Read Achang 1 TIMOTHI 6 Bible Online

1 TIMOTHI 6 - Achang bible

1 TIMOTHI 6

¹Jons jens gas, vsainnyang dah yhensain lhyi phauh nyang gis soeu nghuot oen nghamh chah. Housoeh lyis hank eq Mangso dah nyings yahge ngamoq dah jyauh cho lhyi ma gis khyvlyis loeusmus soqzo das zis ma nghuot.

²Khristan yhensain jens dah o mha nyeis dah jons jens gas vsainnyang dah yhensain lhyi dvyhangteh vmang vnoeuh dvnghuot oen ma phauh ma nyang ma gis kuot: khasoeh ge lyis vsainnyang phuqsoe lha vkyuh xauh kham bang gas vsainnyang jyetdap nyeis dah lomsjingh bang nghuot yvmvyah nyamoq lyis zes nyangh phuqsoe chah. Nvng gas haih cho lhyi jyauh zis yah taiq kyoh nyeis chah.

³Hank laus eq shaih dah jyauh cho jyauh soeu ka, yah Yhensain Yesu Khristu dah jyoeng lha dyinghjet dah dang yahge yah lomsjingh cho dah jyauh cho lhyi ma chank soeu nghuot.

⁴Nyang gas khwank las cha eq ma seq soeu nghuot. Nyang gas dang taiq goh yvmas taiq phyen-goh das xiklyis dyoqgoh das xiklyis ma jus dah ehnyet bos soeu nghuot. Housoeh kuot yvmvyah noh cho, gang lvn loh cho, phyen-goh cho, laihwangh cho, ma gis khyvlyis kuot jyo cho tsain thuq los nhang nyeis.

⁵Hauh thoq lyis uhnuk ma dyingh cho yahge jyoeng cho lhyi ma nyvng ma seq bang masyah phyen-goh cho dvsoq soq thuq los nyeis. Lomsnoq cho ge zis gas dis los das nyhenshang nghuot ge nyamoq nghamh.

⁶Jyoengh oen lhyi ka vsainnyang yoh yvmas nhaiq seq tap lyis gas, lomsnoq cho ka dius dvyuk lyis svsoh dis nhang nyeis.

⁷Khasoeh ge lyis, yang haih mungkvn mas cha chi los? Cha ma chi los. Mungkvn masyah cha yoh chi loh? Cha ma yoh chi loh.

⁸Housoeh las yang wuot das zo das zis yoh goeus ya, hauh zis yah nhaiq tap nyeis goh.

⁹Nghuot laus eq dis mes bang gas, shiwu zis xauh las vkoh vpaq yah shanghsenh yoh bweh nhang dah nyoqnoq obos cho nyoshoq dah lhyik mas nyop loh. Houka nyamoq lyis dyoqbis las somh loh yvmas she wvng loh.

¹⁰Khasoeh ge lyis ngwis nyoqnoq ehnyet gas, ma gis cho vja ja dah vpom nghuot. Dius dvyhamh gas hauh zis yoh das nyhenshang svsoh omes nyeis yvmvyah, lomsjingh cho mhayah whang loh las kuk cho vja ja yah vsainnyang dah ehnyet lyis dyoqbis loh nhang.

¹¹Mangso dah dius nvng gas haih cho dvnganh lyis jhank aq. Dan cho, gywes so lhyi phauh nyang cho, lomsjingh cho, jyetdap cho, nhaiqlom xing cho yahge noeuh nhamp ehnyet lyis yoh shoq yomkat nyeis aq.

¹²Lomsjingh zis yah sen dah wuih khyank goh pwe mha duot thank shoq wuih las vcaiq vto kang ge dah jyungshuk xauh yoeus shoq kuot aq. Khasoeh ge lyis hau kang dwis cho mha nvng lyis Mangso lui yoeus uhlyis nvng gas kanghjyoeng nyoshoq dah xikkhonh mas lomsjingh goeus cho toenk toenk rhen goeus.

¹³Vyhang dvnganh lyis kang dyei soeu Mangso xikkhonh mas eq, Pontu Pilat xikkhonh mas nyang lomsjingh cho lhyi toenk toenk rhen dah Khristu Yesu dah xikkhonh mas eq hai muh wons das xiklyis ngos nvng lyis taiq toh.

¹⁴Nvng gas nvng lyis taiq toh goeus cho lhyi domsyos gyo las Khristu doms thuq xoeuq das buisnyeis jweh shoq lomluk luk chank kuot tyink nyeis aq.

¹⁵Dvyuk kyingh nghuot las zau guon nyoqnho ngelang bos dah guon soeu, hwankti jens dah Hwankti, yhensain jens dah Yhensain, Mangso ka shishenh jweh lyis Yhensain Yesu lyis dvlhain doms thuq xoeuq nhang das.

¹⁶Nyang kyingh ma shei ma dyuk soeu nghuot las nyang gas hank ma yoh ni loh dah bvng yvmas nyeis. Nyang lyis hank eq ma nyvng ku, hank eq nyang lyis ma yoh nyvng. Nyah jyank mas nyoqnho ngelang yahge vcaiq vto phunk bos joq bas jungh. Amen.

¹⁷Haih nyeisjvng thoq kang dwis nyeis caiq dah zisyos nyeisgis yaplhoq cho mha dis bang lyis hauh zisyos mas ma khwank das zis yahge ma goeng dah nyeisgis yaplhoq cho lhyi nyamoq dah nghamhloms khau nges joqyos ma kuot, yang gausyis zis yah lhom yoeus das xiklyis vyhang dvnganh lyis magons magoh dyei dah Mangso lhyi nghamhloms las langh nyeis das nyhenshang taiq toh aq.

¹⁸Gis zis kuot das cho yahge gis dah muh mas dis das nyhenshang eq, gohyuk lyis dyei gvm cho mha eq, magons magoh dyei das zis cicont nghuot bas jungh nyamoq lyis jyauh nyeis aq.

¹⁹Heisoeh khyvlyis nyamoq gas thang caiq xiklyis goeng dah vpom duot nyeis bas jungh. Phauhdap dah zisyos nyamoq yoh yung toh las jyoeng dah kang dwis cho gyingh lyis yoh das.

²⁰Timothi eh, nvng lyis kyauh toh dah muh lyis vlhomuh yoeuh gomh zwi zains toh aq. Ma lhoq ma shang dang taiq yvlyis eq, dius dvyhamh seq cho nghuot ge ma jus khyvlyis nyhink dah vkoh vpaq phyen-goh dang lyis eq jhank aq.

²¹Khasoeh ge lyis dius dvyhamh gas seq cho bos bang nghuot ge toh las lomsjingh cho mhayah whang loh. Mangso dah jyehjuh gas namoq dvnganhmoq yah dvgeh joq bas jungh.