Read Achang 1 TIMOTHI 4 Bible Online

1 TIMOTHI 4 - Achang bible

1 TIMOTHI 4

¹Dyos yah bvng bvng taiq zis gas, Thang pheh dius dvyhamh gas lomsjingh cho lhyi tyamp das; nyamoq gas hwah las mhuih dah dyos dang gyo las yius Satan dah jyauh cho mha tsain chank loh das.

²Vsainnyang dah sohseq ehnyet gas ngeh dah thyeq yah tanh ngheq zis xauh bang teh shei tyamp goeus dah mhuih bang gas housoeh teh jyauh cho lhyi tsain taiq hoeuh.

³Housoeh teh bang gas nyihwank cho yahge zonoms dvkhamh lyis kyi das nyhenshang tsain jyauh. Nghuot laus eq lomsjingh bang yahge jyoeng cho lhyi seq bang gas nhaiqshoqlang oen shvmanh dung zis yah yoh zo das xiklyis Mangso ka hauh zonoms lyis gvnkhanh toh.

⁴Mangso gvnkhanh toh zis dvnganh gas gis las zonoms cha lhyi eq ma peq noh: nghuot laus eq zonoms dvnganh lyis nhaiqshoqlang oen shvmanh dung zis yah lhom yoeus chah.

⁵Khasoeh ge lyis Mangso dang yahge shvmanh dung dang gas hauh yvlyis gyingshang nhang nyeis las Mangso lhom yoeus mon dah zonoms bweh los nhang nyeis.

⁶Hai taiq shet toh dang yah dvyhangteh nvng Khristan vmang vnoeuh moq lyis taiq kyingh nyeis lyis gas, nvng xauh lhom yoeus las chank nyeis, Dyos dah lomsjingh cho mha eq, jyoeng dah jyauh dang mas eq vsainnyang gungs lyis nyhoeu kuh, Khristu dah jyeidwis gis nghuot nyeis.

⁷Nghuot laus eq Mangso yah ma sen taiq das xiklyis vkyuh ma bos dah mvnyei dang lyis jhank las gywes so lhyi phauh nyang dah kang dwis cho lhyi pot toh aq.

⁸Gungs yah sen lha pot zis gas vkyuh dvtsiq dvbos. Nghuot laus eq hau dyos dah lomsjingh cho mha pot cho ka cho khvt khanghmuh mas vkyuh bos; khasoeh ge lyis houka haq caiq yahge thang caiq xiklyis kang yoh dyei.

⁹Hauh dang gas jyoeng lha dvnganh lhom yoeus las lomsjingh gis dah dang nghuot.

¹⁰Dius dvnganh yahge zes las lomsjingh bang dah khyuot yoeus Yhensain nghuot las kang dwis Mangso ka yah dah nghamhloms joqyos nghuot yvmvyah yang zwi khank cho mha yomkat nyeis.

¹¹Nyamoq lyis hai taiq shet dang yahge jyauh cho lhyi dyei toh aq.

¹²Nvng wotyamh nghuot yvmvyah hank eq nvng lyis dius ngis ma khyoq bas jungh, taiq dang, wotwu, jyetdap cho mha, lomsjingh cho mha, ehnyet lhoqshang cho mha eq lomsjingh bang xiklyis yikhyoh bweh nyeis aq.

¹³Ngos jweh los shoq dius phung xikkhonh mas Jyomp maussauh nghap kyoh cho, gausyis dang taiq kyoh cho yahge jyauh cho lhyi shishenh dyei las yomkat nyeis aq.

¹⁴Lvpe jens taiq toh dang bos yvmas phung whop jens nah thoq mas loq tsain kih las toeuq toh dyei uhlyis nvng lyis kyauh toh, nvng mas bos, dyos yah sen dah jyehjuh jyungshuk lyis ma phauh ma danh kuot las vchi thyuk tyamp.

¹⁵Nvng seq los kunk los cho dius jens dvnganh yoh nyvng bas jungh, haih taiq toh goeus yvwons lyis nhaiq wvng zis yah chank kuot las houmha lang toh aq.

¹⁶Nah gungs lyis eq, nvng jyauh dang lyis eq zaih lha zungh yoeuh nyeis aq. Nvng haih cho jens lyis tsoq kuot nyeis aq, khasoeh ge lyis nvng housoeh kuot lyis nah gungs lyis eq, nah dang xauhgyo bang lyis eq nvng yoh khyuot yoeus das.