Read Achang YOSHUA 18 Bible Online

YOSHUA 18 - Achang bible

YOSHUA 18

¹Israel jens hauh mau zan ung thang lhyi nyamoq dvhuom gonh Shilo wus mas huom lha houmha YHENSAIN nyeis dah Zvng lyis toeutsung toh.

²Israel jens mas nyamoq dah vso mau gvmboms ma xauh yoeus shih zis nyhet koq nyet shih.

³Housoeh las Yoshua Israel jens lyis taiq zis gas, YHENSAIN namoq phauh thyeih moq dah Mangso namoq lyis dyei dah mau lyis ma wvng yoeus zis kha nyhank jweh shoq langh shih das lah?

⁴Namoq dvkoq mas somh yuk yuk toeuq dyei geh. Ngos nyamoq lyis nhang lha nyamoq gas hauh mau mas loh las nyamoq dah vso yah dvyhangteh comh las ngah jyank mas tauh los chah.

⁵Nyamoq hauh mau lyis nyhet gvm khyoq das. Yuda gas mautyi pheh nyamoq joqyos mas nyeis das. Yosep yhenbang eq mautsung pheh nyamoq joqyos mas nyeis das.

⁶Namoq hauh mau lyis nyhet gvm khyoq las comh zis ngah jyank mas chi los chah: ngos gas YHENSAIN, yah Mangso xikkhonh mas namoq xiklyis doeugoh das.

⁷Nghuot laus eq Lewi jens gas namoq yah dvgeh gvmboms maunyeis ma yoh: khasoeh ge lyis nyamoq dah gvmboms gas YHENSAIN lhyi phudyei yvmas phuqsoe muh nghuot. Gad, Ruben yahge buisthuq Manase vkoq gas Yodan lvng buisthuq tvp pheh YHENSAIN dah jyeidwis Moshe vso gvm dyei zis xauh yoeus goeus, ge.

⁸Yoshua hauh mau loh yoeuh das bang lyis, Namoq Mau gonh loh keq comh las ngah jyank mas doms los geh, ngos hai Shilo mas YHENSAIN dah xikkhonh mas namoq xiklyis doeugoh das, ge dye taiq shet lyis nyamoq tsain toq las loh.

⁹Dius jens gas dvmau yah loh las nyamoq hauh mau lyis nyhet gvm khasoeh khyoq zis yahge wus jens lyis maussauh mas lhaih comh las Yoshua nyeis dah thoenggus Shilo mas tsain tauh los.

¹⁰Yoshua gas Shilo mas doeugoh zis yah nyamoq xiklyis YHENSAIN lhyi nyei las nyet dah Israel vkoq jens lyis vvng khyvlyis gvm dyei.

¹¹Benyamin vkoq yhenbang khyvlyis yah sen dah mau gas xik lyis dyei toh goeus. Nyamoq dah mau gas Yuda yahge Yosep vkoq jens dah vjo mas joq.

¹²Mautsung pheh nyamoq dah maukyo ka Yodan lvng masyah Yerikho mautsung langlyamh cho, buiswvng pheh boms mau chank lai loh las Bet Awen mhanhdyvp jweh shoq nghuot.

¹³Tsai, Bethel ge dah Luza wus mautyi pheh boms khyei chank yah loh. Hauh thang lhyi o pheh gyoh las Atarot Adar wus mas jweh. Hauh wus gas Bet Horon o pheh dah mautyi pheh dah boms mas joq.

¹⁴Hauh thang lhyi hau maukyo ka gohshot pheh xoeu loh, buiswvng pheh boms vthang masyah mautyi pheh xoeu lha, Kiriat Yearim ge, Yuda vkoq yah sen dah Kiriat Bal pheh loh. Heika buiswvng pheh maukyo nghuot.

¹⁵Mautyi maukyo ka Kiriat Yearim vthang mhayah xi lha, Neptoa jeisdwang jens pheh loh.

¹⁶Rephaim langhkhau mautsung vthang pheh joq dah Hinom langhkhau twi twi mas dah boms khyei chank yah loh. Tsai, Yebusi jing zam mautyi pheh dah Hinom langhkhau lai las En Rogel jeisthuq dwang pheh loh.

¹⁷Hou mhayah mautsung pheh xoeu las En Shemesh wus, hauh thang lhyi Adumim langhwuq twi twi Gelilot wus pheh loh. Hauh maukyo ka Bohan dah Luk mas jweh.[8]

¹⁸Houka Bet Araba dah mautsung zam cho tsoq loh thang lhyi Yodan langhkhau pheh wvng loh.

¹⁹Hou mhayah Bet Hogla dah mautsung vzam chank yah loh las Coh Thomh mautsung jyankyvm mas thank. Houka Yodan lvng yaus wvng yvmas nghuot. Heika mautyi maukyo nghuot.

²⁰Yodan lvng gas buisthuq pheh maukyo nghuot. Heika Benyamin vkoq yhenbang khyvlyis vso mau xauh yoeus zis nghuot.

²¹Benyamin vkoq yhenbang yah sen dah wus jens gas Yerikho, Bet Hogla, Emek Kezi,

²²Bet Araba, Zemaraim, Bethel,

²³Awim, Para, Ophra,

²⁴Khepharamoni, Opni, Geba, nyamoq dah vyvm vwi wukhau jens eq cheq dvci aiq wus nghuot.

²⁵Gibeon, Rama, Berot,

²⁶Mizpa, Khephira, Moza,

²⁷Rekem, Irpel, Tarala,

²⁸Zela, Haelep, Yerusalem ge Yebusi wus, Gibea, Kiriat Yearim: nyamoq wukhau jens eq cheq dvci nyei wus nghuot. Heika Benyamin vkoq yhenbang yoh dah vso maunyeis nghuot.