Read Achang YOSHUA 21 Bible Online

YOSHUA 21 - Achang bible

YOSHUA 21

¹Hauh thang lhyi Lewi yhenbang dah uhshe bang gas phudyei Eleaza, Nun dah lo Yoshua yahge Israel vkoq yhenbang dvnganh dah uhjyung jens jyank mas e.

²Khanan mau Shilo wus mas nyamoq lyis taiq zis gas, Ngamoq nyeis das wus yahge gaunyhauq xiklyis Katjang wuxom dyei das zis YHENSAIN ka Moshe lhyi yah taiq toh, ge.

³Housoeh las Israel jens gas YHENSAIN taiq toh zis yah dvyhangteh nyamoq dah vso maunyeis masyah Lewi jens lyis wus jens yahge katjang wuxom tsain gvm dyei.

⁴Kohat yhenbang gas Lewi vkoq mas bang nghuot. Kohat yhenbang mas dah Lewi dvyhamh gas phudyei Aron yhenbang mas zis nghuot. Nyamoq gas Yuda vkoq, Simon vkoq, Benyamin vkoq yah sen dah wus dvci somh wus yoh.

⁵Nyet dah Kohat vhuh gas Ephraim, Dan, buiswvng pheh Manase maunyeis masyah zis wus dvci tsain yoh.

⁶Gershon vhuh lyis gas Isakha, Asher, Napthali yahge buisthuq pheh Manase moq dah maunyeis mas zis dvci somh wus dyei.

⁷Merari vhuh yhenbang lyis gas Ruben, Gad yahge Zebulun moq dah maunyeis mas zis dvci aiq wus dyei.

⁸YHENSAIN Moshe lhyi yah taiq toh zis yah dvyhangteh Israel jens gas doeugoh zis yah Lewi jens lyis haih wus jens yahge katjang wuxom tsain dyei.

⁹Heika Yuda yahge Simon maunyeis masyah dyei tyamp dah wus nyings tsain nghuot.

¹⁰Houka Lewi masyah dyos lyih las Aron dah vnyau vshih Kohat yhenbang lyis dyei. Haih zis nyamoq dyei cho cangxeih kuot.

¹¹Yuda boms mau mas Hebron wus ge dah Arba wus lyis nyah katjang wuxom yah dvgeh dyei.[10]

¹²Nghuot laus eq hauh wus dah danh yahge wukhau jens lyis gas Yephun lo Khaleb lyis nyah vso maunyeis khyvlyis dyei toh goeus.

¹³Nyamoq gas phudyei Aron dah vnyau vshih jens lyis Hebron wus dyei. Hebron wus gas phang khau das wus dvwus nghuot. O mha dah wus jens eq dyei shih. Houka Libna,

¹⁴Yati, Eshtemoa,

¹⁵Holon, Debir,

¹⁶Ain, Yuta yahge Bet Sheme, nyamoq dah katjang wuxom jens yah dvgeh Yuda yahge Simon vkoq mas zis gau wus dyei.

¹⁷Benyamin vkoq mau mas zis Gibeon, Geba,

¹⁸Anathot yahge Almon mas nyamoq katjang wuxom jens yah dvgeh nyei wus dyei.

¹⁹Aron vnyau vshih phudyei bang lyis dyei zis dvnganh lyis katjang wuxom bos dah wus dvci somh nghuot.

²⁰Gohtoeu Kohat vhuh Lewi yhenbang lyis gas Ephraim mau mas dah wus dvkhamh dyei.

²¹Nyamoq lyis nyei wus dyei. Ephraim boms mas katjang wuxom yah dvgeh dah Shekhem wus, (houka phang khau wus dvwus nghuot). Gezer,

²²Kibzaim yahge Bet Horon, nyamoq dah katjang wuxom yah dvgeh nghuot.

²³Nyamoq lyis Dan vkoq dah maunyeis mas zis nyei wus dyei. Elteke, Gibethon,

²⁴Aiyalon yahge Gat Rimon, nyamoq dah katjang wuxom eq cheq nghuot.

²⁵Buiswvng pheh Manase vkoq maunyeis mas zis aiq wus dyei. Tanak yahge Gat Rimon, nyamoq dah katjang wuxom yah dvgeh nghuot.

²⁶Hai Kohat vhuh yhenbang xauh yoeus dah wus dvnganh lyis katjang wuxom yah dvgeh dah wus dvci nghuot.

²⁷Gershon vhuh gohtoeu Lewi jens gas buisthuq pheh Manase vkoq dah maunyeis mas zis aiq wus xauh yoeus. Bashan mha Golan (phang khau wus dvkoeuq) yahge Beshtera nyamoq katjang wuxom yah dvgeh nghuot.

²⁸Isakha vkoq maunyeis mas zis nyei wus xauh yoeus. Kishion, Daberat,

²⁹Yamut yahge En Ganim, nyamoq dah katjang wuxom yah dvgeh nghuot.

³⁰Asher vkoq maunyeis mas zis nyei wus xauh yoeus: Mishal, Abdon,

³¹Helkat yahge Rehob, nyamoq dah katjang wuxom yah dvgeh nghuot.

³²Napthali vkoq maunyeis mas zis nyamoq somh wus xauh yoeus: Galile mas Kedesh,[11] Hamot Dor yahge Katan, nyamoq dah katjang wuxom yah dvgeh nghuot.

³³Gershon vhuh yhenbang nyoshoq nyah katjang wuxom yah dvgeh dah wus dvnganh lyis dvci somh wus xauh yoeus.

³⁴Merari vhuh nyet shih dah Lewi jens Zebulun vkoq mau mas zis nyei wus xauh yoeus: Yokneam, Kata,

³⁵Dimna yahge Nahala, nyamoq dah katjang wuxom yah dvgeh nghuot.

³⁶Nyamoq Ruben vkoq mau mas zis nyeis wus xauh yoeus: Bezer, Yahaz,

³⁷Kedemot yahge Mephat nyamoq dah katjang wuxom yah dvgeh nghuot.

³⁸Gad vkoq mau mas zis nyei wus xauh yoeus. Gilead mas Ramot wus yah nyah katjang wuxom (hauh zis phang khau wus dvwus nghuot). Mahanaim,

³⁹Heshbon yahge Yazer nyamoq dah katjang wuxom yah dvgeh nghuot.

⁴⁰Housoeh las Merari vhuh yhenbang lyis dyei zis dvnganh lyis dvci aiq wus nghuot.

⁴¹Israel jens sain dah maunyeis mas zis Lewi jens lyis dyei dah wus dvnganh lyis nyeici xet wus nghuot. Hauh wus jens yah dvgeh nyamoq dah katjang wuxom tsain bos.

⁴³Housoeh las YHENSAIN ka Israel jens dah phauh thyeih moq lyis dyei das ge maukhi lha dangthoengh toh dah mau dvnganh nyamoq lyis dyei las, nyamoq sain yoeus zis yah houmha nyeis.

⁴⁴Nyamoq dah phauh thyeih moq lyis dangthoengh toh zis yah dvyhangteh dvmau gonh nyenstap nhang lha, nyamoq dah jeswus jens hank eq nyamoq yah tyi lha ma yoh yap: khasoeh ge lyis YHENSAIN ka Israel jens lyis nyamoq dah jeswus dvnganh thoq mas ung cho dyei goeus.

⁴⁵YHENSAIN ka Israel jens yah toh dah dangthoengh koeuq khanghmuh lyis zwi toh las kuot tyink dyei.