Read Achang 2 THESALONI 2 Bible Online

2 THESALONI 2 - Achang bible

2 THESALONI 2

¹Ngah boekyis eh, yah Yhensain Yesu Khristu doms jweh los das cho yahge Yhensain yah dvgeh nyeis das nyhenshang xwih tsainh zis xauh das cho yah sen lha ngos namoq lyis shangphu.

²Yhensain doms jweh los das ge dius jens taiq gvng mas namoq dah ehnyet mas lvnyap khamkhvv cho, nhunk cho ma bweh bas jungh, namoq lyis taiq kyingh kat. Housoeh ge dah dang gas, ngamoq lvpe dang taiq uhlyis, nghuot ya Gausyis dang taiq kyoh uhlyis, nghuot ya maussauh lhaih uhlyis bos dah dang nghuot ge nghamh lyis nghamh hah das.

³Khasoeh nghuot laus eq namoq lyis hank khasoeh eq ma mhuih jyomh bas jungh. Khasoeh ge lyis thang thank dah Mangso lhyi gomloeus toq cho ma bweh shih lyis, munyi thomh mas khyoq zis xauh das. Lhung soeu ma thuq los dvchank hauh buisnyeis jweh das zis ma nghuot.

⁴Nyang gas dius jens paiq nyeis dah mangso bos ya bos yvlyis tyixo lha, nyang gungs nyang gas dvnganh dah thoq lyis phunk zes bos soeu nghuot ge chungh zo das. Nyang gas Mangso dah yhenmuh mas yangh wvng tsung lha nyang gungs nyang Mangso nghuot ge taiq hoeuh das.

⁵Ngos namoq yah dvgeh nyeis shih uhlyis, haih cho dvnganh ngos namoq lyis taiq kyoh ku goeus yvlyis ma tsain soh lo goh lhyeh?

⁶Nghuot laus eq hauh cho gvshih ma bweh los shoq kyoq toh zis dvja ja bos. Hauh zis cha nghuot yvlyis namoq seq. Shishenh jweh lyis hau Lhung Soeu thuq los das.

⁷Seqgyo yau, hau nghop toh dah lhung cho ka gvshih yangh muh kuot nyeis goeus; nghuot laus eq kyoq toh soeu lhyi nyah joqyos masyah shang tyamp shishenh ma jweh dvchank hauh cho bweh los das zis ma nghuot.

⁸Hauh thang lhyi hau Lhung soeu thuq los das, nghuot laus eq Yhensain Yesu jweh los lyis Lhung soeu lhyi nyah nhuot mas soq yah sat las nyah dah duk bvng phunk yah mhont tyamp das.

⁹Hau Lhung soeu ka Satan dah yomsoq yah jweh los das las hwah dah yomsoq muh yahge mauh loqmuh vja ja kuot xoeuq das.

¹⁰Hauh thoq lyis dyoqbis xauh das bang dah thoq mas ma gis ma shop khyvlyis mhuih cho vja ja kuot das. Nyamoq gas khyuot yoeus xauh das nyhenshang hau jyoeng cho lhyi ma lhom yoeus, ma jyet yvmvyah nyamoq dyoqbis tyamp das.

¹¹Housoeh yvmvyah nyamoq gas shuot cho lhyi lomsjingh shoq Mangso ka shuot cho dah yomsoq lyis nyamoq mas muh khanh das nyhenshang nhang kat.

¹²Housoeh hau jyoeng cho lhyi ma lomsjingh, yaunos dah pyo cho mha chank suh bang dvnganh gas dang thang thyet zis xauh das.

¹³Yhensain dah jyetdap boekyis eh, namoq gvng mas ngamoq gas Mangso dah jyehjuh lyis vjangh yoh chungh das. Khasoeh ge lyis, Mangso ka namoq lyis gyingshang bang kuot dyei dah Dyos dah yomsoq yah eq, jyoeng yvlyis lomsjingh dah namoq dah lomsjingh cho yah eq, cangxeih dah khyuot yoeus xauh bang khyvlyis namoq lyis khyen yoeus goeus.

¹⁴Mangso ka namoq lyis ngamoq taiq kyoh dah gausyis dang cho yah namoq lyis khi yoeus goeus. Nyang gas yah Yhensain Yesu dah phunk masyah namoq kham yoeus vvng dah gvmboms lyis yoh sain bas jungh ge khi yoeus.

¹⁵Housoeh yvmvyah boekyis eh, ngamoq taiq kyoh dah gausyis dang khyvlyis eq, huon maussauh khyvlyis eq ngamoq namoq lyis jyauh, hau jyoeng dah cho mha goeng goeng thoenk yap las zwi zains toh geh.

¹⁶Yah Yhensain Yesu nyang yahge yang lyis jyetdap las nyah jyehjuh yah yang lyis vcaiq vto goeng joq dah womh zis yahge goeng dah nghamhloms cho dyei soeu Uwus Mangso ka,

¹⁷namoq lyis vjangh gis dah cho taiq zis yah yoh zwi khank nyeis bas jungh yomdyei zis yah goeng toenk nhang nyeis bas jungh.