Read Achang 2 TIMOTHI 1 Bible Online

2 TIMOTHI 1 - Achang bible

2 TIMOTHI 1

¹Mangso o zis yah dvyhangteh Khristu dah lvgyo duot las Khristu Yesu dvdain dvlom duot nyeis gvng mas yang xauh yoeus das dangthoengh yah sen dah kang cho taiq hoeuh das nyhenshang nhang zis xauh soeu ngos Paulo gas, Ngos jyetdap, ngah lo Timothi lyis dang tying kat.

²Uwus Mangso yahge yah Yhensain Khristu Yesu gas nvng lyis jyehjuh, nhaiqnyen zis yahge nyenstap cho dyei bas jungh.

³Ngah phauh thyeih moq kuot teh, lhoqshang ehnyet yah ngos phuqsoe nyeis dah Mangso lhyi chungh. Ngos nyeih nyenh shvmanh dung yvmas namoq lyis malyen soh nyeis zis yah Mangso lhyi jyehjuh chungh nyeis.

⁴Ngos nah nyoqdyeis lyis soh dyei las, ngos mas hau gauslaus cho dyingh los bas jungh ngos nvng yah svsoh xauhgoh mes nyeis.

⁵Nvng gas nah vyos Loi metang nah ungwes Euni mas cangxeih bos joq, jyoeng dah lomsjingh ehnyet gas nvng mas zuk joq yvlyis ngos soh nyeis. Nvng mas eq hauh zis bos joq yvlyis ngos soh soh nghuot.

⁶Housoeh yvmvyah ngos nvng lyis loq kih las muh dyei uhlyis Mangso jyank masyah nvng kham yoeus goeus dah jyehjuh lyis dwis nyeis nhang das xiklyis ngos nang lyis doms nhauh kat.

⁷Khasoeh ge lyis Mangso ka yang lyis seq gyuk dah dyos ma dyei. Hau Yhensain dah Dyos gvng mas yang lyis yomsoq bos, jyetdap, vsainnyang gungs lyis seq joeu dah ehnyet dvdyei toh.

⁸Housoeh las yah Yhensain Yesu dah xiklyis kanghjyoeng kat cho mha eq, Khristu gvng mas thung lungh soeu ngah gvng mas eq vxoq nyeis. Mangso ka nvng lyis hauh nyhenshang yomdyei toh goeus zis yah dvyhangteh, hau gausyis dang gvng mas shanghsenh kham cho mha ngos yah dvgeh yaukyenh cho chomp kham nyeis goh.

⁹Mangso ka, yang kuot goeus dah muhzoh dvja ja gvng mas ma nghuot, nyang nghamh toh cho yahge jyehjuh gvng mas yang lyis khyuot yoeus las nyah dius jens duot das xiklyis khi toh. Nyang gas mauthuq nyeis ma zvn shih lyis yah Khristu Yesu gvng mas hauh jyehjuh yang lyis dyei toh.

¹⁰Nghuot laus eq gvshih gas yah khyuot yoeus Yhensain Khristu jweh los shishenh lyis hauh cho yang lyis chixoeuq kat. Nyang gas shei cho dah yomsoq lyis yoeus tyamp las hau gausyis dang khyvlyis yah ma seq shei dah kang dwis cho lhyi Chixoeuq kat.

¹¹Gausyis dang taiq kyoh das nyhenshang Mangso ka ngos lyis lvgyo dvyuk khyvlyis eq, jyauh soeu khyvlyis eq toeuq toh.

¹²Hauh cho gvng mas ngos haih shanghsenh zis kham nyeis. Nghuot laus eq ngos mas nghamhnywe cho dyingh dyingh bos joq: khasoeh ge lyis, ngos hank lyis khau nges nyeis yvlyis ngos seq zis yahge ngos lyis loms las ngah loq mas kyauh toh goeus dah vyhang lhyi hauh soetuon buisnyeis jweh shoq yoh tsomh toh dah yomsoq nyang mas bos oen zis ngos soh soh nghuot.

¹³Ngos nvng lyis jyauh dah jyoeng dang lyis nvng chank kuot das yikhyoh toh las goeng goeng zwi zains toh zis yah yang Khristu Yesu yah dvdain dvlom duot las kang dwis cho yah sen dah lomsjingh cho yahge jyetdap ehnyet mas goeng joq nhang aq.

¹⁴Nvng lyis loms las kyauh toh, gis dah vyhang lhyi, yah jyank mas bos joq Gyingshang Dyos dah yomsoq yah tsomh toh aq.

¹⁵Asia mauxom mas bang dvnganhmoq ngos lyis tsain doeuh tyamp goeus zis nvng seq. nyamoq mas Phigelu yahge Hermogene tsain bos.

¹⁶Yhensain ka Onesiphoru yhenbang lyis nhaiqnyen bas jungh: khasoeh ge lyis nyang ngos lyis nyoshoq lhain nhaiqtaink thoq lyis magoh, nyang ngos thung lungh cho yah sen lha ma xoq soeu nghuot.

¹⁷Nyang gas Roma wus mas jweh yah dvyih ngos lyis nyvng shoq lyih xo xauhgoh.

¹⁸Yhensain ka nyang lyis hauh soetuon buisnyeis lyis nhaiqnyen cho dyei bas jungh. Ephesu wus mas eq nyang ngos lyis kha iq daih goeus zis gas nvng vlhomuh seq.