Read Achang YOSHUA 16 Bible Online

YOSHUA 16 - Achang bible

YOSHUA 16

¹Yosep dah vnyau vshih jens lyis dyei dah mautyi maukyo ka, Yerikho nvm Yodan lvng masyah Yerikho jeisthuq dwang jens dah buisthuq shot, mhanhdyvp pheh wvng loh. Houka Yerikho masyah doq, boms mau lai las Bethel jweh shoq loh.

²Bethel masyah Luza lai las Arkhi jens nyeis dah Atarot Ada mas jweh.

³Hou mhayah buiswvng pheh gyoh las Yaplet jens mau, Bet Horon o gyons mas dah wus mas jweh. Hou mhayah Gezer thang lhyi Mediteranean thomh mas thank.

⁴Yosep dah vnyau vshih jens Ephraim vkoq yahge buiswvng pheh dah Manase moq gas haih maunyeis lyis nyamoq dah vso vlho khyvlyis xauh yoeus.

⁵Heika Ephraim lo jens yhenbang khyvlyis dah maukyo ka, buisthuq pheh Atarot Ada masyah Thoq Bet Horon wus,

⁶hou mhayah Mediteranean thomh pheh, hauh Mautsung pheh gas Mikmetha joq. Hauh buisthuq pheh nyamoq dah maukyo guih las Tanat Shilo lai las buisthuq pheh Yanoa.

⁷Yanoa masyah Atarot yahge Nara, houmha zis Yerikho jweh thang lhyi Yodan lvng mas thank.

⁸Hauh maukyo ka Tapua masyah buiswvng pheh Kana lvng, Mediteranean thomh mas thank. Heika Ephraim vkoq, yhenbang khyvlyis dyei dah vso nghuot.

⁹Houka Manase lo jens dah vso wus jens yah dvgeh nyamoq dah wukhau bos dah maukyo khau mhayah Ephraim lo jens lyis gvm dyei zis nghuot.

¹⁰Nyamoq gas Gezer mas nyeis dah Khanan jens lyis ma khat tyamp, housoeh las Khanan jens khvnyhik jweh shoq Ephraim yah dvgeh nyeis, nghuot laus eq nyamoq gas jons teh muh tsoengh zwi nhang zis xauh.