Read Achang YOSHUA 10 Bible Online

YOSHUA 10 - Achang bible

YOSHUA 10

¹Yerusalem[3] hwankti Adonizedek gas Yoshua Yerikho wus yahge nyah hwankti lhyi kuot teh, Ai wus yahge nyah hwankti lhyi zan las shank shoq mhont tyamp cho xauhgyo. Gibeon bang gas Israel jens yah buisnoms coq las dvgeh nyeis cho lhyi eq xauhgyo.

²Housoeh las Yerusalem bang gas svsoh gyuk dvn nyeis. Khasoeh ge lyis Gibeon wus gas Ai wus teh ma ngis, hwankti tsung shoq kuh dah wus nghuot. Houmha dah yukgis jens eq jeszan lyes bang nghuot.

³Housoeh las Yerusalem hwankti Adonizedek gas Hebron hwankti Hoham, Yamut hwankti Piram, Lakhish hwankti Yaphia, Eglon hwankti Debir moq jyank mas dang tsain tying kat.

⁴Gibeon lyis zan das zis ngos lyis los bos pangh geh: khasoeh ge lyis nyah dius jens gas Yoshua yahge Israel jens yah nyenstap cho kuot toh, ge.

⁵Amori hwankti jens oeng yuk nghuot dah Yerusalem hwankti, Hebron hwankti, Yamut hwankti, Lakhish hwankti, Eglon hwankti moq dvgeh xonh dah jesphung ka Gibeon wus lhaink las jeszan.

⁶Gibeon bang gas Giga thoenggus Yoshua jyank mas dius nhang lha taiq zis gas, Ngamoq nah jons jens lyis vjenh tyamp toh: lvnyap los pangh zis yah jenh khyuot yoeus aq: boms mau mas dah Amori hwankti jens dvnganh xonh las ngamoq lyis los zan, ge.

⁷Housoeh las Yoshua gas, jeszan lyes bang bos dah nyah jesphung dvnganh yah dvgeh Giga masyah toq loh.

⁸YHENSAIN Yoshua lyis taiq zis gas, Nyamoq lyis vgyuk, ngos nvng lyis ung cho dyei goeus. Nyamoq dvyuk eq nah xikkhonh mas ma yoh thoenk yap das, ge.

⁹Yoshua yahge nyah jesphung ka Giga masyah Gibeon pheh dvnyens gonh jens loh las Amori jens lyis nyetlos nyettant zan.

¹⁰YHENSAIN ka Amori jens lyis Israel jesphung xik mas chot-muh mhauq nhang. Israel gas nyamoq lyis Gibeon mas vbomsdom sat. Bet Horon wus loh cho langhwuq cho chank khat gyoh las, mautyi pheh Azeka yahge Makeda wus jweh shoq sat.

¹¹Amori jens Israel jesphung lhyi phang lha Bet Horon langhwuq gyoh loh uhlyis YHENSAIN ka dvcho gonh nyamoq thoq mas gyutomp mau khyoq zis Azeka wus jweh shoq nghuot. Israel jens sat thoq lyis gyutomp mau bat las shei bang zes nyo.

¹²YHENSAIN Israel jens lyis Amori thoq mas ung nhang dah nyeih lyis Yoshua YHENSAIN lhyi taiq las, Israel jens dah nyoqlvtjvng mas, Buislom eh, Gibeon wus mas yap aq, lhamhmuh eh, Aiyalon langhkhau thoq mas no aq, ge.

¹³Hauh dius nyau jeswus lyis ung shoq buis gas yap las lhamhmuh eq no joq. Yasha dah maussauh mas, Buis gas maukhung vgungs mas yap las dvnyeih buis ma wvng ge lhaih toh.

¹⁴YHENSAIN ka cangsoeu dius dah dang gyo las hou teh buisnyeis ma bweh ku, thang pheh eq ma bweh lo YHENSAIN ka Israel shot pheh jeszan dyei.

¹⁵Hauh thang lhyi Yoshua yahge nyah jesphung ka Giga thoenggus pheh tauh los.

¹⁶Hwankti oeng yuk moq gas phang lha Makeda lukkhyung mha tamh joq.

¹⁷Dvyuk yuk Makeda lukkhyung mha tamh joq dah hwankti oeng yuk lyis nyvng las hauh cho Yoshua lyis taiq kyoh los.

¹⁸Yoshua taiq zis gas, Lukkhyung khonh mas luk muh lom tsain toeu cheiq las zungh nhang toh geh.

¹⁹Nghuot laus eq namoq gas vno nyeis, jeswus lyis chank khat las nungs thank masyah zan geh, nyamoq dah wus mas vwvng nhang goh. YHENSAIN, namoq dah Mangso ka namoq lyis nyamoq thoq mas ung cho dyei goeus, ge.

²⁰Yoshua yahge Israel jens gas jeswus lyis ung shoq sat, nghuot laus eq dvtsiq dvthang ka ciank ci toh dah nyamoq wus vkhau mha wvng loh las sat zis ma xauh.

²¹Hauh thang lhyi Yoshua dah dius jens dvnganh gas nyang nyeis dah Makeda thoenggus mas jesluiq shohluiq tauh los. Hauh mau mas nyeis bang hank eq Israel jens lyis tyi dah dang dvkhonh yangh ma womh taiq.

²²Hauh thang lhyi Yoshua taiq zis gas, Lukkhyung khonh phank las hau hwankti oeng yuk lyis ngah jyank mas shwih los geh, ge.

