Read Achang YOSHUA 22 Bible Online

YOSHUA 22 - Achang bible

YOSHUA 22

¹Hauh thang lhyi Yoshua gas Ruben, Gad yahge buisthuq Manase vkoq jens lyis khi tsainh las,

²nyamoq lyis taiq zis gas, YHENSAIN dah jyeidwis Moshe taiq toh zis dvnganh namoq kuot las, ngos namoq lyis taiq dang dvnganh domsyos gyo goeus.

³Namoq khvnyhik jweh shoq namoq dah Israel changh jens lyis khanhamp eq ma tyamp. YHENSAIN, namoq dah Mangso tyingtoh dang lyis vlhomuh chank kuot goeus.

⁴Gvshih YHENSAIN, namoq dah Mangso ka namoq dah Israel changh jens lyis nyang dangthoengh toh zis yah dvyhangteh, nyenstap cho dyei goeus. Housoeh las namoq sang lha YHENSAIN dah jyeidwis Moshe namoq lyis dyei dah maunyeis, namoq yhen pheh tauh loh geh. Houka Yodan lvng buisthuq tvp pheh nghuot.

⁵Moshe namoq lyis tyingtoh lyi chank, domsyos gyo das zis zaih geh. YHENSAIN namoq dah Mangso lhyi jyetdap geh, nyah ehnyet chank las nyah tyingtoh dang lyis domsyos gyo geh. Nyang lyis lomluk geh. Namoq dah ehnyet nhaiqlom dvnganh yah nyang lyis phuqsoe geh, ge.

⁶Housoeh Yoshua gas nyamoq lyis shvmanh las haih dang dyei zis yah nyamoq yhen pheh nhang kat. Hauh dang gas, Namoq gas gaunyhauq, ngwis xing, thunk, thyeq yahge dyimis nyoshoq dis zis yah yhen pheh tauh loh. Namoq jeswus masyah yoeus los dah vyhang lhyi namoq dah Israel vkoq changh jens lyis gvm dyei geh, ge. Housoeh nyamoq yhen pheh loh lo. Moshe ka Yodan lvng buisthuq tvp pheh maunyeis Manase vkoq dvkhyamh lyis dyei goeus. Nghuot laus eq gohtoeu dvkhyamh lyis gas Yodan lvng buiswvng tvp pheh gohtoeu vkoq jens yah dvgeh, Yoshua gvm dyei.

⁹Housoeh las Ruben, Gad, buisthuq Manase vkoq mas bang gas. YHENSAIN Moshe lhyi tyingtoh dang yah dvyhangteh, nyamoq sain dah Gilead mau pheh loh das zis, Israel jens nyeis dah Khanan mau Shilo wus masyah thuq las nyamoq yhen pheh tauh loh.

¹⁰Ruben, Gad, buisthuq Manase vkoq jens Yodan lvng buiswvng tvp pheh nghuot shih dah Gelilot mau mas jweh lyis jeis lvng yvm mas nyamoq houmha phon zainsmuh dvkoeuq bvng bvng ci.

¹¹Ruben, Gad yahge buisthuq Manase vkoq jens gas Yodan lvng yvm, Gelilot mas phon ci ge dah loeus nyet dah Israel dius jens xauhgyo.

¹²Israel jens hauh zis xauhgyo lyis, nyamoq dvhuom gonh buisthuq vkoq jens lyis jes loh zan das xiklyis Shilo wus mas tsain zophuom toh.

¹³Hauh thang lhyi Israel dius jens gas phudyei Eleaza dah lo Phineha lyis Ruben, Gad yahge buisthuq Manase vkoq jens dah Gilead mau mas nhang.

¹⁴Buiswvng tvp pheh dah Israel nyang koq nyang mas dah uhjyung jens yahge yhenbang mas dah vhuh dah uhjyung jens dvci yuk moq eq Phineha yah dvgeh bos loh.

¹⁵Nyamoq gas Gilead mau, Ruben, Gad yahge buisthuq Manase vkoq jens jyank mas jweh loh.

¹⁶Nyamoq gas YHENSAIN dah moq dvhuom gonh xiklyis taiq zis gas, Namoq Israel dah Mangso yah tyi lha ma gis zis chamus kuot goh? Namoq xiklyis haih phon ci zis yah YHENSAIN lhyi gomloeus toq goeus. Namoq gas nyah thang mha ma chank lo.

¹⁷Peor masyah yaunos gvng mas YHENSAIN nyah dius jens lyis yomh yah joeng yvlyis soh goh. Hauh gvng mas ngamoq gvshih eq kham zo nyeis shih. Hauh yaunos ma geh shih lhyeh?

¹⁸Gvshih namoq nyah thang chank das zis ngoek das lah? Khvnyhik namoq YHENSAIN lhyi gomloeus toq lyis, phvnaq nyeihyo nyang Israel jens yuk khanghmuh lyis nhaiqyo das.

¹⁹Housoeh las namoq nghamh lyis namoq dah maunyeis mas paiq das zis ma doeus lyis, YHENSAIN dah zvng joq dah nyah maunyeis mas los geh. Ngamoq mas dah maunyeis dvkhamh sang yoeus geh. YHENSAIN lhyi tyi lha gomloeus vtoq goh. YHENSAIN, yah Mangso dah phon thoq lyis lai las gohtoeu phon ci zis yah ngamoq lyis gomloeus vtoq nhang.

