Read Achang YOSHUA 24 Bible Online

YOSHUA 24 - Achang bible

YOSHUA 24

¹Hauh thang ma nyangh lyis Yoshua gas Israel vkoq dvnganh lyis Shekhem mha khi tsainh. Nyang gas Israel dah logis jens, uhjyung jens, soetuon bang, zau jens lyis khi lha, nyamoq gas Mangso dah xikkhonh mas tsain los.

²Dius jens dvnganh lyis Yoshua taiq zis gas, YHENSAIN, Israel dah Mangso heisoeh ge: Gohlhain namoq dah phauh thyeih moq gas hau Uphrat lvng thyitvp pheh nyeis. Nyamoq gas gohtoeu phvra lyis tsain paiq. Hauh phauh thyeih moq mas dvyuk gas Abraham yahge Nahor dah uwus Tera nghuot.

³Ngos namoq dah phauh thyeih Abraham lyis Uphrat lvng thyitvp masyah khi yoeus las Khanan mau gonh mas shwih kat. Ngos nyang lyis vnyau vshih nyoshoq dyei. Ngos nyang lyis Isak dyei.

⁴Isak lyis Yakop yahge Esau dyei. Esau sain das xiklyis Edom boms mau dyei. Nghuot laus eq Yakop yahge nyah lo jens gas Egutu pheh gyoh e.

⁵Hauh thang lhyi ngos Moshe yahge Aron lyis nhang lha, Egutu bang thoq mas yomh zainsmuh she kat. Lho lha namoq phauh thyeih moq lyis gas shwih thuq los.

⁶Ngos namoq dah phauh thyeih moq lyis Egutu masyah shwih thuq los uhlyis, Egutu bang eq lhyingh yahge nyang ji bang nyamoq lyis chank khat los. Nghuot laus eq nyamoq Thomh Nes mas jweh lyis,

⁷nyamoq pangh aq ge ngos lyis kaiq dung. Housoeh las ngos gas nyamoq yahge Egutu bang jo mas mauchuot nhang. Ngos Egutu bang lyis thomh yah nghop tyamp nhang. Ngos Egutu jens lyis khasoeh kuot zis namoq seq. Nyamoq mhanhdyvp mas nyangh shoq nyeis.

⁸Hauh thang lhyi ngos namoq lyis Yodan lvng buisthuq tvp mas nyeis dah Amori jens dah mau mas shwih los. Nyamoq namoq lyis jeszan laus eq ngos namoq lyis nyamoq thoq mas ung nhang. Namoq nyamoq dah mau lyis sain yoeus zis yah dvyhangteh ngos nyamoq lyis mhont tyamp.

⁹Gohtoeu dvkhonh gas Zipo lo Moab hwankti Balak gas Israel lyis jes sont las Beor lo Balam lyis khi lha namoq lyis nhoengh nhang.

¹⁰Nghuot laus eq ngos Balam lyis ma nhoengh nhang. Hauh gungsthaiq nyang namoq lyis shvmanh dyei. Housoeh ngos namoq lyis Balak loq masyah khyuot kat.

¹¹Tsai, namoq Yodan lvng goeu las Yerikho mas jweh los. Yerikho bang eq, Amori, Perizi, Khanan, Hiti, Girgashi, Hiwi yahge Yebusi jens teh namoq lyis zan. Nghuot laus eq ngos namoq lyis nyamoq dvnganh thoq mas ung cho yoh nhang.

¹²Namoq los zis yah dvyhangteh Amori hwankti aiq yuk lyis khat tyamp das xiklyis ngos nyamoq lyis lhoq yau dyei. Namoq dah moengsa yahge lyei gas cha ma yoh kuot.

¹³Namoq ma kuot dah mau, ma ci dah wus ngos namoq lyis dyei las namoq houmha nyeis. Namoq ma tsungh dah zvbiq nwis mas vshih, namoq ma tsung dah tsanlun zains mas vshih xauh zo nyeis.’

¹⁴Yoshua tsoq taiq zis gas, Housoeh yvmvyah namoq YHENSAIN lhyi nyoqnho ngelang dyei geh. Gyingh dah ehnyet yah lomluk luk phuqsoe geh. Mesopotamia mas, Egutu mas namoq dah phauh thyeih moq paiq khoq dah phvra lyis shang tyamp las YHENSAIN lhyi kyingh phuqsoe geh.

¹⁵Namoq YHENSAIN lhyi ma mes phuqsoe lhyi ka, hank lyis phuqsoe das zis khvnyhik thyet geh: Mesopotamia mas namoq dah phauh thyeih paiq khoq dah phvra lyis lah? Gvshih namoq nyeis Amori mau bang dah phvra lyis lah? Ngos yahge ngah yhenbang gas YHENSAIN lhyi dvpaiq das, ge.

