Read Achang YOSHUA 14 Bible Online

YOSHUA 14 - Achang bible

YOSHUA 14

¹Haih zis gas Yodan lvng dah buiswvng tvp, Khanan mau mas Israel jens lyis mau khasoeh gvm dyei cho nghuot. Phudyei Eleaza, Nun dah lo Yoshua yahge Israel vkoq mas yhenbang khyvlyis dah uhjyung jens dius nyo, dius nain yvlyis tank las gvm dyei cho nghuot.

²YHENSAIN Moshe lhyi tying toh zis yah dvyhangteh, doeugoh zis yah Yodan lvng buiswvng tvp pheh gau koq dvkhyamh lyis maunyeis gvm dyei.[5]

³Moshe ka Yodan lvng buisthuq tvp pheh aiq nyau dvkhyamh lyis maunyeis gvm dyei toh goeus. (Yosep dah vkoq lyis Manase yahge Ephraim aiq koq gvm toh.) Moshe Lewi vkoq lyis maunyeis ma dyei laus eq hauh gungs thaiq nyamoq nyeis das wus jens, nyamoq dah noeu jens yvng shvbeq nyhenshang maunyeis xauh yoeus.

⁵Israel jens gas YHENSAIN Moshe lhyi taiq toh khyvlyis vso maunyeis gvm dyei.

⁶Dvnyeih gas Yuda vkoq mas bang dvyhamh Giga thoenggus, Yoshua jyank mas los. Kenizi vhuh Yephun lo Khaleb taiq zis gas, Kadesh Barnea mas YHENSAIN nvng yahge ngah cho Mangso dah dius Moshe lhyi cha taiq zis nvng seq.

⁷Haih mau lyis joh yoeuh das xiklyis YHENSAIN dah jyeidwis Moshe ngos lyis Kadesh Barnea masyah nhang uhlyis ngos nyeici zvn bos goeus. Ngos nyang lyis lomluk luk los taiq kyoh.

⁸Ngos yah loh bang gas ngamoq dah dius jens lyis gyuk nhang. Nghuot laus eq ngos gas YHENSAIN, ngah Mangso lhyi domsyos wontang gyo.

⁹Ngos housoeh kuot yvmvyah Moshe ka ngos loh suh khoq dah mau gas ngos yahge ngah lo jens, ngamoq dah vcaiq vto vso khyvlyis xauh yoeus das ge dangthoengh toh.

¹⁰YHENSAIN Moshe lhyi housoeh taiq masyah nyeici oeng zvn nghuot goeus. Houka Israel jens mhanhdyvp mas suh lai los uhlyis YHENSAIN dah dangthoengh yah dvyhangteh ngos lyis kang dwis nhang toh. Yoeuh aq, ngos xetci oeng zvn bos goeus.

¹¹Moshe ngos lyis nhang uhlyis yombos teh khvnyhik eq bos shih. Ngos jes yoh zan shih, nghuot ya cha eq yoh kuot shih.

¹²Housoeh las hau ngos yahge ngah dius jens los taiq nyeih lyis YHENSAIN ngos lyis thoengh toh dah boms mau ngos lyis dyei aq. Hauh uhlyis Anakim ge dah dam dius jens ciank ci wus yah nyeis cho taiq goeus. YHENSAIN ngos yah nyeis das las, YHENSAIN taiq zis yah dvyhangteh hauh bang lyis ngos khat tyamp das, ge.

¹³Yoshua gas Yephun lo Khaleb lyis shvmanh dyei zis yah nyah xiklyis vso khyvlyis Hebron dyei.

¹⁴Hebron gas Kenizi vhuh Yephun lo Khaleb dah vnyau vshih yah sen joq shih: khasoeh ge lyis nyang gas YHENSAIN, Israel dah Mangso dah domsyos lomluk luk gyo goeus.

¹⁵Haih zis ma jweh shih lyis Hebron lyis Arba wus ge lui. (Arba gas Anakim jens mas kuhxing thank soeu nghuot.) Gvshih hauh mau mas moeng dvm joq.