Read Achang YOSHUA 8 Bible Online

YOSHUA 8 - Achang bible

YOSHUA 8

¹YHENSAIN Yoshua lyis taiq zis gas, Vgyuk, nhaiqlom vthank, nvng yah dvgeh dah jes jens dvnganh shwih las Ai wus pheh toq loh aq. Ngos nvng lyis Ai hwankti thoq mas ung cho dyei das; housoeh nyah dius jens, nyah wus, nyah mau gas nah zis duot das.

²Nvng Yerikho wus yahge nyah hwankti lhyi kuot teh Ai wus yahge nyah hwankti lhyi kuot chah. Nghuot laus eq haq lhain ka houmha dah lvnyhvp yahge gaunyhauq lyis gas nah xiklyis yoeus aq. Wus dah nungsthank pheh lhom zan das dvp toh aq, ge.

³Housoeh las Yoshua gas nyah jesphung dvnganh yah dvgeh Ai wus lyis loh zan das xiklyis cicont kuot toh. Nyang gas yombos dah jes thoeuqzoe somh mons khyen lha nyenh lyis nhang kat.

⁴Nyang taiq kat zis gas, Namoq gas wus nungsthank pheh tamh joq geh, wus yah nyoshoq vwe loh nhang, zan das zis cicont kuot toh geh.

⁵Ngos yahge ngah dius jens gas wus mas ni loh das. Ai wus bang thuq los las ngamoq lyis khat los lyis xikpheh teh ngamoq gas phang dyei das.

⁶Nyamoq eq wus masyah thuq las we shoq chank khat das. Ngamoq gas nyamoq dah xikkhonh masyah xikpheh teh phang goeus ge nghamh das.

⁷Hauh uhlyis namoq gas namoq tamh joq masyah thuq los las wus lyis los wvng yoeus das. YHENSAIN, namoq dah Mangso ka hauh wus namoq lyis dyei das.

⁸Wus xauh yoeus lhyi, YHENSAIN taiq toh zis yah dvyhangteh hauh yvlyis nyi ngheq chah.

⁹Housoeh las Yoshua gas nyamoq lyis nhang kat. Nyamoq eq Bethel yahge Ai vjo, Ai dah buiswvng pheh lhom nyeis. Yoshua gas hauh nyens lyis thoenggus mas yhet shih.

¹⁰Yoshua gas nvp lyis noq yah toq, jeslo jens lyis lui tsainh. Hauh thang lhyi nyang yahge Israel choshe bang gas jesphung lyis Ai wus pheh shwih loh.

¹¹Nyang yah dvgeh loh dah jeslo jens gas wus khomh zainsmuh pheh loh las mautsung pheh thoeng nyeis. Hauh joqyos yahge Ai wus jo mas langhkhau dvkoeuq bos.

¹²Ai wus dah buiswvng pheh, Ai wus yahge Bethel jo mas dius oeng khyoengh ko lhom nyeis nhang.

¹³Nyamoq joqyos tsain gvn las jesphung zainsmuh lyis hauh wus dah mautsung shot toh. Gohtoeu dvyhamh lyis buiswvng shot pheh toh. Yoshua gas hauh langhkhau mha yhet.

¹⁴Ai hwankti Yoshua dah dius jens lyis nyvng lyis nyang lvnyap sont. Hwankti ka nyah dius jens yah dvgeh Israel jens lyis zan das xiklyis xik pheh dah joqyos Yodan langhkhau pheh thuq loh. Nyang lyis nungsthank pheh yah los zan das zis ma seq.

¹⁵Yoshua yahge nyah dius jens dvnganh gas jes somh teh kuot las mhanhdyvp cho phang.

¹⁶Nyamoq lyis chank khat das xiklyis wus mas bang dvnganh gas khi zis xauh las, Yoshua moq lyis chank khat lyis nyamoq gas wus yah we loh.

¹⁷Ai wus mas bang yuk khanghmuh gas Israel jens lyis chank khat loh. Wus khomh phank hanh toh khoq las wus lyis hank ma gos lo.

¹⁸YHENSAIN Yoshua lyis taiq zis gas, Nah lham lhyi Ai wus pheh tuonh aq. Hauh wus ngos nvng lyis dyei ge. Yoshua eq nyang lyis taiq vgus kuot.