²⁰Zera lo Akhan ka nhoengh dah vyhang cho zau dang lyis khasoeh ngoek yvlyis soh aq. Hauh xiklyis Israel dvphung gonh yau dyei zis xauh. Akhan dah yaunos gvng mas nyang dvyuk kyingh shei zis ma nghuot, ge.

²¹Ruben, Gad yahge buisthuq Manase vkoq jens buiswvng shot pheh vkoq jens yhenbang dah uhjyung jens lyis toeuh zis gas,

²²Yomzains bos soeu ka Mangso nghuot! Nyang gas YHENSAIN nghuot! Yomzains bos soeu ka Mangso nghuot! Nyang gas YHENSAIN nghuot! Ngamoq haih zis chamus kuot yvlyis nyang seq. Ngamoq eq namoq lyis seq nhang mes. Ngamoq gomloeus toq las YHENSAIN lhyi lom ma luk lyis gas, ngamoq lyis kang vdwis nhang lo.

²³Ngamoq YHENSAIN lhyi domsyos ma gyo, ngamoq nyang phon ci lha hauh thoq mas ngheq dyei lomhxangh, zonoms jyungshuk, nyenstap jyungshuk phudyei lyis gas YHENSAIN nyang ngamoq lyis joeng bas jungh.

²⁴Housoeh ma nghuot! Ngamoq haih phon ci zis gas thang pheh namoq vnyau vshih jens gas ngamoq vnyau vshih lyis, Namoq gas YHENSAIN, Israel dah Mangso lhyi paiq das toeuh ma yoh lo ge das yvlyis chiq yvmvyah kuot goeus.

²⁵YHENSAIN ka ngamoq yahge namoq dius jens jo mas Yodan lvng lyis maukyo toh goeus. Namoq gas YHENSAIN yah cha ma sen lo, ge namoq vnyau vshih jens gas ngamoq vnyau vshih jens lyis YHENSAIN lhyi paiq cho no toh nhang das.

²⁶Housoeh yvmvyah ngamoq phon ci zis gas ngheq phudyei, jyungshuk dyei das xiklyis ma nghuot.

²⁷Hauh gungsthaiq yah thang mha dah vnyau vshih jens namoq dius yahge ngamoq dius gas, yang jyoengh nyang ngheq dyei lomhxangh, phudyei jyungshuk yahge nyenstap jyungshuk dyei zis yah YHENSAIN lhyi nyah gyingshang Zvng xik mas paiq cho dah vlho khyvlyis dvkuot. Heika namoq vshih jens gas ngamoq vshih jens lyis, Namoq YHENSAIN yah cha ma sen ge ma taiq das xiklyis dvnghuot.

²⁸Housoeh taiq thuq los lyis, ngamoq dah vnyau vshih jens yoh taiq das zis gas, Yoeuh aq, ngamoq dah phauh thyeih moq YHENSAIN dah phon teh zis dvkoeuq ci goeus. Houka jyungshuk ngheq phudyei das phon ma nghuot. Nghuot laus eq namoq yahge ngamoq dius jens mas vlho khyvlyis dvnghuot. Haih zis ngamoq nghamh thuq los cho nghuot.

²⁹Ngamoq phon ci zis yah ngheq dyei lomhxangh, zonoms jyungshuk phudyei las YHENSAIN lhyi tyi gomloeus ma toq, nyang lyis nungs ma phuk loh. Nyang nyeis dah Zvng xikkhonh mas joq, YHENSAIN, yah Mangso dah phon mha lai las ngamoq gohtoeu phon ma mes ci.

³⁰Phudyei Phineha yahge dius phung dah zau jens, buiswvng tvp pheh vhuh yhenbang dah uhjyung jens dvci yuk moq hau Ruben, Gad yahge buisthuq Manase vkoq mas bang dang lyis nhaiq tsain gyo doeus.

³¹Phudyei Eleaza lo Phineha nyamoq lyis taiq zis gas, Gvshih YHENSAIN yang yah nyeis zis ngamoq seq goeus. Namoq gas YHENSAIN lhyi gomloeus ma toq. Housoeh las namoq gas Israel jens lyis YHENSAIN joeng masyah khyuot yoeus goeus, ge.

³²Hauh thang lhyi Phineha yahge zau jens gas Ruben yahge Gad vkoq jens dah joqyos Gilead mau masyah Israel jens nyeis dah Khanan mau pheh tauh loh las hauh loeus tsain taiq kyoh.

³³Israel jens gas nhaiqdoeus las Mangso lhyi tsain chungh. Ruben yahge Gad dius jens nyeis dah mau lyis mhont das zis jeszan das cho ma taiq lo.

³⁴Ruben yahge Gad jens taiq zis gas, Haih phon ka ngamoq yahge namoq jo mas YHENSAIN ka Mangso nghuot dah kanghjyoeng nghuot. Housoeh las nyamoq hauh yvlyis, Kanghjyoeng, ge nyhink.