Read Achang 2 THESALONI 3 Bible Online

2 THESALONI 3 - Achang bible

2 THESALONI 3

¹Ngamoq dah boekyis eh, thang thank namoq lyis tying toh mes zis gas, Yhensain dah dang gas namoq mas jweh ngap los teh, tsoq las lvnyap jweh ngap loh las nyoqnho ngelang dyei zis yah yoh lhom yoeus das nyhenshang ngamoq xiklyis shvmanh bos dung nyeis geh.

²Mangso ka ngamoq lyis ma gis ma shop, lhung bang dah loq masyah khyuot kat bas jungh, shvmanh bos dung dyei geh: khasoeh ge lyis, hau gausyis loeus lyis dius yuk khanghmuh lomsjingh zis ma nghuot.

³Nghuot laus eq Yhensain ka wontang lha, nyang namoq lyis ehnyet yombos nhang lha ma shop soeu dah jes kuot masyah gomh dyei das.

⁴Namoq gas, ngamoq tying ya tying toh yvlyis tsain chank kuot nyeis zis yah dvyhangteh tsoq las kuot nyeis das oen nghamhnywe dah ehnyet Yhensain ngamoq lyis dyei.

⁵Namoq Mangso dah jyetdap cho lhyi zes seqgyo los das zis yahge Khristu dyei dah jhen cho lhyi seqgyo das nyhenshang eq, Yhensain ka namoq lyis choshe bas jungh.

⁶Boekyis eh, lan zis yah kang dwis nyeis bang dvnganh yah eq, ngamoq jyauh cho lhyi ma chank bang yah eq, ma zomh zomh gohtoeu toeu nyeis das xiklyis yah Yhensain Yesu Khristu nyings masyah ngamoq namoq lyis vmingh dyei.

⁷Namoq gas ngamoq kuot xoeuq dah yikhyoh yah dvyhangteh chank kuot vvng cho namoq nyang vlhomuh seq. Ngamoq namoq yah dvgeh nyeis shishenh lyis ngamoq lan dah yikhyoh ma chixoeuq.

⁸Ngamoq gas phauh ma dyei hank dah pangh cho eq ma lhom yoeus. Hauh gungsthaiq namoq hank lyis eq yvwons ma huon bas jungh, ngamoq nyeih nyenh muh tsain zwi shangh lai loh goeus.

⁹Ngamoq housoeh kuot zis gas ngamoq mas namoq jyank masyah pangh thuk das cho sang das toeuh ma bos las ma nghuot, namoq chank kuot das xiklyis yikhyoh bweh bas jungh oen dvtsain kuot.

¹⁰Namoq yah dvgeh nyeis shih uhlyis, Muh ma mes zwi soeu ka wom eq ma zo goeus jungh, oen ngamoq namoq lyis tying toh ku.

¹¹Ngamoq haih cho chamus taiq lah oen lhyi, namoq mas dvyhamh lan zis yah kang dwis las, chah muh ma zwi zwi, gohyuk dah muh mas bos nhunk bang bos cho ngamoq xauhgyo.

¹²Housoeh kuot nyeis bang gas, nyamoq gis khyvlyis vlhomuh nyeis las nyamoq nyang womdau khoeu muh zwi zo nyeis bas jungh oen, Yhensain Yesu Khristu dah nyings mas ngamoq taiq kyingh zaih nhang.

¹³Nghuot laus eq boekyis eh, namoq gis dah muh zwi das zis vnyung vdaus nyeis goh.

¹⁴Haih maussauh mas ngamoq namoq lyis lhaih huon dah dang lyis domsyos ma gyo soeu dvyuk yuk bos lyis, nyang lyis comh toh las: nyang xoq bas jungh, nyang yah vzomh goh.

¹⁵Nghuot laus eq nyang lyis jeswus lyis teh vkuot goh, vmang vnoeuh lyis teh taiq kyingh zaih nhang geh.

¹⁶Yah nyenstap vpom nghuot dah Yhensain ka namoq lyis cho khvt khanghmuh mas vjangh yah nyenstap cho dyei bas jungh. Yhensain ka namoq dvnganhmoq yah dvgeh nghuot bas jungh.

¹⁷Haih zis ngos ngvnyang loq yah lhaih: Paulo Jeshuh kat. Ngos lhaih huon maussauh khanghmuh mas ngah loqyos gas haih zis nghuot. Ngos heisoeh gyangh lhaih.

¹⁸Yah Yhensain Yesu Khristu dah jyehjuh gas namoq dvnganhmoq yah dvgeh joq bas jungh.