Read Achang YOSHUA 6 Bible Online

YOSHUA 6 - Achang bible

YOSHUA 6

¹Yerikho wus khomh gas toek nyheih las Israel jens lyis zungh nyeis. Wus masyah thuq wvng hank ma bos.

²YHENSAIN Yoshua lyis taiq zis gas, Yerikho wus, nyah hwankti yahge nyah dah womh jeslo jens ngos nah loq mas kyauh goeus.

³Nvng yahge nah jeslo jens hauh wus lyis dvnyeih lyis dvlhain mulas, khyuk nyeih jens lhaink chah.

⁴Phudyei nyhet yuk gas yvnglus khyau lvbuh dvyuk dvkoeuq chi lha Thanghchvp Kwi xik pheh loh chah. Housoeh nyhet vnyeih lyis hau phudyei bang gas lvbuh muot nyeis uhlyis namoq hauh wus lyis nyhet lhain suh lhaink chah.

⁵Hauh lvbuh thwe xing xing muot das, hauh lvbuh thwe xauhgyo yah dvyih dius dvnganhmoq gas yomkat las kaiq das. Hauh uhlyis hau wusciank gas gywis gyoh tyamp das, housoeh jes dvphung gonh dan dan wus vkhau mha wvng loh das, ge.

⁶Nun lo Yoshua phudyei bang lyis khi lha taiq, Thanghchvp Kwi dvng geh, namoq mas nyhet yuk gas yvnglus khyau lvbuh chi lha Thanghchvp Kwi xik mas loh geh, ge.

⁷Hauh thang lhyi nyang nyah dius jens lyis taiq zis gas, Toq geh, wus lyis suh lhaink geh, jesgungs chi bang YHENSAIN dah Thanghchvp Kwi xik mas loh bas jungh, ge.

⁸Housoeh las Yoshua dius jens lyis taiq zis yah dvyhangteh jesgungs chi bang gas lvbuh muot loh dah phudyei bang xik mas loh; hauh thang mha Thanghchvp Kwi dvng dah phudyei bang loh, jesgungs chi bang eq hauh thang mha chank jens loh. Housoeh jens loh nyeis uhlyis lvbuh thwe nyings nyeis.

¹⁰Nghuot laus eq Yoshua nyah dius jens lyis taiq toh zis gas, Vkaiq goh, ngos vmingh ma dyei dvchank namoq dang dvkhonh eq vtaiq goh, ge.

¹¹Housoeh nyang gas haih dius phung yah YHENSAIN dah Thanghchvp Kwi dvng las hau wus lyis dvlhain lhaink las thoenggus mas tauh los las houmha yhet.

¹²Yoshua gas nungsnvp noq yah toq las xik lyis nyeih yo teh kuot das zis vmingh dyei. Phudyei bang yahge jeslo jens gas wus lyis doms lhaink. Houka cangxeih lyis jesgungs chi bang, thang mha lvbuh nyhet koeuq muot dah phudyei bang nyhet yuk, hauh thang mha YHENSAIN dah Thanghchvp Kwi thyauh dvng dah phudyei bang, thang thank lyis jesgungs chi bang nghuot. Housoeh jens loh nyeis uhlyis lvbuh thwe nyings nyeis.

¹⁴Aiq vnyeih lyis eq nyamoq hauh wus lyis dvlhain lhaink lho lha thoenggus mas tauh los. Khyuk nyeih top housoeh kuot.

¹⁵Nyhet vnyeih lyis nyamoq nvpsangh nyoq nyvng lyis toq las wus lyis xikpheh lhaink vgus nyhet lhain jens lhaink. Hauh nyeih lyis kyingh hauh wus lyis nyhet lhain suh lhaink.

¹⁶Nyhet vlhain lhyi phudyei bang lvbuh muot kat bah ge lyis Yoshua dius jens lyis taiq zis gas, Kaiq geh, YHENSAIN ka namoq lyis hauh wus dyei goeus, ge.

¹⁷Wus yahge houmha zis dvnganh lyis YHENSAIN lhyi kyauh khyvlyis mhont tyamp chah. Nghuot laus eq nghe nyhiq Rahab yahge nyah yhenbang lyis kyingh kang dwis nhang geh, khasoeh ge lyis nyang gas yang nhang kat dah joh yoeuh bang lyis shung kat, ge.

¹⁸Namoq gas mhont tyamp chah dah vyhang cha lhyi eq vyoeus goh; yoeus lyis gas Israel thoenggus mas yau cho yahge monh loh cho she los das.

¹⁹Ngwis, xing, thunk, thyeq yah kuot dah vyhang dvnganh lyis gas YHENSAIN xiklyis toh geh. Houka YHENSAIN ziskwi mha kat toh chah, ge.

²⁰Housoeh phudyei bang lvbuh muot kat. Dius jens hauh zis xauhgyo yah dvyih yomkat las tsain kaiq las wusciank gas gywis gyoh tyamp. Housoeh jesphung ka vsainnyang yah twi twi wvng las wus lyis yoeus.

²¹Wus vkhau mha nyeis ya nyeis vbusbih, vmesbih, ngislo kuhlo dvnganh lyis nyamoq moengsa yah sat. Noeu, mauhlyihzoe yahge yvng lyis eq sat.

²²Hauh thang lhyi hauh wus lyis joh los yoeuh khoq dah dius aiq yuk lyis Yoshua taiq zis gas, Nah aiq yuk dangthoengh toh zis yah dvyhangteh nghe nyhiq yhen mha loh las nyang yahge nyah yhenbang lyis shwih thuq los geh, ge.

²³Housoeh las nyah aiq yuk loh las Rahab yahge nyah ungwes uwus, nyah vmang vnoeuh, nyah yhenbang yah dvgeh shwih los. Nyamoq gas nyah yhenbang dvnganh lyis gau dah Israel thoenggus nvm mas toh.

²⁴Wus yahge houmha bos zis dvnganh lyis nyi yah ngheq tyamp. Ngwis xing, thunk yahge thyeq yah kuot dah kyahsoe lhyi ka YHENSAIN dah ziskwi mas kat toh.

²⁵Yoshua gas nghe nyhiq Rahab yahge nyah buisnoms jens dvnganh lyis kang dwis nhang toh. Khasoeh ge lyis nyang gas Yerikho wus lyis joh yoeuh das xiklyis Yoshua nhang dah vzomh lyis shung kat. (Nyah vnyau vshih gas khvnyhik jweh shoq Israel jens mas nyeis.)

²⁶Yoshua yhaugyen dah dangthoengh toh zis gas, Yerikho wus lyis doms kuot soeu ka YHENSAIN xikkhonh mas nhoengh zis xauh bas jungh. Hank laus eq hauh yhenpom ci soeu ka nyah yukgis loxeih somh das. Hank laus eq hauh khyam khomh ci soeu ka nyah yukgis lo thank somh das, ge.

²⁷YHENSAIN ka Yoshua yah dvgeh nghuot las nyah nyings hoeuh cho ka dvmau gonh dyos loh.