Read Achang TITU 2 Bible Online

TITU 2 - Achang bible

TITU 2

¹Nghuot laus eq nvng gas jyoeng dah jyauh dang yah phi cho lhyi taiq kyoh las yoh jyauh nyeis das.

²Lokhoq phauh jens lyis yhei ma yet, jyoeng zaih zis yah vsainnyang gungs lyis joeu das xiklyis jyauh aq. Nyamoq gas jyoeng dah lomsjingh cho, jyetdap ehnyet yah jhen ehnyet bos bas jungh.

³Houyah dvyhangteh lokhoq nyih jens eq lomsjingh las gywes so lhyi phauh nyang bang kang dwis teh wotwu gis Chixoeuq las, khyangh ma pu, yhei dah jons ma duot, gis cho seq jyauh bang bweh bas jungh taiq shet aq.

⁴Housoeh Mangso dah Dang gas loeusmus soq zo zis ma xauh bas jungh, lokhoq nyih jens eq nyamoq thoq lyis ngis dah nyhiq yvm jens lyis, vsainnyang dah yhensain phoq yahge lo jens lyis jyetdap,

⁵vsainnyang gungs lyis joeu zis yah shangkyei lha gis dah yhen wons vmesbih duot las, vsainnyang yhensain phoq shwih khyvlyis chank bang yoh bweh das nyhenshang xuq nhang aq.

⁶Houyah dvyhangteh, loyvm jens eq nyang gungs nyang joeu nyeis bas jungh, taiq kyingh yomdyei nyeis aq.

⁷Dvnganh lyis nvnyang gis dah muhzoh yikhyoh Chixoeuq nyeis aq. Jyauh cho mha ehnyet dan zis yah yhaugyen zainsmuh khyvlyis kuot nyeis aq.

⁸Nah jeswus jens gas yang lyis chah cho mha laus eq yobos ma yoh xo nyvng las xoqphuh bas jungh, nvng gas gohyuk dah yobos huon zis ma xauh shoq jyoeng dah dang yah taiq kyingh las jyauh nyeis aq.

⁹Jons jens gas nyamoq dah yhensain jens dah o mha gyoh nyeis las cho khvt khanghmuh mas nyamoq lyis nhaiqdoeus nhang lha ma phuk toeuh bas jungh;

¹⁰khauh cho ma kuot bas jungh, housoeh kuot das gungsthaiq, nyamoq gas khanhamp eq wontang dang jings bang nghuot cho yoh Chixoeuq das. Haih neh yah nyamoq gas vsainnyang kuot cho dvnganh mas, yah khyuot yoeus Soeu Mangso dah jyauh cho vsoenk lyis yoh tsain Chixoeuq das.

¹¹Khasoeh ge lyis Mangso ka dius nyau dvnganh lyis khyuot yoeus das xiklyis nyah jyehjuh lyis chi thuq xoeuq goeus.

¹²Yang gas yah dah kuhxing Mangso ge, khyuot yoeus dah Yhensain Yesu Khristu dah phunk thuq los das ngelhoq buisnyeis lyis langh uhjyangh gywes ma tsungh ehnyet yahge mungkvn lyis nyetnau ehnyet doeuh tyamp das xiklyis eq,

¹³wotwons zis yah vshih shih das cho, dan las gywes tsungh dah kang dwis cho yah haih mungkvn mas nyeis dyos das xiklyis eq, hau jyehjuh lyi gas yang lyis jyauh nyeis.

¹⁴Yang lyis lyi lhyweq las ma gis ma shop dah yaunos masyah khyuot yoeus das xiklyis eq, yang gas ehnyet gyingshang lha nyang yah kyingh sen dah vnyau duot zis yah gis dah muh kuot das zis, nhaiq kank wvng dah vnyau duot das xiklyis eq, Khristu gas yah xiklyis nyah gungs dyei tyamp.

¹⁵Nvng haih cho lhyi taiq kyoh las jyauh nyeis aq. Nvng yomdyei taiq kyingh las jyauh uhlyis nvng yoh dah toeuh bos ya bos zis yah taiq aq. Nvng lyis hank eq ma phauh ma danh dius ngis vyoeuh khyoq nhang.