Read Achang HEBRE 10 Bible Online

HEBRE 10 - Achang bible

HEBRE 10

¹Yuda jens dah lyi gas vgyingh dah yikhyoh gyingh ma nghuot, jweh los das hau nyeisgis yaplhoq cho dah siyet dvnghuot. nyamoq gas vjangh phudyei nyeis dah lomhxangh yah kyingh zvn yau zvn tsain phudyei. Housoeh las haih lomhxangh yah Mangso jyank mas wvng loh bang lyis hauh lyi gas nyamoq lyis dyinghjet bang khasoeh yoh bweh los nhang das lah?

²Mangso lhyi paiq nyeis bang lyis yaunos masyah yoh cheihshang goeus nghuot lyis gas, nyamoq yaunos yoh shih bang nghuot oen khanhamp eq ma nghamh lo das las phudyei cho dvnganh eq no tyamp lo das zis nghuot.

³Nghuot laus eq gvshih gas zvn yau zvn phudyei dah lomhxangh gas dius jens lyis nyamoq dah yaunos dah cho soh nhang nyeis.

⁴Khasoeh ge lyis noeuchoq yahge shvbeq suih gas yaunos lyis khanhamp eq yoh yoeus tyamp dyei zis ma nghuot.

⁵Housoeh yvmvyah Khristu gas hai mungkvn mas jweh lyih das zis cvvq uhlyis Mangso lhyi taiq zis gas, Nvng gas lomhxangh yahge jyungshuk lyis ma o, Nvng ngah xiklyis gungs sont toh dyei.

⁶Phon thoq mas dah doeu gonh ngheq dyei dah gaunyhauq lomhxangh yahge yobos khyuot lomhxangh lyis nvng nhaiq ma doeus.

⁷Hauh uhlyis ngos taiq zis gas, Sauhdain mas ngah cho lhaih toh zis yah dvyhangteh, Mangso eh, Nvng nhaiqtap khyvlyis kuot das zis gvshih ngos heimha jweh los oen goeus, ge.

⁸Tsai, nyang cangxeih taiq zis gas, Phudyei dah lomhxangh yahge jyungshuk lyis eq, phon mha gaunyhauq ngheq dyei zis yahge yaunos khyuot lomhxangh lainh zis lyis eq lyi yah dvyhangteh phudyei nghuot laus eq hauh lomhxangh lyis Yhensain nvng ma o, nhaiq doeus zis ma nghuot, ge.

⁹Hauh thang lhyi nyang taiq zis gas, Mangso eh, nvng nhaiqtap khyvlyis kuot das zis gvshih ngos heimha nyeis, ge. Housoeh las Mangso ka xik lyis phudyei dah lomhxangh vcauh dvnganh lyis yoeus tyamp las, Khristu dah phudyei yvlyis hauh joqyos mas gungsthaiq kat las goeng joq nhang.

¹⁰Yesu Khristu gas Mangso kuot nhang mes dah nhaiqtap khyvlyis yah dvyhangteh, nyah gungs lyis vcaiq vto xiklyis dvlhain lhyi yah dvnganh dye shoq phudyei gvng mas, yang dvnganh gas yaunos masyah cheihshang kat zis xauh goeus.

¹¹Yuda phudyei soeu khanghmuh gas nyah dah phudyei muh lyis nyeih yau nyeih wons wuq zis yah phudyei cho dvja kyingh lyis nyoshoq lhain kuot nyeis. Nghuot laus eq haih phudyei dah lomhxangh gas yaunos lyis khanhamp eq ma yoh yoeus tyamp dyei.

¹²Khristu gas yah yaunos khyuot dyei das nyhenshang vcaiq vto xiklyis vkyuh bos dah lomhxangh dvkoeuq kyingh lyis yah dye lainh lyis Mangso dah loqyos shot pheh loh tsung toh goeus.

¹³Gvshih nyang gas houmha nyah jeswus jens lyis nyah khyei o mha nangte khyvlyis Mangso yah toh dyei shoq langh uhjyangh nyeis.

¹⁴Khasoeh ge lyis nyang gas phudyei dah lomhxangh dvkoeuq yah yaunos masyah cheihshang kat zis xauh goeus bang lyis vcaiq vto xiklyis dyinghjet bang bweh los nhang.

¹⁵Hau gyingshang Dyos eq yang lyis kanghjyoeng kat dyei: Nyang cangxeih taiq zis gas,

¹⁶Haih zis gas hau jweh los das buisnyeis lyis nyamoq yah ngos toh das dah thanghchvp nghuot. Ngos ngah lyi nyamoq dah nhaiqlom mas kat dyei das las, nyamoq dah ehnyet mas lhaih toh das, ge hauh Yhensain taiq.

¹⁷Hauh thang lhyi nyang taiq zis gas, Nyamoq dah yaunos yahge ma shop muh lyis ngos ma comh dyei lo das.

¹⁸Housoeh las yaunos khyuot zis xauh goeus ya, yaunos khyuot dyei das xiklyis phudyei das chank ma bos lo.

¹⁹Housoeh yvmvyah ngah boekyis eh, Yesu shei kham gvng mas yang gas hau gyingshang thank joqyos mas wvng das xiklyis dyinghjet dah toeuh yoh goeus.

