Read Achang YOSHUA 3 Bible Online

YOSHUA 3 - Achang bible

YOSHUA 3

¹Nungsnvp Yoshua yahge nyah Israel dius jens dvnganh gas nvpsangh noq yah toq las Shitim masyah thuot las Yodan lvng goeu das zis langh joqyos mas thoeng nyeis.

²Somh nyeih thang lhyi uhshe bang gas dvp gonh mas loh las,

³dius jens lyis taiq toh zis gas, Phudyei bang Lewi jens YHENSAIN namoq Mangso dah Thanghchvp Kwi dvng loh yvlyis nyvng lyis namoq eq namoq joqyos masyah chank toq chah.

⁴Namoq heicho ma loh ku shih las nyamoq gas namoq loh das cho shet das. Nghuot laus eq Thanghchvp Kwi yah tanh tanh vloh. Hauh thang mha main dvgohyih kyo lha loh geh, ge.

⁵Yoshua dius jens lyis taiq zis gas, Namoq dah gungs lyis gyingshang nhang geh: khasoeh ge lyis nvpyo YHENSAIN namoq mas yomsoq muh kuot das, ge.

⁶Tsai, Yoshua phudyei bang lyis taiq zis gas, Namoq Thanghchvp Kwi dvng las, dius jens dah xik pheh loh geh, ge. Nyamoq eq nyang taiq khyvlyis tsain kuot.

⁷YHENSAIN Yoshua lyis taiq zis gas, Khvnyhik ngos nvng lyis Israel dvnganhmoq xikkhonh mas dius zains dvyuk kuot xi das. Housoeh lyis ngos Moshe yah dvgeh nghuot khoq teh nvng yah eq nghuot yvlyis nyamoq soh das.

⁸Nvng Thanghchvp Kwi dvng dah phudyei bang lyis heisoeh taiq toh chah. Namoq Yodan lvng mas jweh lyis, jeis mas nang yap joq chah, ge.

⁹Housoeh Yoshua Israel jens lyis taiq zis gas, Los geh, YHENSAIN namoq dah Mangso taiq dah dang gyo yoeus geh.

¹⁰Namoq loh lyis Khanan, Hiti, Hiwi, Perizi, Girgashi, Amori yahge Yebusi jens lyis jyoengh khat tyamp lyis Kang dwis Mangso ka namoq mas nyeis zis namoq seq das.

¹¹Nyeisjvng YHENSAIN dah Thanghchvp Kwi ka namoq xik mas Yodan lvng goeu loh das.

¹²Gvshih Israel dvkoq mas dvyuk mulas, dius dvci aiq yuk khyen toh geh.

¹³Nyeisjvng dvnganh dah YHENSAIN Thanghchvp Kwi dvng dah phudyei bang dah khyeiwu Yodan lvng lyis nang kat lyis Yodan lvng gas dyet las jeismons pheh jeis gas nyhang boms joq das.

¹⁴Houka jyo yhomh nyos nghuot las jeis je nyeis. Dius jens gas Yodan lvng goeu das zis thoenggus masyah toq lyis, Thanghchvp Kwi dvng dah phudyei bang gas nyamoq xik pheh loh. Phudyei bang jeislvng mas nang yah dvyih,

¹⁶jeis yaus tauh loh las, toeu tsung zis yah Zarethan nvm Adam wus hweq nyhang doq loh. Jeis zai pheh eq Coh Thomh pheh yaus loh las jeis dyet loh. Dius jens gas Yerikho wus nvm pheh yoh goeu loh.

¹⁷Dius jens Yodan lvng mas tungyos cho goeu loh nyeis uhlyis YHENSAIN dah Thanghchvp Kwi dvng dah phudyei bang gas Yodan lvng gungs, tungyos mas yap joq. Housoeh Israel jens gas tungyos cho yah thyitvp pheh dye shoq goeu lai loh.