Read Achang YOSHUA 9 Bible Online

YOSHUA 9 - Achang bible

YOSHUA 9

¹Yodan lvng buiswvng shot pheh jing mas, khau mha, Mediteranean thomh jyankyvm pa chank yah mautsung pheh Lebanon boms jweh shoq mas tsain nyeis dah hwankti jens dvnganh Israel jens dah ung cho lhyi xauhgyo. Hauh bang gas Hiti, Amori, Khanan, Perizi, Hiwi yahge Yebusi hwankti jens tsain nghuot.

²Yoshua yahge Israel jens lyis jeszan das xiklyis nyamoq dvnganh dvgeh xonh las tsain huom.

³Nghuot laus eq Hiwi dius, Gibeon mas bang gas Yoshua Yerikho yahge Ai wus lyis kuot cho xauhgyo.

⁴Housoeh nyamoq Yoshua lyis mhuih das ge tsain nghamh thyet. Housoeh nyamoq zonoms xo lha mauhlyihzoe tu mas yanghthung tyang yah zwis, pho dah zvbiq shohyeis tyvp wons.

⁵Dyityang wuot, pho dah thyvkoq tyang koq, zokho eq kyuk las mauhjungh yuk goeus zis wons.

⁶Nyamoq Giga thoenggus mas jweh los las Yoshua yahge Israel jens lyis taiq zis gas, Ngamoq gas we mau masyah los. Namoq yah buisnoms kuot mes, ge.

⁷Nghuot laus eq Israel jens taiq zis gas, Ngamoq namoq yah buisnoms chamus kuot chah. Namoq gas ngamoq nvm mas nyeis mvbeh, ge.

⁸Nyamoq Yoshua lyis taiq zis gas, Ngamoq gas nah jyeidwis jens nghuot, ge. Yoshua nyamoq lyis nyei zis gas, Namoq hank nghuot? Khapheh yah los goh lah, ge.

⁹Hauh thang lhyi nyamoq haih mvnyei taiq: Ngamoq gas svsoh we mau masyah los: khasoeh ge lyis YHENSAIN, nah Mangso dah cho xauhgyo. Egutu mas nyang kuot cho dvnganh xauhgyo.

¹⁰Yodan lvng buisthuq pheh dah Amori hwankti aiq yuk lyis kuot cho: Heshbon mas dah hwankti Sihon, Ashtarot wus mas nyeis Bashan hwankti Og lyis kuot cho tsain nghuot.

¹¹Ngamoq dah uhshe bang yahge dius dvnganh gas ngamoq lyis zokho sont wons las nvng lyis los xauhgoh nhang. Nyamoq taiq kat zis gas, Ngamoq gas namoq dah jyeidwis nghuot. Housoeh las gvshih ngamoq yah buisnoms kuot goh, ge.

¹²Ngamoq yhen mhayah namoq jyank mas thuq los nyeih lyis haih zokho ka nywe nywe dvnghuot, yoeuh aq, gvshih kyuk las mauhjungh yuk goeus.

¹³Ngamoq haih shohyeis tyvp mas zvbiq tyink uhlyis houka vsaiq dvtsain nghuot, yoeuh aq, gvshih juiq goeus. Ngamoq dyimis yahge thyvkoq eq cho we yvmvyah tyang goeus, ge.

¹⁴Israel jens gas Yhensain jyank mas dang ma nyei, nyamoq jyank masyah zonoms lhom yoeus.

¹⁵Yoshua gas Gibeon dius jens yah buisnoms kuot las nyamoq lyis kang dwis nhang toh. Israel dius phung mha dah uhshe bang eq nyamoq yah buisnoms kuot cho mha maukhi.

¹⁶Nyamoq yah buisnoms kuot thang lhyi somh nyeih lyis hauh bang gas nyamoq nvm mas nyeis bang dvnghuot zis seq.

¹⁷Housoeh las Israel jens loh lyis somh nyeih thang lhyi nyamoq nyeis dah wus mas tsain jweh loh. Nyamoq wus gas Gibeon, Khephira, Berot yahge Kiriat Yearim tsain nghuot.

¹⁸Nyamoq dah uhshe bang gas YHENSAIN, Israel dah Mangso nyings masyah nyamoq lyis dangthoengh toh goeus yvmvyah, Israel jens gas nyamoq lyis ma yoh sat. Dius jens dvnganh gas haih cho hauh uhshe bang lyis lop.

¹⁹Nghuot laus eq Uhshe bang phuk taiq zis gas, Ngamoq nyamoq lyis YHENSAIN, Israel dah Mangso dah nyings yah dangthoengh toh goeus las yang nyamoq lyis ma yoh nos nhang.

²⁰Yang nyamoq lyis dangthoengh toh goeus yvmvyah, yang nyamoq lyis kang dwis nhang chah. Yang nyamoq lyis kang ma dwis nhang lhyi, Mangso yang lyis joeng das.

²¹Uhshe bang nyamoq lyis taiq zis gas, Nyamoq lyis kang dwis nhang toh goh. Nghuot laus eq nyamoq gas yah xiklyis jeis kham thangh yoeus kuot dyei chah, ge.

²²Yoshua Gibeon dius jens lyis khi los nhang lha taiq zis gas, Namoq gas heimha nyeis las, Ngamoq gas we mau masyah los, oen ngamoq lyis chamus mhuih goh lah, ge.

²³Namoq heisoeh kuot goeus yvmvyah, Mangso namoq lyis nhoengh toh zis gas, Nah dius jens gas vjangh yah jons mus las ngah Mangso dah yhen xiklyis jeis kham thangh yoeus kuot das, ge.

²⁴Nyamoq Yoshua lyis phuk taiq zis gas, Ngamoq haih zis kuot goeus. Khasoeh ge lyis haih mau dvnganh namoq lyis dyei las, dius jens dvnganh lyis namoq xikkhonh masyah mhont das ge YHENSAIN, nah Mangso nyah jyeidwis Moshe lhyi taiq cho lhyi ngamoq xauhgyo goeus. Housoeh las ngamoq namoq lhyi gyuk; ngamoq kang lhyi chiq yvmvyah heisoeh kuot goeus.

²⁵Gvshih gas ngamoq nah yomsoq khau mha nghuot: nvng nghamh lyis jus zis ngamoq lyis kuot aq, ge.

²⁶Housoeh las heika Yoshua kuot cho nghuot: Nyang nyamoq lyis khomp toh dyei las Israel jens yah sat das yvlyis vmingh ma dyei.

²⁷Nghuot laus eq dvlhain dvm lyis nyang nyamoq lyis Israel jens xiklyis eq, YHENSAIN dah phon xiklyis eq, jeis kham thangh yoeus das nyhenshang jons kuot nhang toh. Paiq das nyhenshang YHENSAIN khyen yoeus dah joqyos mas khvnyhik jweh shoq haih muh tsoq kuot nyeis.