Read Achang 2 TIMOTHI 4 Bible Online

2 TIMOTHI 4 - Achang bible

2 TIMOTHI 4

¹Mangso xikkhonh mas eq, dwis nyeis bang yahge shei bang lyis soetuon das soeu Khristu Yesu xikkhonh mas eq, Yhensain ka guon das nyhenshang Hwankti khyvlyis jweh los das las ngos nvng lyis tungh kuot nhang zis gas,

²Dang lyis taiq kyoh das xiklyis, seqgyo nhang das xiklyis, yobos tuonh shet las nyho das xiklyis, yomdyei das xiklyis, ehnyet xing xing toh las jyauh das xiklyis yoq doeus laus eq ma doeus laus eq yomkat nyeis aq oen, ngos nvng lyis kywih kat.

³Dius jens gas, jyoeng lha chah zis ma bos dah jyauh cho lhyi ma gyo, nyamoq o yvpheh chank loh zis yah nyamoq ehnyet mas gvjywih yo shoq gyo yoeus mes dah cho lhyi jyauh das bang nyamoq xiklyis zes zes nyoshoq xo tsainh shishenh jweh los das.

⁴Nyamoq gas hau jyoeng cho gyo mhayah phanh las dius dah mvnyei dang gyo das zis nhaiq wvng loh das.

⁵Nvng gas chah cho bweh los laus eq nah gungs lyis joeu zis yah shanghsenh cho lhyi zain aq. Hau gausyis dang lyis taiq kyoh muh lyis wons wuq las, Mangso dah jyeidwis dvyuk khyvlyis nah yvwons s bos ya bos yvlyis wons wuq nyeis aq.

⁶Ngah xiklyis gas ngah kang lhyi phudyei das shishenh jweh los nyeis. Gvshih nyang ngah xiklyis nyeisjvng thoq kang lhyi toh tyamp das shishenh jweh los nyeis.

⁷Ngos gas wuih khyank goh cho mha kank bos nyhoq wuih goeus; khyank goh cho thank shoq wuih jweh goeus. Lomsjingh yvmas goeng goeng yap goeus.

⁸Gvshih masyah dan dah soetuon soeu ge, Yhensain ka Soetuon buisnyeis lyis ngos lyis dyei das, dan dah kang dwis cho yah sen dah ung cho buismuk lyis ngah xiklyis toh toh. Ngos lyis kyingh ma nghuot, nyang doms jweh das buisnyeis lyis nhaiqdoeus zis yah langh nyeis bang dvnganhmoq lyis eq kyauh das.

⁹Nvng ngah jyank mas lvnyap jweh das xiklyis mangh aq.

¹⁰Dema gas haih mungkvn lyis ngwis yvmvyah ngos lyis toh tyamp khoq las Thesaloni wus pheh loh goeus. Kareka gas Galati mau pheh, Titu gas Dalamati mau pheh tsain loh goeus.

¹¹Luka kyingh ngos yah dvgeh nyeis. Makho lyis khi yoeus las nvng yah dvgeh shwih los aq. Khasoeh ge lyis haih muh mas nyang ngos lyis yoh pangh das.

¹²Tichiku lyis gas ngos Ephesu wus pheh nhang kat.

¹³Nvng los lyis Troa wus Karpu jyank mas ngos toh khoq dah ngah shanhzoe eq, maussauh eq, zes las shohyeis maussauh tsain yoeus los aq.

¹⁴Hauh thunk bat soeu Alesanda gas ngos lyis ma gis zis nyoshoq kuot goeus. Nyang kuot zis yah dvyhangteh Yhensain ka nyang lyis phauh shangh das.

¹⁵Nvng nyang lyis zaih las jhank aq: khasoeh ge lyis nyang gas yang taiq kyoh dah dang lyis than than kyoq tomp toh soeu nghuot.

¹⁶Ngos lyis cangxeih vlhain zau kauq las ngos ngah gungs lyis ngos taiq gos uhlyis ngah shot pheh hank eq ma bos taiq toenk dyei. Dius dvnganh gas ngos lyis tyamp khoq: Mangso ka nyamoq housoeh kuot gvng mas yobos ma dyei bas jungh.

¹⁷Nghuot laus eq Yhensain ka ngos yah nyeis las ngos lyis yomdyei yvmvyah ngos gas gohnyau bang dvnganh xauhgyo shoq hau gausyis dang lyis vlhomuh yoh taiq kyoh bas jungh: sat das dang thang thyet masyah lhuiq kat zis xauh goeus.

¹⁸Yhensain ka ngos lyis ma gis cho dvnganh masyah khyuot kat las, nyah maukhung munghdan jweh shoq sam cho dyei zis yah shwih loh das. Nyang mas vcaiq vto phunk bos joq bas jungh. Amen.

¹⁹Priska vzomh Akula yahge Onesiphoru dah yhenbang lyis jeshuh kat.

²⁰Erastu gas Korinthu wus mas gyoh nyeis khoq. Trophimu gas nos las, ngos nyang lyis Miletu wus mas nyhei toh khoq.

²¹Cungh ma thuq shih lyis yoh jweh shoq mangh aq. Eubulu, Puden, Linu, Klaudia yahge gohtoeu Khristan boekyis dvnganhmoq nvng lyis tsain jeshuh kat.

²²Yhensain ka nah dyos yah dvgeh nghuot bas jungh. Mangso dah jyehjuh gas namoq mas joq bas jungh.