Read Achang YOSHUA 4 Bible Online

YOSHUA 4 - Achang bible

YOSHUA 4

¹Dius jens dvnganh Yodan lvng dye goeu lai lyis, YHENSAIN Yoshua lyis taiq zis gas,

²Dius jens dvkoq mas dvyuk mulas dius dvci aiq yuk khyen aq.

³Nyamoq lyis Yodan lvng gungs, phudyei bang yap yvmas dah lukzains dvci aiq lom yoeus wuq las khvnyens namoq thoeng das yvmas toh geh, oen taiq aq, ge.

⁴Housoeh Yoshua gas, nyang khyen toeuq toh dah dius dvci aiq yuk lyis khi lha,

⁵nyamoq lyis taiq zis gas, Namoq hau Yodan lvng gungs, namoq YHENSAIN Mangso dah Thanghchvp Kwi xik mas loh las Israel vkoq xiklyis lukzains dvyuk dvlom kui wuq suh geh.

⁶Haih luk jens gas dius jens lyis YHENSAIN kuot cho soh nhang das. Jweh los das shishenh lyis namoq dah lo jens gas namoq lyis, Haih lukzains jens gas namoq xiklyis chah vjyuk nghuot, ge nyei lyis,

⁷namoq gas, YHENSAIN dah Thanghchvp Kwi Yodan lvng goeu uhlyis jeislvng dyet tyamp, oen taiq kyoh chah. Housoeh hauh luk gas Israel jens lyis heimha cha bweh khoq cho lhyi vjangh soh nyeis nhang das, ge.

⁸Dius jens gas Yoshua taiq vgus chank kuot. YHENSAIN Yoshua lyis taiq toh vgus, Israel jens dvkoq mas dvyuk Yodan lvng gungs mas dah lukzains dvci aiq lom yoeus wuq las nyamoq thoeng joqyos mas khyoq toh.

⁹Yoshua eq Thanghchvp Kwi dvng dah phudyei bang tsain yap dah Yodan lvng gungs mas luk dvci aiq lom cuk toh. (Hauh zis houmha tsain joq shih).

¹⁰YHENSAIN Yoshua lyis yah dius jens lyis taiq nhang zis dvnganh dye kuot shoq phudyei bang gas Yodan lvng gungs mas tsain yap joq. Heika Moshe taiq toh zis nghuot. Dius jens eq thyitvp pheh lvnyap nyap goeu loh.

¹¹Dius jens dvnganh thyitvp pheh nghuot goeus ya, YHENSAIN dah Thanghchvp Kwi dvng dah phudyei bang gas dius jens dah xik pheh loh.

¹²Ruben vkoq, Gad vkoq yahge Manase vkoq dvgohyih eq Moshe nyamoq lyis taiq khoq vgus jesgungs yah gohtoeu dius jens xik mas tsain goeu loh.

¹³Nyamoq gas YHENSAIN xikkhonh mas jeszan das xiklyis sont zis nyeimons ko Yerikho nvm jangpa pheh tsain goeu loh.

¹⁴Hauh nyeihyo YHENSAIN ka Yoshua lyis Israel dvnganh nyoqlvtjvng mas kuhxing soeu kuot dyei. Housoeh las nyamoq gas Moshe lhyi phauh nyang teh nyang lyis nyah dvcaiq gonh phauh nyang.

¹⁵Hauh thang lhyi YHENSAIN Yoshua lyis taiq zis gas,

¹⁶Thanghchvp Kwi dvng dah phudyei bang lyis, Yodan lvng masyah doq los geh oen taiq aq, ge.

¹⁷Yoshua eq phudyei bang lyis, Yodan lvng masyah doq los geh, ge.

¹⁸Phudyei bang jyankyvm mas jweh lyis jeislvng gas doms yaus los las vkhang vgus dyingh dyingh nghuot joq.

¹⁹Cangxeih lhamhmuh khyvp dvci vnyeih lyis dius jens gas, Yodan lvng goeu las Yerikho dah buisthuq pheh Giga mas thoeng toh.

²⁰Yoshua gas Yodan lvng masyah yoeus los dah luk dvci aiq lom lyis Giga mas cuk toh.

²¹Housoeh nyang Israel jens lyis taiq zis gas, Jweh los das shishenh lyis namoq dah lo jens namoq lyis, Haih luk gas cha vjyuk tsain nghuot, ge nyei lyis,

²²Namoq nyamoq lyis, Israel jens Yodan lvng goeu shishenh lyis tungyos cho goeu lai los cho taiq kyoh das.

²³YHENSAIN, namoq dah Mangso ka ngamoq xiklyis Thomh Nes kyuk nhang teh, Yodan lvng lyis namoq dye goeu thyet shoq kyuk nhang toh zis nyamoq lyis taiq kyoh aq.

²⁴Haih gvng mas nyeisjvng dius khanghmuh gas YHENSAIN dah yomsoq kha iq kuhxing cho lhyi seq das. Namoq eq YHENSAIN, namoq dah Mangso lhyi vcaiq vto gyukwoms das, ge.