Read Achang YOSHUA 7 Bible Online

YOSHUA 7 - Achang bible

YOSHUA 7

¹Yerikho wus mas mhont tyamp chah dah vyhang cha eq ma yoeus das xiklyis YHENSAIN Israel jens lyis tying toh yvlyis domsyos ma gyo. Akhan ge soeu ka hauh vmingh lyis ma gyo las YHENSAIN ka Israel jens lyis nhaiqlom tsoeu. Akhan ka Yuda vkoq Zera vhuh, Kami dah lo, Zabdi dah nyeilo nghuot.

²Yoshua gas Yerikho masyah dius nhang lha Bethel buisthuq shot, Bet-Awen nvm mas joq dah Ai wus lyis joh yoeuh nhang. Dius jens eq Ai wus lyis loh yoeuh.

³Nyamoq Yoshua lyis los taiq zis gas, Ai ka wus kuh ma nghuot las dius dvnganh lyis ma loh zan nhang noh, aiq khyoengh somh khyoengh ko dvnhang noh, ge.

⁴Housoeh las Israel dius somh khyoengh ko loh doq zan. Nghuot laus eq nyamoq gas Ai wus bang xikkhonh masyah phang chah.

⁵Ai wus bang gas Israel jens lyis wus khomh masyah luk khwih jang mas jweh shoq chank khat gyoh los cho mha somhci khyuk yuk ko sat zis xauh. Housoeh las Israel jens gas womh ehnyet ma bos lo shoq tsain gyuk.

⁶Yoshua yahge Israel logis jens gas nyamoq dyi langchuiq, nyamoq uhloms mas tsohmop lhoeuh, YHENSAIN dah Thanghchvp Kwi xik mas nyenhyo jweh shoq paiq gop joq zis yah nyamoq dah nhaiqkuk cho chixoeuq.

⁷Yoshua taiq zis gas, YHENSAIN Mangso eh, nvng ngamoq lyis Amori loq mas kyauh las mhont das zis Yodan lvng haqtvp pheh chamus shwih los? Ngamoq gas Yodan lvng thyitvp pheh nyeis mes.

⁸YHENSAIN eh, gvshih Israel jens jeswus masyah phang zis gas ngos khasoeh taiq das lah?

⁹Khanan dius yahge haih mau mas bang dvnganh haih cho xauhgyo lyis ngamoq lyis los lhaink las ngamoq dvnganh lyis sat das. Housoeh las nah kuhxing nyings xiklyis khasoeh kuot das lah, ge.

¹⁰YHENSAIN Yoshua lyis taiq zis gas, Toq aq, nvng chamus heisoeh gop joq?

¹¹Israel jens yaunos kuot goeus, ngos nyamoq lyis chank chah oen tying toh, ngah thanghchvp lyis thyoq goeus. Ngos mhont tyamp nhang dah vyhang lhyi yoeus goeus. Khauh las hwah zis yah hauh zis nyamoq dah zisyos mha kat toh.

¹²Housoeh yvmvyah Israel jens jeswus xikkhonh mas ma yoh yap, nyamoq jeszan masyah nungs phuk las phang chah. Ngos nyamoq lyis mhont zis xauh nhang goeus. Ma gis yoeus dah vyhang lhyi ma mhont tyamp lyis gas ngos namoq yah dvgeh ma nyeis lo.

¹³Toq aq, dius jens lyis cheihshang lha ngah xikkhonh mas los das xiklyis cicont kuot geh. Nyamoq lyis ngos YHENSAIN, Israel Mangso haih zis taiq chah yvmvyah phvnaq nyeihyo xiklyis cicont kuot geh oen taiq aq. Israel jens eh, mhont tyamp geh oen tying toh dah vyhang namoq mas joq. Hauh zis namoq masyah ma shang tyamp dvchank, namoq jeswus xikkhonh mas ma yoh yap.

¹⁴Housoeh las namoq nvpyo vkoq khyvlyis shwih los chah. Hou mhayah ngos comh dah vkoq gas nyah vhuh khyvlyis los chah. Hou mhayah ngos comh dah vhuh gas nyah yhenbang khyvlyis los chah. Housoeh ngos comh dah yhenbang mas dvyuk thang lhyi dvyuk los chah oen nyamoq lyis taiq aq.

¹⁵Nhoengh dah vyhang bos ge comh zis xauh soeu ka, nyang eq, nyah yhenbang eq, nyang yoh ya yoh zis lyis eq nyi ngheq tyamp chah: Khasoeh ge lyis nyang gas ngah thanghchvp thyoq las Israel mas gyukphoh xoqphuh cho she los, ge.

¹⁶Housoeh las Yoshua gas nvpsangh noq yah Israel lyis nyah vkoq khyvlyis shwih los. Hauh zis Yuda vkoq lyis comh.

¹⁷Yuda vkoq mas vhuh khyvlyis shwih los lyis Zera vhuh lyis comh. Zera vhuh mas yhenbang khyvlyis shwih los lyis Zabdi yhenbang lyis comh.

¹⁸Hauh thang lhyi nyang Zabdi yhenbang dvyuk thang lhyi dvyuk shwih los lyis Zabdi dah nyeilo, Kami dah lo Akhan lhyi comh.

¹⁹Yoshua Akhan lhyi taiq zis gas, Ngah lo eh, YHENSAIN, Israel dah Mangso xikkhonh mas jyoeng zis taiq las curhen aq. Nvng cha kuot goeus zis gvshih ngos lyis taiq kyoh aq, vzauh toh, ge.

²⁰Akhan Yoshua lyis phuk taiq zis gas, Nghuot goeus, ngos YHENSAIN, Israel dah Mangso lhyi cu goeus, heika ngos kuot zis nghuot.

²¹Hau lvnyhvp mas yungh dah Babilon lungphauq dvdung, ngwis kyvp oeng paung, dvpaung nyet lyei dah xing dvtungh lyis ngos svsoh o lha yoeus goeus. Ngah zvng khau mha ngwis gas vtheh mas kat las nyhop toh, ge.

²²Housoeh las Yoshua dius nhang lha, nyamoq hauh zvng mas wuih las, hau nhoengh goeus dah vyhang, ngwis gas vtheh mas kat nyhop shung toh zis loh nyvng.

²³Nyamoq hauh yvlyis zvng masyah yoeus las Yoshua yahge Israel jens dvnganh jyank mas chi loh las YHENSAIN xikkhonh mas toh.

²⁴Yoshua yahge nyang yah dvgeh nghuot dah Israel jens dvnganh gas, Akhan, hau ngwis, lungphauq, xing tungh, nyah loloeu lonyi, nyah noeu jens, nyah mauhlyihzoe jens, nyah yvng jens, nyah zvng, nyang yoh ya yoh zis dvnganh lyis nyhik las Soe langhkhau mha yoeus e.

²⁵Yoshua taiq zis gas, Nvng ngamoq lyis chamus houteh yau cho she los? Gvshih YHENSAIN ka nah thoq mas yau she los das, ge. Housoeh dius jens gas Akhan lhyi lukzains yah doeuh sat. Nyah yhenbang lyis eq doeuh sat las nyah zisyos eq cheq ngheq tyamp.

²⁶Nyamoq gas nyah thoq mas lukzains nyoshoq boms toh las khvnyhik jweh shoq joq. Housoeh yvmvyah hauh langhkhau lhyi Soe Langhkhau ge lui shih. YHENSAIN eq nyah nhaiqyo bi tyamp.