¹⁹Housoeh nyah loq toeu yah dvyih tamh joq bang lvnyap toq las wus vkhau mha wuih wvng zis yah wus lyis yoeus tyamp. Nyamoq wus lyis nyi lvnyap ngheq kat.

²⁰Ai wus bang lhain yoeuh lyis hauh wus mas dah nyikhauh gas maukhung thuk toh zis lyis nyvng. Nyamoq xiklyis phang luiq das cho ma bos lo, khasoeh ge lyis mhanhdyvp pheh phang dah Israel jens eq nyamoq lyis doms yoh tauh zan.

²¹Gohyhamh bang wus lyis yoeus las nyi ngheq kat yvlyis Yoshua yahge nyah dius jens nyvng lyis nyamoq tauh los las Ai wus bang lyis sat.

²²Gvshih wus mas dah Israel jens gyoh los las jes xonh zan. Ai wus bang gas nyamoq lyis Israel jens yah nyhamh lhunk toh goeus zis soh. Nyamoq dvnganh sat zis xauh, dvyuk eq ma luiq, dvyuk eq ma nyet lo.

²³Ai hwankti lhyi ka vdwis xauh nyhik las Yoshua jyank mas shwih los.

²⁴Israel jens gas nyamoq dah jeswus dvnganh lyis mhanhdyvp mas chank khat jweh los yvmas sat. Hauh thang lhyi Ai wus pheh tauh loh las houmha bang dvnganh lyis sat.

²⁵Ai wus bang yuk khanghmuh ma dye mhont dvchank Yoshua tuonh toh lham ma khyoq tsoq toeu toh. Hauh nyeih lyis Ai wus bang vbusbih, vmesbih dvnganh lyis dvmons aiq khyoengh sat.

²⁷YHENSAIN Yoshua lyis taiq zis yah dvyhangteh, hauh wus mas dah lvnyhvp yahge gaunyhauq dvnganh gas Israel jens nyamoq xiklyis yoeus.

²⁸Yoshua gas Ai wus lyis ngheq tyamp las dyoqbis joq. Khvnyhik jweh shoq housoeh nghuot joq.

²⁹Nyang gas Ai wus hwankti lhyi saiqzains mas lhangh tyamp las nyah mvng gas nyenhthang jweh shoq lhangh toh. Buiswvng lyis Yoshua taiq kat vgus, nyah mvng lyis yoeus khyoq las wus khomh pheh loh yvmas doeuh toh. Hauh thoq mas luk boms zainsmuh toh, hauh zis khvnyhik jweh shoq houmha joq.

³⁰Hauh thang lhyi Yoshua gas Ebal boms mas YHENSAIN, Israel dah Mangso xiklyis phon dvkoeuq ci.

³¹Thyeq yah ma bat khangh dah luk yah phon ci chah ge, Moshe dah lyi mas shet toh vgus YHENSAIN dah jyeidwis Moshe Israel jens lyis taiq toh zis yah dvyhangteh nyang ci. Houmha nyamoq YHENSAIN lhyi ngheq dyei jyungshuk yahge nyenstap jyungshuk tsain dyei.

³²Yoshua gas hauh luk thoq mas Moshe nyang lhaih toh lyi lyis Israel jens xikkhonh mas tsain lhaih toh.

³³Israel dius jens shvmanh yoh das cho, YHENSAIN dah jyeidwis Moshe xikpheh yah taiq toh zis yah dvyhangteh, Israel dvnganh, nyamoq dah choshe bang, zau jens, soetuon bang, nyamoq mas bos dah gohmau bang eq, YHENSAIN dah Thanghchvp Kwi aiq shot pheh yap las hauh kwi dvng dah phudyei bang Lewi jens shot pheh nyoqnho xoeu toh. Nyamoq gas Gerizim boms pheh dvgohyih, Ebal boms pheh dvgohyih nungs phuk yap joq.

³⁴Hauh thang lhyi Yoshua gas shvmanh zis yahge nhoengh zis bos dah lyi dvnganh, maussauh mas lhaih toh vgus than than nghap.

³⁵Yoshua gas Moshe tyingtoh dang dvnganh, vmesbih jens, loshang jens, nyamoq mas nyeis dah gohmau bang eq bos dah Israel moqphung lhyi nghap kyoh.