²³Housoeh las luk khyung phank las, Yerusalem hwankti, Hebron hwankti, Yamut hwankti, Lakhish hwankti yahge Eglon hwankti moq oeng yuk lyis lukkhyung mhayah shwih thuq las,

²⁴Yoshua jyank mas shwih loh. Housoeh Yoshua gas Israel jens dvnganh lyis khi lha, nyang yah dvgeh jeszan dah zau jens lyis nyamoq dah khyei hau hwankti jens dah lainzain mas nang das xiklyis zaudang khyoq. Nyamoq eq los nang.

²⁵Hauh thang lhyi Yoshua nyamoq dah zau jens lyis taiq zis gas, Vgyuk goh, nhaiqlom vthank goh, yom huont geh, womh ehnyet bos geh: khasoeh ge lyis namoq dah jeswus dvnganh lyis YHENSAIN heisoeh kuot das, ge.

²⁶Hauh thang lhyi Yoshua hau hwankti oeng yuk lyis sat zis yah saiq oeng zains mas lhangh toh las hauh mvng nyenhthang jweh shoq lhangh toh.

²⁷Buiswvng loh lyis Yoshua zaudang khyoq las nyamoq lyis saiqzains masyah khyoq lho lha, nyamoq tamh khoq dah lukkhyung mha doeuh kat las lukkhyung khonh mas lukmuh lom tsain toeucheiq toh. Hauh luk khvnyhik jweh shoq houmha joq.

²⁸Hauh nyeih lyis Yoshua Makeda yahge nyah hwankti lyis zan yoeus. Hauh wus mas bang dvnganh lyis sat, dvyuk eq ma nyhet toh lo. Makeda hwankti lhyi eq Yerikho hwankti lyis kuot teh kuot.

²⁹Hauh thang lhyi Yoshua yahge nyah jesphung ka Makeda masyah Libna pheh loh las hauh yvlyis zan.

³⁰YHENSAIN ka Israel jens lyis hauh wus yahge nyah hwankti lhyi ung das cho dyei goeus. Nyamoq hank lyis eq ma nyhet toh lo, houmha bang yuk khanghmuh lyis sat. Hwankti lhyi ka Yerikho hwankti lhyi kuot teh kuot.

³¹Hauh zis dye lyis Yoshua yahge nyah jesphung ka Libna masyah Lakhish lyis loh lhaink las hauh yvlyis zan.

³²YHENSAIN ka Israel jens lyis Lakhish thoq mas ung das cho dyei goeus las jeszan dah aiq vnyeih lyis Libna lyis kuot teh nyamoq hank lyis eq ma nyhet toh lo hauh wus mas bang yuk khanghmuh lyis sat.

³³Gezer hwankti Horam gas Lakhish wus lyis pangh das ge doq los. Nghuot laus eq Yoshua gas hauh hwankti yahge nyah jesphung lhyi dvyuk eq ma nyet lo shoq sat.

³⁴Hauh thang lhyi Yoshua yahge nyah jesphung ka Lakhish masyah loh las Eglon lyis lhaink toh zis yah hauh yvlyis zan.

³⁵Hauh nyeih lyis nyang, nyamoq wus lyis yoeus las Lakhish wus lyis kuot teh, wus mas bang yuk khanghmuh lyis sat.

³⁶Tsai, Yoshua yahge nyah jesphung ka Eglon masyah Hebron lyis loh zan yoeus.

³⁷Houmha dah hwankti yahge wus khau mha bang dvnganh lyis sat. Hauh vyvm vwi wuslo jens mas bang lyis eq houyah dvyhangteh sat. Yoshua gas Eglon wus lyis kuot teh hau wus lyis eq dvyuk eq ma nyet lo shoq sat las shank shoq mhont tyamp.

³⁸Hauh thang lhyi Yoshua yahge nyah jesphung ka Debir pheh loh las hauh yvlyis zan.

³⁹Yoshua gas hauh wus yah dvgeh nyah hwankti, hauh vyvm vwi wuslo dvnganh lyis yoeus. Nyamoq houmha bang yuk khanghmuh lyis sat. Yoshua gas Debi wus yahge nyah hwankti lhyi nyang Hebron yahge Libna, nyamoq hwankti jens lyis kuot khoq teh kuot.

⁴⁰Yoshua gas dvmau gonh lyis yoh ung goeus. Nyang gas boms mau, buisthuq pheh dvtsiq nyhen gyoh joqyos, buiswvng pheh janggyon, mautyi pheh nyeis kyuk yos mas dah hwankti jens dvnganh lyis ung goeus. Nyang hank lyis eq ma nyhet toh lo, yuk khanghmuh lyis sat. Heika YHENSAIN, Israel dah Mangso tying toh zis nghuot.

⁴¹Yoshua yoeus dah joqyos gas mautyi pheh Kadesh Barnea masyah thomh yvm nvm pa, Goshen pa eq mulas Gaza, mautsung pheh Gibeon wus jweh shoq nghuot.

⁴²YHENSAIN, Israel dah Mangso ka Israel jens xiklyis jeszan dyei yvmvyah, Yoshua dvlhain loh zis yah haih hwankti jens yahge nyamoq dah mau dvnganh lyis yoh ung los.

⁴³Hauh thang lhyi Yoshua yahge nyah jesphung ka Giga thoenggus pheh tauh loh.