Read Achang YOSHUA 23 Bible Online

YOSHUA 23 - Achang bible

YOSHUA 23

¹Svsoh nyangh thang lhyi YHENSAIN ka Israel jens lyis nyamoq yvmlhaink jeswus masyah sam nhang. Hauh uhlyis Yoshua gas svsoh mang goeus.

²Housoeh las Yoshua gas Israel logis jens, uhshe bang, soetuon bang, zau jens dvnganh lyis khi lha taiq zis gas, Gvshih ngos svsoh mang goeus.

³Namoq gvng mas YHENSAIN, namoq dah Mangso ka haih vnyau lyis kuot dyei zis dvnganh namoq nyvng goeus. YHENSAIN, namoq dah Mangso ka namoq xiklyis jeszan dyei goeus.

⁴Dius nyau jens dah mau namoq vkoq jens lyis gvm dyei goeus zis soh geh. Houka Yodan lvng masyah buiswvng pheh Mediteranean Thomh jweh shoq dah vjo mas zis nghuot. Ngos zan ung mau eq bos. Hauh mau gas ngos namoq lyis dyei das oen dangthoengh toh dah mau nghuot laus eq namoq hauh yvlyis ma joeu shih.

⁵Namoq hauh mau mas wvng los uhlyis YHENSAIN, namoq dah Mangso ka hauh vnyau thuq loh das xiklyis khat tyamp. YHENSAIN, namoq dah Mangso namoq lyis dangthoengh toh zis yah dvyhangteh, namoq gas nyamoq mau lyis xauh sain das.

⁶Housoeh las Moshe dah lyi maussauh mas lhaih toh zis dvnganh chank das zis zaih geh. Houmha zis dvdoeus eq vtyamp toh goh.

⁷Namoq mas nyet joq dah dius jens yah vzomh, nyamoq phvra nyings vyoeus, hauh nyings yah vnyhen, nyamoq lyis vpaiq phuqsoe.

⁸Hauh gungsthaiq namoq khvnyhik chank kuot nyeis teh namoq dah YHENSAIN lhyi lomluk geh.

⁹Namoq jweh wvng los uhlyis YHENSAIN ka yomsoq bos las kuhxing dah vnyau lyis khat tyamp las hank eq namoq lyis tyi lha ma yoh toq yap.

¹⁰YHENSAIN, namoq dah Mangso ka nyang dangthoengh toh vgus namoq xiklyis jeszan dyei. Housoeh las namoq dvyuk gas dvkhyoengh lyis yoh khat das.

¹¹Housoeh las, YHENSAIN, namoq dah Mangso lhyi jyetdap das cho zaih geh.

¹²Namoq lom ma luk las namoq mas nyet joq shih dius nyau jens yah tsoq goh las nyiyoeus yhenloh lyis,

¹³YHENSAIN, namoq dah Mangso ka haih vnyau jens lyis namoq xikkhonh masyah ma khat thuq dyei lo das zis zaih geh. Hauh gungsthaiq hauh bang gas lhyik duot las namoq dah gvnungh mas lvxuk, nyoqjeih mas zoeu teh nghuot das. Housoeh namoq gas YHENSAIN Mangso dyei dah haih mau gis mas hank eq ma nyet lo das.

¹⁴Gvshih gas ngos shei das shishenh jweh los goeus. YHENSAIN, namoq dah Mangso ka nyang dangthoengh toh las gis dah vyhang dvnganh namoq lyis dyei goeus. Hauh yvlyis namoq yuk khanghmuh top seq. Nyang toh dah dangthoengh khanghmuh doengs. Dvkoeuq eq ma dyuk loh.

¹⁵YHENSAIN Mangso ka nyang dangthoengh toh zis yah dvyhangteh gis zis dyei das. Nghuot laus eq dang ma gyo lyis gas nyah dangthoengh yah dvyhangteh joeng das.

¹⁶Chank chah ge YHENSAIN, namoq dah Mangso tying toh dah thanghchvp lyis ma chank, gohtoeu phvra lyis paiq phuqsoe lhyi ka, YHENSAIN nhaiqyo las namoq lyis joeng. Ma nyangh lyis namoq lyis dyei toh, hai gis dah mau mas hank eq ma nyet lo das.