Read Achang 2 TIMOTHI 2 Bible Online

2 TIMOTHI 2 - Achang bible

2 TIMOTHI 2

¹Ngah lo eh, yah Khristu Yesu yah dvdain dvlom duot las kang dwis gvng mas xauh yoeus dah jyehjuh mas yombos nyeis aq.

²Kanghjyoeng nyoshoq dah xikkhonh mas nvng ngah jyank masyah xuq, xauhgyo yoeus dah dang lyis yoeus las gohyuk lyis yoh doms jyauh das oen nvng yoh loms bang lyis cheh kyauh toh aq.

³Khristu Yesu dah lomluk jeslo gis teh nvng kham yoeus vvng dah shanghsenh lyis kham yoeus aq.

⁴Jesmuh wons nyeis dah jeslo dvyuk gas nyah thoq mas dah zau lyis nhaiqdoeus nhang shoq kuot mes yvmvyah jesphung yah ma sen dah dius jens cho mha ma bos nhunk.

⁵Wuih khyank goh pwe mha wvng khyank goh soeu ka chank chah lyi vgus ma khyank goh lyis gas jyungshuk yoh das zis ma nghuot.

⁶Danh muh, yos muh khank soeu ka, xauh yhomh yoeus dah guk nyau shih nyau cangxeih dah gvm boms xauh yoeus vvng.

⁷Ngos taiq nyeis cho lhyi nghamh yoeuh aq: khasoeh ge lyis Yhensain ka hauh cho dvnganh nvng lyis seqgyo nhang das.

⁸Ngos taiq kyoh dah gausyis dang mas bos zis yah dvyhangteh, shei masyah dwis toq los Dawi vnyau vshih nghuot dah Yhensain Yesu Khristu lyis soh nyeis aq.

⁹Khasoeh ge lyis ngos gas Gausyis dang taiq kyoh gvng mas shanghsenh zis xauh. Ma shop dah thung dius dvyuk lyis teh shamjvng yah yangh twih zis xauh goeus. Nghuot laus eq Mangso dang gas ma twih toh.

¹⁰Housoeh yvmvyah, ngos gas Mangso khyen yoeus zis xauh bang nyhenshang shanghsenh zis kham nyeis. Housoeh kham cho ka nyamoq eq Khristu Yesu gvng mas khyuot yoeus dah jyehjuh yah dvgeh, vcaiq vto phunk xauh yoeus das nyhenshang nghuot.

¹¹Haih zis gas jyoeng dang nghuot. Yang nyang yah dvgeh shei lhyi ka, nyang yah dvgeh eq yoh tsain dwis das.

¹²Yang tsoq las kham nyeis lyis gas, nyang yah dvgeh eq xauh guon nyeis das. Yang nyang lyis ngoek tyamp lyis gas nyang eq yang lyis ngoek tyamp das.

¹³Yang lom ma luk laus eq, nyang gas wontang: khasoeh ge lyis nyang gas nyang gungs lyis nyang yoh hwah ngoek tyamp zis ma nghuot.

¹⁴Nah dius jens lyis haih cho taiq kyingh nyeis aq. Dang khonh jens dah vjyuk yah sen lha taiq phyen-goh las zan goh cho ma bos das xiklyis nyamoq lyis Mangso xikkhonh mas than than zaih nhang aq. Housoeh phyen-goh cho ka cha vkyuh ma bweh nhang thoq lyis, xauhgyo bang lyis lhoq thyoq cho dvbweh nhang.

¹⁵Nvng gas nyah muh mas xoq chank cha ma bos dah muh wons soeu teh Mangso dah jyoeng dang lyis jus khyvlyis taiq kyoh, jyauh soeu khyvlyis eq Mangso xikkhonh mas nyoqnho yoh shoq nah Kank bos nyhoq yomkat nyeis aq.

¹⁶Mangso yah we loh nhang dah vwot v-oeu yahge vkoh vpaq xamgoh dang lyis jhank aq.

¹⁷Housoeh ge jyauh cho ka gungs lyis zo tomh loh dah mvnggvng dvm yah doeusgoh. Housoeh teh jyauh bang mas Himenu nhaiq tang Philetu bos.

¹⁸Nyamoq gas hau jyoeng cho mhayah whang loh las, Yah dah dwis toq cho ka dye bweh goeus, ge taiq zis yah, dvyhamh bang dah lomsjingh cho lhyi lhoeu nhunk tyamp dyei.

¹⁹Nghuot laus eq Mangso kuot toh, goeng dah vpom lhyi ka ma yoh nhont. Hauh vpom thoq mas, Yhensain ka nyah dius jens nghuot bang lyis seq, ge eq, Yhensain yah sen soeu nghuot ge taiq bang dvnganh gas lhung cho lhyi tsain jhank nyeis bas jungh, ge kyihau tap toh.

²⁰Yhenzains yoszains mas bvn khuq vja ja zis tsain joq; dvkhamh gas ngwis yah xing yah kuot toh; Dvyhamh gas saiq yahge tsoh yah kuot toh. Dvyhamh gas nyoqnho ngelang xiklyis yhaugyen uhlyis yhung lha, dvkhamh gas dius laiq nyeis dah joqyos mha tsain yhung.

²¹Dius dvyuk yuk gas taiq loh goeus ma gis ma shop cho dvnganh masyah vsainnyang gungs lyis cheihshang lhyi ka, nyang gas Yhensain dah lhyenwhei nghamh toeuq toh cho mha yhung zis xauh kham yoeus das. Khasoeh ge lyis nyang gas gis dah muh lyis kuot das zis cicont nghuot joq bas jungh Yhensain dah xiklyis vkyuh bos yvmas kyauh toh goeus soeu nghuot.

²²Loyvm dah o mes cho lhyi jhank las, Mangso lhyi Lhoq shang ehnyet yah pangh das cho sang bang yah dvgeh Dan cho, lomsjingh cho, jyetdap cho yahge nyenstap cho lhyi yomkat xo nyeis aq.

²³Nghuot laus eq koh las cha ma seq nyei gyo phyen-goh bang lyis jhank aq. Housoeh teh bang dah vthang ka dyoqgoh cho dvnghuot yvlyis nvng seq.

²⁴Yhensain dah jyeidwis gas dyoqgoh zis ma gis bos, dvnganhmoq lyis nhaiq seq nyen, gis cho yahge nhaiqlom xing xing seq jyauh dah jyauh soeu nghuot chah.

²⁵Vsainnyang lyis tyixo bang lyis soq dyei uhlyis noeuh nhamp zis yah kuot soeu nghuot chah: khasoeh ge lyis nyamoq gas ehnyet thaiq las hau jyoeng cho lhyi seqgyo los das toeuh Mangso nyamoq lyis dyei lyis dyei das.

²⁶Hauh uhlyis nyamoq gas jus khyvlyis doms nyvng soh los las Satan dah lhyik masyah yoh luiq los das. Hauh Satan gas nyamoq lyis nyhik las nyang o khyvlyis chank nhang ku goeus soeu nghuot.