¹⁶Dius jens phuk taiq zis gas, ngamoq YHENSAIN lhyi tyamp las gohtoeu dah phvra lyis khanhamp eq ma phuqsoe das.

¹⁷YHENSAIN, ngamoq dah Mangso ka, ngamoq uwus moq, nyamoq Egutu mau mas jons duot nyeis masyah shwih los las nyang kuot dah yomsoq muh ngamoq nyvng goeus. Ngamoq hau dius nyau jens mas suh lai los joqyos khanghmuh mas nyang ngamoq lyis gomh dyei.

¹⁸Ngamoq haih mau mas wvng los zis yah dvyhangteh YHENSAIN ka heimha nyeis, Amori jens dvnganh lyis khat tyamp. Housoeh yvmvyah ngamoq eq YHENSAIN lhyi phuqsoe das: khasoeh ge lyis nyang gas ngamoq dah Mangso nghuot, ge.

¹⁹Yoshua dius jens lyis zaih nhang zis gas, Namoq YHENSAIN lhyi lwis lwis ma yoh phuqsoe das: nyang gas gyingshang dah Mangso nghuot las gohtoeu mangso jens lyis ma mes phuqsoe nhang, noh dah Mangso nghuot. Namoq yaunos kuot lyis gomloeus toq lyis yobos ma khyuot dyei das.

²⁰Namoq YHENSAIN lhyi tyamp las lvbaus phvra lyis phuqsoe lyis gas, Nyang namoq lyis tyamp zis yah joeng das. Xik pheh namoq lyis gis zis kuot dyei laus eq namoq lyis mhont das, ge.

²¹Dius jens Yoshua lyis taiq zis gas, Ma nghuot, ngamoq YHENSAIN lhyi dvphuqsoe das, ge.

²²Yoshua dius jens lyis taiq: Namoq gas YHENSAIN lhyi phuqsoe das ge nyang lyis khyen yoeus goeus cho namoq nyang kanghjyoeng kat goeus, ge. Nyamoq eq, Ngamoq kanghjyoeng nghuot, ge.

²³Yoshua vmingh dyei zis gas, Housoeh lyis gas namoq mas joq dah lvbaus phvra lyis mhont tyamp las YHENSAIN, Israel dah Mangso lhyi dang jings das, oen nyhen toh geh, ge.

²⁴Dius jens Yoshua lyis taiq zis gas, YHENSAIN, ngamoq dah Mangso lhyi kyingh phuqsoe das. Nyang tyingtoh dang lyis domsyos gyo das, tsain ge.

²⁵Housoeh las hauh nyeih lyis Yoshua gas dius jens yah thanghchvp chvp las Shekhem mha nyamoq chank das xiklyis dang yahge lyi kuot toh dyei.

²⁶Yoshua gas haih tyingtoh dang lyis Mangso dah lyi buk mas lhaih toh. YHENSAIN dah gyingshang joqyos nvm mas wons dvzains bos. Yoshua gas luk kuh dvlom yoeus las hauh saiqzains khyei mha cuk toh.

²⁷Nyang dius jens dvnganh lyis taiq zis gas, Haih luk gas yah kanghjyoeng duot das. Mangso yang lyis taiq dang dvnganh hauh luk xauhgyo goeus. Housoeh las namoq gas namoq dah Mangso lhyi gomloeus ma toq das xiklyis gomh bas jungh hauh zis gas namoq dah kanghjyoeng duot joq, ge.

²⁸Hauh thang lyis Yoshua gas dius jens lyis pont kat. Nyamoq eq nyang yuk nyang toeu vso mau pheh tauh loh.

²⁹Haih zis dye thang lhyi YHENSAIN dah jyeidwis, Nun lo Yoshua gas dvxo dvci zvn bos lyis shei.

³⁰Nyang lyis nyah vso maunyeis Timnat Sera mha nyhop. Houka Ephraim boms mau, Gash boms dah mautsung pheh joq.

³¹Yoshua zaih lyis eq, Yoshua shei thang lhyi gyoh nyeis khoq las, Israel jens xiklyis YHENSAIN kuot dyei cho dvnganh lyis nyvng dah uhshe bang zaih lyis eq Israel jens gas YHENSAIN lhyi tsain paiq phuqsoe.

³²Egutu masyah Israel jens thuq los uhlyis yoeus los, Yosep dah shohyau lyis Shekhem mha nyhop. Houka Shekhem dah uwus Hamor lo jens jyank masyah Yosep uwus Yakop ngwis dvxo lhyi yah wis toh maunyeis nghuot. Hauh zis Yosep lo jens dah vso maunyeis nghuot.

³³Aron dah lo Eleaza shei lha nyang lyis Ephraim boms mau Gibea wus mas nyhop. Hauh zis gas nyah lo Phineha xauh yoeus dah maunyeis nghuot.