng lyis, Yom huont las womh ehnyet bos aq oen tying toh yvlyis soh aq. Vgyuk, nhaiqlom vthank: khasoeh ge lyis ngos YHENSAIN, nah Mangso ka nvng khalhye loh khalhye dvgeh nghuot, ge.

¹⁰Yoshua zau jens lyis zaudang khyoq zis gas,

¹¹Dvp chank thyet loh las dius jens lyis taiq geh: YHENSAIN namoq dah Mangso namoq lyis dyei dah mau mas loh das xiklyis somh nyeih gyo lyis namoq Yodan lvng goeu chah las zokho ba geh, ge.

¹²Yoshua Ruben vnyau, Gad vnyau yahge Manase vnyau dvgohyih lyis taiq zis gas,

¹³YHENSAIN dah jyeidwis Moshe namoq lyis khasoeh taiq toh yvlyis soh geh. Houka YHENSAIN, namoq dah Mangso ka namoq lyis Yodan lvng buisthuq pheh joqyos dyei goeus.

¹⁴Namoq dah yhensain nyhiq jens, loshang jens yahge gaunyhauq gas heimha nyeis khoq das. Nghuot laus eq namoq dah phoqgis jens gas jesgungs yah nyamoq dah Israel changh jens lyis pangh das zis nyamoq dah xik mas thyitvp pheh goeu loh chah.

¹⁵YHENSAIN namoq dah Mangso nyamoq lyis dyei, Yodan lvng buiswvng tvp pheh dah mau lyis xauh sain shoq bos loh chah. Mangso Israel vkoq dvnganh lyis sam cho dyei thang lhyi YHENSAIN dah jyeidwis Moshe namoq lyis dyei Yodan lvng dah buisthuq pheh, namoq nyang dah mau mas tauh los las nyeis das, ge.

¹⁶Nyamoq Yoshua lyis phuk taiq zis gas, Nvng ngamoq lyis taiq zis dvnganh kuot das, nvng ngamoq lyis nhang yvmas loh das:

¹⁷Ngamoq vjangh Moshe dah dang gyo vgus nah dang eq gyo das. YHENSAIN, nah Mangso ka nvng yah dvgeh nghuot das yvmvyah ngamoq nah domsyos gyo das.

¹⁸Nvng tyingtoh dang, nghuot ya nah zau dang lyis domsyos ma gyo soeu hank laus eq sat zis xauh das. Yom dvhuont aq, womh ehnyet dvbos aq, ge.