Read Achang 2 TIMOTHI 3 Bible Online

2 TIMOTHI 3 - Achang bible

2 TIMOTHI 3

¹Thang thank buisnyeis lyis loh yau thank shishenh jweh das zis lyis seq nyeis aq.

²Dius jens gas vsainnyang vkyuh dvxo, nyoqnoq, moengs, khwank bang nghuot los das. Nyamoq gas laihwangh dang taiq bang, nyhiphoq domsyos ma gyo bang, jyehjuh ma seq soh bang, lomsnoq cho ma bos bang nghuot das.

³Nyamoq gas nhaiq ma bos, nhaiq ma seq nyen, nyhap, thyoq zo bang yahge gyukphoh bweh bang nghuot das. Nyamoq gas gis cho lhyi hoeng bang,

⁴gauh chuq thyoq, dang ma jings, ehnyet nyhang lha khwank bang nghuot las: Mangso lhyi jyetdap das thoq lyis vsainnyang dah pyo cho lhyi zes ngwis bang nghuot das.

⁵Nyamoq gas ngamoq dah lomsnoq cho dah thoqlosbaus lyis chank kuot laus eq hauh yomsoq gyingh lyis gas ngoek tyamp bang nghuot. Housoeh teh bang lyis eq jhank aq.

⁶Nyamoq mas dvyhamh gas, dius jens dah yhen mha gauh wvng zis yah, seq cho nain las yomnhuk dah vmesbih jens lyis nyamoq loq mas wvng shoq tsain kuot. Hauh vmesbih jens gas vsainnyang shuot dah yaunos gvng mas ehnyet nyung daus las nhaiqlom ma tap zis yah nyetnau cho vja ja mas nhaiq wvng tyamp las,

⁷jyauh yvlyis kham yoeus das zis vjangh o mes zis yah yomkat laus eq nyamoq hau jyoeng cho lhyi seq das yvmas khanhamp eq ma yoh jweh.

⁸Yanne yahge Yambre gas Moshe lhyi tomp gos toh teh, hauh bang eq jyoeng cho lhyi tsain tomp gos toh. Hauh dius jens gas nyamoq dah ehnyet nghamh suon yoeuh ge zis ma bos lo las lomsjingh cho mha dyoqbis somh loh.

⁹Nghuot laus eq nyamoq dah ung cho ka hounyhoq masyah jes las nyangh shoq yoh kham das zis ma nghuot. Khasoeh ge lyis hau aiq yuk mas cha bweh los cho dede thuq los teh, haih dius jens kha iq koh cho eq, dius jens xikkhonh mas dede thuq los das.

¹⁰Nghuot laus eq nvng gas ngah jyauh cho, ngah wotwu yahge, ngah kang dwis cho mha ngos nghamh toh cho lhyi chank nyeis, ngah lomsjingh cho, ngos ehnyet xing cho, ngah jyetdap cho, jhen cho,

¹¹Ngos shoeuhshih zis xauh cho, khamzo cho; Antiok, Ikoni yahge Listra wus mas gyuk Phoh shoeuhshih cho xauh las ngos zain khoq yvlyis nvng seq. Housoeh xauh laus eq Yhensain ka ngos lyis hau dvnganh masyah khyuot yoeus.

¹²Jyoengh, Khristu Yesu mas kang dwis las gywes so lhyi phauh nyang khyvlyis kang dwis mes soeu hank eq shoeuhshih zis xauh das.

¹³Ma shop bang yahge vguons kuot bang, mhuih zo bang gas mhuih zo zis doms xauh las ma shop cho mha ma gis mhayah ma gis thank yvmas zes xunghxent loh das.

¹⁴Nghuot laus eq nvng gas nvng xauh xuq las goeng goeng lomsjingh nyeis goeus, hau jyoeng cho mha tsoq las chank nyeis aq. Nvng gas nvng lyis jyauh bang hank nghuot yvlyis tsain soh nyeis.

¹⁵Nvng lyis loshang yoq lyis yah joeui dyei las Khristu Yesu lyis lomsjingh gvng mas khyuot yoeus cho xauh yoeus das nyhenshang cho shwih she los dah gyingshang lhaihtoh dang vlhomuh seq soeu nghuot yvlyis eq soh nyeis aq.

¹⁶Jyomp maussauh dvnganh lyis Mangso soq kat toh dyei yvmvyah jyoeng cho jyauh das, shuot cho lhyi yobos tuonh shet las kyink, shuot cho lhyi soq dan das zis yahge, jus dah kang dwis cho nyhenshang taiq shet dyei das xiklyis vkyuh bos.

¹⁷Housoeh, Mangso dah muh wons wuq soeu ka gis dah muhzoh khanghmuh kuot das xiklyis kank bos cho yah tyink dyei las chi chah dah kyonhkhyi yah dyingh nhang nyeis.