Read Achang YOSHUA 17 Bible Online

YOSHUA 17 - Achang bible

YOSHUA 17

¹Manase ka Yosep dah loxeih nghuot yvmvyah nyah vkoq yhenbang lyis Yodan lvng buiswvng pheh dah maunyeis dvkhamh dyei. Gilead dah uwus Makhir ka Manase dah loxeih, jes thoeuqzoe nghuot las nyang Yodan lvng buisthuq pheh dah Gilead yahge Bashan mau yoh.

²Yodan lvng buiswvng pheh dah mau lyis Manase lo jens nyet shih dah yhenbang lyis dyei. Hauh bang gas Abiezer lo jens, Helek lo jens, Asriel lo jens, Shekhem lo jens, Hepha lo jens, Shemida lo jens tsain nghuot. Heika Yosep dah lo Manase dah loloeu jens nghuot las yhenbang dah uhjyung jens eq nghuot.

³Manase dah loloeu Makhir, Makhir lo Gilead, Gilead lo Hepha, Hepha lo Zelophehad ka loloeu ma bos, lonyi jens kyingh dvnghuot. Nyamoq nyings gas Mala, Noa, Hogla, Mikha, Tirza nghuot.

⁴Nyamoq gas phudyei Eleaza, Nun lo Yoshua yahge uhshe bang jyank mas e lha taiq zis gas, Ngamoq lyis ngamoq boekyis yah dvgeh vso dyei das zis YHENSAIN Moshe lhyi taiq toh. Housoeh yvmvyah YHENSAIN tying toh zis yah dvyhangteh, nyamoq dah boekyis yah dvgeh nyamoq lyis vso dyei toh.

⁵Housoeh las Manase ka Yodan lvng buiswvng pheh gvmboms dvci yoh. Hauh thoq lyis Yodan lvng buisthuq pheh Gilead yahge Bashan mau tsain yoh shih.

⁶Manase dah vnyau vshih lonyi jens gas nyah vnyau vshih loloeu jens yah dvgeh buiswvng tvp pheh vso mau tsain yoh goeus las, nyet dah loloeu jens gas Gilead mau yoh.

⁷Manase dah maukyo ka mautsung pheh Asher vkoq jens dah wus masyah Shekhem dah buisthuq pheh Mikmetha jo mas nghuot. Hauh maukyo ka mautyi pheh gyoh las En Tapua dius jens nyeis yvmas jweh shoq nghuot.

⁸Tapua mau gas Manase yah sen. Nghuot laus eq Manase maukyo mha dah En Tapua wus gas Ephraim vnyau vshih jens yah sen.

⁹Maukyo ka Kana lvng pheh gyoh loh. Hau jeislvng dah mautyi shot pheh dah wus jens gas Manase dah maukyo mas joq laus eq houka Ephraim yah dvsen. Manase dah maukyo ka jeislo lvng dah mautsung chank yah loh las Mediteranean thomh mas thank.

¹⁰Ephraim ka mautyi pheh, Manase ka mautsung pheh nghuot las, Mediteranean thomh gas buiswvng pheh nyamoq dah maukyo nghuot. Asher gas buiswvng mautsung pheh, Isakha gas buisthuq mautsung pheh nghuot.

¹¹Isakha yahge Asher mau khau mha Bet Shean wus, Ibleam wus yahge nyamoq dah vyvm vwi wukhau jens, jeis yvm mas dah Dor[7] wus, Endor, Tanak, Megido wus jens yahge nyamoq dah vyvm vwi wukhau jens lyis Manase sain toh.

¹²Nghuot laus eq Manase jens gas hauh wus mas nyeis bang lyis ma thyeh khat thuq las, Khanan bang houmha tsoq nyeis.

¹³Israel jens gas yombos los laus eq Khanan dius jens lyis shank shoq ma khat tyamp, nyamoq lyis muh tsoengh zwi nhang toh.

¹⁴Yosep dah vnyau vshih jens Yoshua lyis taiq zis gas, YHENSAIN ngamoq lyis shvmanh dyei yvmvyah ngamoq nyoshoq nghuot goeus. Ngamoq sain das nyhenshang chamus ngamoq lyis gvmboms dvkoeuq kyingh dyei lah, ge.

¹⁵Yoshua phuk taiq zis gas, Namoq dius nyo las namoq xiklyis Ephraim boms zvvs lyis gas, Perizi yahge Rephaim dah mau saiq khyam mha yos wvng dyens geh, ge.

¹⁶Nyamoq taiq zis gas, Hauh boms mau gas ngamoq xiklyis ma tham kuh. Janggyon nghuot dah Bet Shean yah nyah wus jens mas nyeis dah Khanan jens eq Yezrel langhkhau mha nyeis dah Khanan jens eq thyeq jeslhyingh tsain yoh, ge.

¹⁷Ephraim vkoq yahge buiswvng pheh dah Manase lyis Yoshua taiq zis gas, Namoq jyoengh nyoshoq nghuot, yomsoq eq bos. Namoq gvmboms dvkoeuq thoq lyis yoh das.

¹⁸Boms mau eq nah zis nghuot das. Yozanh khyam nghuot joq laus eq nvng thoeuq las vthang mhayah vwhomh jweh shoq nvng yoh sain das. Khanan bang thyeq jeslhyingh yoh las yombos laus eq nvng nyamoq lyis khat tyamp das, ge.