Read Achang PHILEMON 1 Bible Online

PHILEMON 1 - Achang bible

PHILEMON 1

¹Khristu Yesu dah muh wons gvng mas thung lungh nyeis soeu ngos Paulo yahge yah vmang vnoeuh Timothi gas, Ngah aiq yuk dah jyetdap buisnoms yahge muh bos thuk nyeis Philemon jyank mas eq,

²ngah aiq yuk dah nhamhmuh Aphia jyank mas eq, ngah aiq yuk dah jes loeuzomh Arkhipu jyank mas eq, nah yhen mha zop huom dah Khristan vmang vnoeuh moq jyank mas eq maussauh lhaih kat.

³Yah Uwus Mangso yahge Yhensain Yesu Khristu jyank masyah jyehjuh yahge nyenstap zis gas namoq yah dvgeh nghuot bas jungh.

⁴Ngos shvmanh dung khanghmuh nah cho taiq las ngah Mangso lhyi jyehjuh chungh.

⁵Khasoeh ge lyis nvng gas Mangso dah dius jens dvnganhmoq lyis jyetdap nyeis zis yahge Khristu Yesu lyis lomsjingh nyeis cho ngos xauhgyo.

⁶Lomsjingh dah Khristan tsain nghuot dah nvng yahge ngamoq gas Khristu mas dvdain dvlom bweh las kang dwis gvng mas yang xauh kham dah shvmanh jyehjuh dvnganh lyis zes noq khyvlyis seqgyo das xiklyis ngos shvmanh dung.

⁷Vmang vnoeuh eh, nah jyetdap ehnyet gvng mas ngos svsoh gausyis zis yah yom yoh. Nvng gas Mangso dah gyingshang bang dvnganhmoq dah ehnyet lyis yoh lhoq pyo dyei.

⁸Haih cho gvng mas ngos gas Khristan vmang vnoeuh nyang changh khyvlyis nvng kuot vvng dah muh lyis kuot das nyhenshang taiq das toeuh ngos yoh.

⁹Nghuot laus eq Khristu dah lvgyo, lokhoq ngos Paulo nghuot joq zis yahge, gvshih Khristu xiklyis thung lungh soeu nghuot joq yvmvyah, jyetdap khyvlyis nvng lyis shangphu kat das zis ngos zes o.

¹⁰Khristu mas ngah lo gyingh bweh los, ngah lo Onesimu xiklyis ngos nvng lyis shangphu kat. Khasoeh ge lyis ngos thung lungh nyeis lyis ngos gas nyah dyos cho mha ngos uwus duot los goeus.

¹¹Nyang gas xikpheh nah xiklyis vkyuh ma bos laus eq, gvshih gas nah xiklyis eq, ngah xiklyis eq vkyuh bos joq.[1]

¹²Gvshih ngos nyang lyis nah jyank mas doms nhang kat. Nyang yah dvgeh ngah ehnyet jweh bos joq.

¹³Gausyis dang gvng mas thung lungh yvmas, nyang gas nah gungsthaiq ngos lyis phuqsoe das zis ngah jyank mas shwih nyeis mes.

¹⁴Nghuot laus eq nah xamxonh cho ma yoh zis tsoengh kuot khyvlyis ngos cha eq ma mes kuot. Nvng bauh khyvlyis dvnghuot bas jungh. Housoeh las nvng ma xihhonh zis cha lhyi eq ngos ma kuot das.

¹⁵Onesimu gas nvng yah vjangh dvgeh doms xauh nyeis das xiklyis nyang nvng yah dvsoq gang zis nghuot mvbeh.

¹⁶Gvshih nyang gas jons kyingh ma nghuot lo, jons vsoenk masyah zes dah jyetdap Khristan vmang vnoeuh dvyuk bweh los goeus. Nyang gas ngah xiklyis kha iq phauhdap soeu bweh las nah jons dvyuk khyvlyis eq, Khristu mas vmang vnoeuh dvyuk khyvlyis eq kha iq zes phauhdap soeu bweh los das lah!

¹⁷Housoeh yvmvyah nvng ngos lyis loeuzomh teh mus lyis gas, ngos lyis teh nyang lyis lhom yoeus aq.

¹⁸Nyang nvng lyis dvja ja cu lhyi eq, jyen bos laus eq, hauh zis gas ngah jyen khyvlyis toh aq.

¹⁹Ngos Paulo ka hauh jyen cap das oen, ngvnyang loq yah nyang lhaih kat. Nghuot laus eq nvnyang yangh Khristu mas nah kang dwis cho vsaiq nyhenshang ngos lyis jyen cap chah oen ma taiq kyingh noh das oen loms.

²⁰Housoeh las ngah vmang vnoeuh eh, hauh Yhensain dah nyoqnho lhyi yoeuh las hai ngos shangphu cho lhyi jenh kuot dyei aq. Khristu mas vmang vnoeuh nyang changh khyvlyis ngah ehnyet lyis lhoq pyo dyei aq.

²¹Nvng gas ngos dung zis yah dvyhangteh kuot dyei das oen nghamhnywe zis yah haih maussauh lhaih kat. Jyoengh nyang ngos taiq thoq lyis zes las kuot dyei das yvlyis ngos seq.

²²Hauh thoq lyis, ngah xiklyis yhet yvp sont toh aq; khasoeh ge lyis, Mangso ka namoq dah shvmanh dung dang lyis gyo dyei das las namoq jyank mas doms jweh los nhang das oen ngos nghamhloms nyeis.

²³Khristu Yesu cho taiq kyoh yvmvyah ngah thung lungh changh Epaphra ka nvng lyis jeshuh kat.

²⁴Houyah dvyhangteh ngah muhzwi changh Makho, Aristaku, Dema yahge Luka moq eq nvng lyis jeshuh kat.

²⁵Yhensain Yesu Khristu dah jyehjuh gas namoq dvnganhmoq yah dvgeh nghuot bas jungh.