Read Achang 1 TIMOTHI 2 Bible Online

1 TIMOTHI 2 - Achang bible

1 TIMOTHI 2

¹Housoeh yvmvyah cangxeih lyis dius dvnganhmoq dah nyhenshang Mangso jyank mas shangphu cho, shvmanh dung cho, bos khyoeuq cho yahge jyehjuh chungh cho kuot nyeis aq oen ngos nvng lyis taiq kyingh kat.

²Yang gas Mangso lhyi gyukwoms cho dvnganh mas vlhomuh chank suh las doeus las gis dah wotwu bos zis yah samlo nyenstap khyvlyis kang dwis nyeis bas jungh. Hwankti jens yahge vmingh yoh bang dvnganhmoq xiklyis shvmanh dung dyei aq.

³Haih muh gas gis dah muh nghuot las yah khyuot yoeus Yhensain Mangso lhyi nhaiqdoeus nhang nyeis.

⁴Nyang gas dius dvnganh khyuot yoeus zis xauh las hau jyoeng cho lhyi seq los das nyhenshang o.

⁵Khasoeh ge lyis Mangso ka dvso kyingh nghuot las Mangso yahge dius jo mas shangphu dyei soeu eq dius lyih duot dah Khristu Yesu ge soeu dvyuk kyingh nghuot.

⁶Yhensain ka dius nyau dvnganh lyis khyuot yoeus das nyhenshang nyah gungs lyis nyang kyauh tyamp goeus. Housoeh khyvlyis yah yang shishenh jweh lyis Mangso ka dius lyis khyuot yoeus mes cho kanghjyoeng lhyi hau toeuq toh shishenh lyis chixoeuq zis nghuot.

⁷Housoeh las Yhensain ka ngos lyis lvgyo dvyuk khyvlyis eq, gohnyau bang dah jyauh soeu dvyuk khyvlyis eq hau lomsjingh cho yahge jyoeng cho dah dang lyis taiq kyoh das nyhenshang nhang kat zis xauh. Ngos hwah nyeis zis ma nghuot; jyoeng dang dvtaiq.

⁸Phung dah paiq cho huom khanghmuh mas vbusbih jens lyis shvmanh dung nhang mes. Mangso mha kyauh toh zis xauh dah vbusbih jens gas, nhaiq yo cho, phyen-goh cho ma bos bos, gyingshang dah loq toeu lha shvmanh yoh dung.

⁹Vmesbih jens lyis eq nyamoq dah dyimis wuot cho mha shop khyvlyis vlhomuh wuot nhang mes. Cam zaiq, xing, pvleh yahge phauhdap dyimis yah ma shunk,

¹⁰paiq thungh chank kuot dah vmesbih jens dah nyhenshang kuot vvng zis yah dvyhangteh gis dah wotwu yah vsainnyang dah gungs lyis shunk nyeis bas jungh.

¹¹Vmesbih jens gas ehnyet nyhen mha gyoh zis yah samlo xuq bas jungh.

¹²Vmesbih jens gas jyauh das zis yahge vbusbih jens thoq mas toeuh yoeus las guon das zis ngos ma gyo. nyamoq gas samlo nyeis bas jungh.

¹³Khasoeh ge lyis Adam lyis shih gvnkhanh las Ewa lyis gas thang lhyi dvgvnkhanh toh.

¹⁴Satan dah mhuih zis xauh soeu ka Adam ma nghuot, vmesbih yuk mhuih zis xauh las Mangso dah lyi lyis lhyweq goeus.

¹⁵Nghuot laus eq vmesbih dvyuk gas shop zis yah lomsjingh cho, jyetdap cho, gyingshang cho mha tsoq chank nyeis lyis gas, hau lo khoeu dah gvng mas nyang khyuot yoeus zis xauh das.