Read Achang 1 TIMOTHI 5 Bible Online

1 TIMOTHI 5 - Achang bible

1 TIMOTHI 5

¹Nyenhkyi bos dah logis lyis vnyho, nah uwus lyis teh sang aq; ngis bang lyis vmang vnoeuh lyis teh,

²nyhiqzains jens lyis ungwes moq lyis teh, lonyi jens lyis nhamhmuh jens lyis teh, lhoqshang ehnyet yah taiq kyingh nyeis aq.

³Jyoengh dvyuk kyingh nghuot dah chauhmuh jens lyis phauh nyang nyeis aq.

⁴Nghuot laus eq chauhmuh dvyuk yuk mas lo jens nyei jens bos lyis gas, nyamoq gas nyamoq yhen khau nyhenshang lomsnoq cho yah sen lha kuot cho yvwons lyis shih xuq bas jungh; housoeh kuot khyvlyis vsainnyang ungwes uwus, vphauh vyos lyis jyehjuh phuk bas jungh. Khasoeh ge lyis houka Mangso lhyi nhaiqdoeus nhang cho nghuot.

⁵Nyang bauh nghuot las nyang lyis yoeuh das zis hank ma bos dah chauhmuh dvyuk gas Mangso lhyi nghamhloms zis yah nyeis las nyeih nyenh shvmanh dung zis yah Mangso jyank mas pangh cho dung nyeis.

⁶Nghuot laus eq wotwu dyoq las pyo cho dvxo dah chauhmuh gas dwis nyeis shih laus eq vshei dvnghuot.

⁷Nyamoq lyis hank eq yobos huon chank ma bos bas jungh, haih tying toh dang yah nyamoq lyis taiq kyingh nyeis aq.

⁸Dvyuk yuk nyang yah sen soeu yahge zes las yhen khau dius lyis ma khoeu soeu ka, lomsjingh cho lhyi ngoek soeu nghuot las ma lomsjingh soeu thoq lyis zes las ma shop soeu nghuot.

⁹Nyenhkyi khyukci zvn ma lai lyis gas khah chauhmuh lyis eq chauhmuh nyings mas ma bos shih goeus jungh; Nyang gas dvlhain kyingh phoengh dvwvng soeu nghuot chah.

¹⁰Hauh thoq lyis nyang gas wotwu gis cho mha hoeuh soeu, lo jens lyis vlhomuh khoeu bes kat soeu, boenghwus lyis nyah yhen mha daih ku soeu, ehnyet nyhen mha gyoh las Khristan changh jens lyis kuot dyei soeu, shohjyen bang lyis bos pangh soeu, gis dah muhzoh khanghmuh lyis yomkat las bos wons wuq soeu nghuot chah.

¹¹Nghuot laus eq nyenhkyi ngis shih dah chauhmuh jens lyis chauhmuh nyings mas ma kat goeus jungh. Khasoeh ge lyis, nyamoq ehnyet omes cho yah duon gvng mas yhen loh lyis Khristu masyah nungs seq doms loh.

¹²Housoeh las nyamoq gas Yhensain lhyi cangxeih toh goeus dah dangthoengh lyis toh tyamp dah yaunos yoh bang bweh los.

¹³Hauh thoq lyis nyamoq gas dvyhen dvyhen kwang lha shishenh lyis vkom thank nhang cho seq kuot los. Hauh thoq lyis zes ma gis cho ka nyamoq ma taiq vvng cho lhyi tsain taiq loeusmus yenh las nyamoq yah ma sen dah cho mha bos seq nhunk bang bweh los.

¹⁴Housoeh las jeswus jens gas yah cho ma gis khyvlyis taiq das cho lhyi toeuh ma dyei das khyvlyis nyenhkyi ma kuh shih dah chauhmuh jens gas phoengh wvng las lo bos zis yah yhenkhau zom nyeis das xiklyis ngos zes o nyeis.

¹⁵Khasoeh ge lyis, gvshih yangh chauhmuh dvyhamh Satan dah thang chank das nyhenshang nungs doms loh goeus.

¹⁶Lomsjingh dah vmesbih dvyuk yuk gas nyah yhen mha chauhmuh muh bang bos nghuot lyis gas, nyang nyamoq lyis yoeuh chah. Nyamoq nyhenshang phung lhyi yvwons s ma gis lyei nhang. Housoeh kuot lyis phung ka jyoengh khau nges gus ma bos lo dah chauhmuh jens lyis yoh yoeuh dyei das.

¹⁷Uhshe dah muh lyis vlhomuh kuot nyeis dah phung shwih bang gas uhkung phauh aiq huon yoh mon soeu nghuot oen nghamh yoeuh gis. Zes las Dang taiq kyoh las jyauh cho mha yomkat wons wuq nyeis bang gas housoeh kham yoeus mon bang nghuot.

¹⁸Khasoeh ge lyis lhaihtoh dang mas, Guk nang nyeis noeulu lyis nhuottsungh vtsungh toh dyei; tsai muh zwi soeu ka nyah uhkung phauh xauh kham zo vvng, ge taiq.

¹⁹Kanghjyoeng aiq yuk somh yuk ma bos bos, phung uhshe soeu lhyi yobos huon zis ma gis gyo dyei.

²⁰Gohyuk gyukwoms bas jungh, yaunos kuot bang dvnganh lyis moqphung xikkhonh mas nyho lha jyauh aq.

²¹Haih taiq shet toh cho lhyi hank dah nyoqnho lyis eq ma yoeuh, nvng kuot loh cho khanghmuh mas dvshot shot mas ma dap dap, domsyos gyo las chank kuot das nyhenshang Mangso yahge Khristu Yesu dah xikkhonh mas eq, gyingshang loeuswons bang xikkhonh mas eq ngos nvng lyis taiq toh.

²²Yhensain dah muh wons wuq das nyhenshang hank lyis eq loq kih las muh kyauh das zis vgyen. Gohyhamh bang yaunos kuot cho mha vbos lhoeuh. Nvnyang yobos ma dap shoq shangkyei nyeis aq.

²³Nvng dvsoq soq lyis nos yvmvyah, nah womdau zos tyik yvmas pangh jus das nyhenshang jeis kyingh ma shuk shuk, zvbiq dvtsiq tsiq bos shuk dyei nyeis aq.

²⁴Dvyhamh bang dah yaunos gas nyvng das xiklyis dede nghuot las nyamoq dah yaunos gas nyamoq dah xik pheh soetuon yvpheh loh nyeis. Nghuot laus eq dvyhamh bang dah yaunos gas thang lhyi dede dvyoh nyvng.

²⁵Houyah dvyhangteh gis dah muhzoh lyis dede yoh nyvng, dede ma nghuot yvlyis yangh ma yoh nghop shung toh.