²⁰Nyang gas nyah gungs ge dah yhenmuh gosseh lyis jyweq bangh loh las Mangso dah xikkhonh mas bangh loh, dwis nyeis cho vsaiq dvkoeuq yah xiklyis phank toh dyei goeus.

²¹Yang gas Mangso dah yhen lhyi guon das dah Phudyei Zainsmuh dvyuk yoh.

²²Housoeh yvmvyah yang gas yaunos bos ge sohseq dah ehnyet lyis cheihshang lha, yah gungsdom lyis eq lhoqshang dah jeis yah dye cheihshang lhyi, yobos ma bos dah ehnyet, goeng dah lomsjingh cho bos zis yah Mangso jyank mas tsain ni loh goh.

²³Yang rhen dah lomsjingh cho dah nghamhloms cho mha goeng goeng zwi zains toh goh. Khasoeh ge lyis Mangso ka nyang toh dah dangthoengh mas wontang soeu nghuot yvlyis yang yoh loms.

²⁴Yang gas nyang changh nyang pangh thuk goh das nyhenshang, jyetdap ehnyet Chixoeuq goh zis yah gis dah muh chank kuot das xiklyis nyang changh nyang nghamh suon yoeuh goh nyeis goh.

²⁵Dvgeh zop huom dah thungh lyi lyis dvyhamh bang toh tyamp loh. Yang gas housoeh ma kuot kuot Yhensain doms jweh lyih dah buisnyeis ni los nyeis yvlyis namoq seq yvmvyah namoq nyang changh zes las yomdyei goh nyeis goh.

²⁶Khasoeh ge lyis yang gas hau jyoeng cho lhyi seq las dye lhom yoeus thang lhyi, pa-i yaunos doms kuot loh nyeis lyis gas, yah yaunos xiklyis lainh das lomhxangh bos lo das zis ma nghuot.

²⁷Yang gas jweh los das soetuon cho yahge Mangso lhyi tyixo bang lyis ngheq jyomh tyamp das gyukphoh nyi lyis gyuk zis yah langh nyeis das cho kyingh dvbos lo.

²⁸Moshe dah lyi lyis domsyos ma gyo soeu hank laus eq kanghjyoeng aiq yuk somh yuk dah dang yah yobos bos ge soetuon zis xauh lyis nhaiq ma nyen lo sat zis xauh.

²⁹Housoeh lyis gas Mangso dah Lo lyis chaxwe ma nhang kuot soeu, vsainnyang lyis yaunos masyah cheihshang dah Mangso thanghchvp suih lyis pvlhyahlyoeus kuot soeu, jyehjuh dyei dah Dyos lyis ma phauh gis kuot soeu ka khasoeh nghuot das lah? Nyang xauh mon dah joeng cho ka kha iq zes xungh das lah! Dvnghamh yoeuh geh.

³⁰Khasoeh ge lyis, Ngos lvto phuk das ge las eq, Yaunos dah uhkung phauh ngos laiq dyei das. Yhensain ka nyah dius jens lyis soetuon das, ge taiq soeu hank nghuot yvlyis yang seq.

³¹Dwis nyeis Mangso dah loq khau mha gyoh cho ka svsoh gyuk chank bos cho nghuot.

³²Lai loh goeus shishenh lyis namoq khasoeh teh bang nghuot yvlyis doms soh nyeis geh. Hauh shishenh lyis Mangso dah bvng zis xauh kham yoeus thang lhyi shanghsenh cho nyoshoq xauh kham lai los goeus. Nghuot laus eq namoq yomkat thoenk yap joq gvng mas hauh zis namoq lyis ma yoh ung.

³³Namoq nyang moqphung xikkhonh mas jwangh zis yahge shoeuhshih cho dvlhain lhain xauh lai loh goeus. Tsai gohtoeu shishenh lyis gas namoq teh shoeuhshih zis xauh nyeis dah dyenschangh jens shot pheh nyeis las yaukyenh cho chomp kham khyvlyis yah yomdyei zis yah pangh goeus.

³⁴Namoq gas thung lungh zis xauh bang dah shanghsenh yvlyis nhaiq bos taink dyei goeus. Namoq dah vyhang lhuot loh zis xauh uhlyis eq gausyis zis yah somh kham goeus. Khasoeh ge lyis hauh thoq lyis zes gis las vjangh goeng joq dah vyhang dvja yoh yvlyis namoq seq.

³⁵Housoeh yvmvyah namoq dah womh ehnyet lyis vchi lhaiq kat goh. Housoeh lyis namoq phauh shangh zainsmuh xauh yoeus das.

³⁶Mangso o khyvlyis chank kuot das zis yahge nyah dangthoengh yah dvyhangteh vkyuh xauh kham shoq namoq kuhxing ehnyet yah jhen chah nyeis.

³⁷Khasoeh ge lyis lhaihtoh dang mas taiq zis gas, Dvsoq lyis jweh los das soeu ka, ma nyangh lyis jweh los das. Nyang ma sheq nyeis lo das.

³⁸Ngah dah dan bang gas lomsjingh zis yah dwis nyeis das. Nghuot laus eq nyamoq mas dvyuk nungsdoms lyis gas Ngos nyang mas nhaiqdoeus das zis ma nghuot, ge.

³⁹Yang gas nungsdoms las dyuk loh bang ma nghuot; Lomsjingh las khyuot yoeus zis xauh bang dvnghuot.